ദിവസങ്ങള് നീണ്ട രാഷ്ട്രീയ അനിശ്ചിതത്വങ്ങള്ക്കൊടുവില് തമിഴ്നാട് രാഷ്ട്രീയത്തില് പുതിയൊരു അധ്യായം കുറിക്കപ്പെടുന്നു. വിജയിയുടെ നേതൃത്വത്തിലുള്ള തമിഴക വെട്രി കഴകം (TVK) സംസ്ഥാനത്തെ ആദ്യ സഖ്യസര്ക്കാര് രൂപവത്കരിക്കാന് ഒരുങ്ങുകയാണ്. നിര്ണായക വേളയില് വിടുതലൈ ചിരുതൈകള് കച്ചി (VCK) നിരുപാധിക പിന്തുണ പ്രഖ്യാപിച്ചതോടെ വിജയ് സഖ്യം ഭൂരിപക്ഷം ഉറപ്പിച്ചു.
234 അംഗ നിയമസഭയില് കേവല ഭൂരിപക്ഷത്തിന് വേണ്ട 118 എന്ന സംഖ്യയിലേക്ക് ടി.വി.കെ എത്തി. നിലവില് ടി.വി.കെയ്ക്ക് പുറമെ അഞ്ച് കോണ്ഗ്രസ് അംഗങ്ങള്, നാല് ഇടത് (സിപിഎം -2, സിപിഐ -2 ) പ്രതിനിധികളുടെയും, രണ്ട് മുസ്ലിം ലീഗ് അംഗങ്ങളുടെയും പിന്തുണയുണ്ട്. ഒടുവിലായി വി.സി.കെയുടെ രണ്ട് എം.എല്.എമാര് കൂടി പിന്തുണ അറിയിച്ചിട്ടുണ്ട്.
62 വര്ഷക്കാലമായി തമിഴ് മണ്ണ് അടക്കിവാണിരുന്ന ഡി.എം.കെ, എ.ഐ.എ.ഡി.എം.കെ ദ്രാവിഡ പാര്ട്ടികളുടെ ആധിപത്യത്തിനാണ് ഇതോടെ അന്ത്യമാകുന്നത്. തിരഞ്ഞെടുപ്പില് 108 സീറ്റുകള് നേടി ടി.വി.കെ ഏറ്റവും വലിയ ഒറ്റകക്ഷിയായി മാറി. അതേസമയം, ഭരണകക്ഷിയായിരുന്ന ഡി.എം.കെ 59 സീറ്റുകളിലേക്കും എ.ഐ.എ.ഡി.എം.കെ 47 സീറ്റുകളിലേക്കും ചുരുങ്ങുകയായിരുന്നു.
നേരത്തെ ഭൂരിപക്ഷമില്ലെന്ന് കാണിച്ച് സര്ക്കാര് രൂപവത്കരിക്കാനുള്ള അവകാശവാദം ഗവര്ണര് ആര്.വി. അര്ലേക്കര് തള്ളിയിരുന്നു. എന്നാല് വി.സി.കെയുടെ കൂടി പിന്തുണ ലഭിച്ച സാഹചര്യത്തില് വിജയ് ഉടന് തന്നെ ഗവര്ണറെ കണ്ട് സര്ക്കാര് രൂപവത്കരിക്കാനുള്ള അവകാശവാദം ഉന്നയിക്കും.
Comments
