നമ്മുടെ അടുക്കളകളിൽ പതിവായി ഉപയോഗിക്കുന്ന പെരുംജീരകത്തിന് രുചിക്കും മണത്തിനും പുറമെ നിരവധി ആരോഗ്യഗുണങ്ങളുമുണ്ടെന്നാണ് വിലയിരുത്തലുകൾ. ശരീരത്തിലെ അധിക ദ്രാവകങ്ങളും മാലിന്യങ്ങളും നീക്കം ചെയ്യുന്നതിൽ വൃക്കകൾക്ക് പ്രധാന പങ്കുള്ളതിനാൽ വൃക്കയുടെ ആരോഗ്യം സംരക്ഷിക്കുന്നതും ഏറെ പ്രധാനമാണ്.
പെരുംജീരകത്തിൽ സ്വാഭാവിക ഡൈയൂററ്റിക് ഗുണങ്ങളുള്ള ഘടകങ്ങൾ അടങ്ങിയിട്ടുണ്ട്. ഇത് മൂത്രത്തിന്റെ ഉത്പാദനം വർധിപ്പിക്കാനും ശരീരത്തിലെ അധിക ദ്രാവകം പുറത്തേക്ക് നീക്കം ചെയ്യാനും സഹായിക്കുമെന്നാണ് പറയപ്പെടുന്നത്.
വൃക്കകളുടെ ആരോഗ്യത്തെ ബാധിക്കുന്ന പ്രധാന ഘടകങ്ങളിലൊന്നാണ് വീക്കം. പെരുംജീരകത്തിൽ അടങ്ങിയ അനിതോൾ, ഫ്ലേവനോയ്ഡുകൾ തുടങ്ങിയ ഘടകങ്ങൾക്ക് ആന്റി-ഇൻഫ്ലമേറ്ററി ഗുണങ്ങളുണ്ടെന്ന് പഠനങ്ങൾ സൂചിപ്പിക്കുന്നു. ഇവ ശരീരത്തിലെ വീക്കം കുറയ്ക്കുന്നതിന് സഹായകമായേക്കാം.
പെരുംജീരകത്തിലെ ആന്റിഓക്സിഡന്റുകൾ ഓക്സിഡേറ്റീവ് സ്ട്രെസ് മൂലമുള്ള കോശനാശം കുറയ്ക്കാനും സഹായിക്കും. രക്തത്തിലെ പഞ്ചസാര, മോശം കൊളസ്ട്രോൾ തുടങ്ങിയ ഘടകങ്ങൾ നിയന്ത്രിക്കുന്നതിലും പെരുംജീരകത്തിലെ ചില ഘടകങ്ങൾക്ക് പങ്കുണ്ടാകാമെന്നാണ് വിവിധ പഠനങ്ങൾ സൂചിപ്പിക്കുന്നത്.
ഇതിന് പുറമെ ഭക്ഷണത്തിന് ശേഷം ചെറിയ അളവിൽ പെരുംജീരകം ഉപയോഗിക്കുന്നത് ദഹനത്തിന് സഹായകമാകാം. വയറുവീക്കം പോലുള്ള ദഹനസംബന്ധമായ അസ്വസ്ഥതകൾ കുറയ്ക്കാനും ഇത് സഹായിക്കുമെന്നാണ് പൊതുവെ കരുതുന്നത്.
എന്നാൽ പെരുംജീരകം വൃക്കരോഗത്തിനുള്ള ചികിത്സയ്ക്ക് പകരമല്ല. വൃക്കസംബന്ധമായ അസുഖങ്ങളുള്ളവർ ഭക്ഷണത്തിൽ മാറ്റം വരുത്തുന്നതിന് മുമ്പ് ഡോക്ടറുടെ നിർദേശം തേടുന്നതാണ് ഉചിതം.
