പശ്ചിമ ബംഗാള് നിയമസഭാ തെരഞ്ഞെടുപ്പിലെ വോട്ടെണ്ണല് ഉദ്യോഗസ്ഥരുടെ നിയമനവുമായി ബന്ധപ്പെട്ട് തൃണമൂല് കോണ്ഗ്രസ് സമര്പ്പിച്ച ഹര്ജി തള്ളി സുപ്രീം കോടതി. വോട്ടെണ്ണല് സൂപ്പര്വൈസര്മാരെയും അസിസ്റ്റന്റുമാരെയും നിയമിക്കുന്നത് തെരഞ്ഞെടുപ്പ് കമ്മീഷന്റെ അധികാര പരിധിയില് വരുന്ന കാര്യമാണെന്ന് പറഞ്ഞ കോടതി ഇതില് ഇടപെടേണ്ട സാഹചര്യമില്ലെന്ന് വ്യക്തമാക്കി.
വോട്ടെണ്ണല് നടപടികളിലേക്ക് ഉദ്യോഗസ്ഥരെ നിയോഗിക്കാന് തെരഞ്ഞെടുപ്പ് കമ്മീഷന് പൂര്ണ്ണ അധികാരമുണ്ടെന്നും കേന്ദ്ര സര്ക്കാര് ഉദ്യോഗസ്ഥരെ നിയമിച്ചതുകൊണ്ട് മാത്രം തെരഞ്ഞെടുപ്പ് അട്ടിമറിക്കപ്പെടുമെന്ന വാദം നിലനില്ക്കുന്നതല്ലെന്നുമാണ് കോടതിയുടെ വിലയിരുത്തല്.
വോട്ടെണ്ണല് സമയത്ത് സ്ഥാനാര്ത്ഥികളുടെ ഏജന്റുമാര് ഉള്പ്പെടെയുള്ളവര് അവിടെ ഉണ്ടായിരിക്കുമെന്നതിനാല് നടപടികള് സുതാര്യമായിരിക്കുമെന്ന് കോടതി ചൂണ്ടിക്കാട്ടി.
വോട്ടെണ്ണല് മെയ് 4-ന് നടക്കാനിരിക്കുന്നതിനാല്, അവധി ദിവസമായിരുന്നിട്ടും ജസ്റ്റിസ് പി.എസ്. നരസിംഹ, ജസ്റ്റിസ് ജോയ്മല്യ ബാഗ്ചി എന്നിവരടങ്ങിയ പ്രത്യേക ബെഞ്ച് ഹര്ജി അടിയന്തരമായി പരിഗണിക്കുകയായിരുന്നു.
അതേസമയം, വോട്ടെടുപ്പ് ക്രമക്കേടുകള് റിപ്പോര്ട്ട് ചെയ്യപ്പെട്ടതിനാല് തെരഞ്ഞെടുപ്പ് കമ്മീഷന്റെ നിര്ദ്ദേശപ്രകാരം ദക്ഷിണ 24 പര്ഗാനാസ് ജില്ലയിലെ 15 ബൂത്തുകളില് ഇന്ന് റീപോളിംഗ് നടക്കുകയാണ്. മഗ്രാഹാത് വെസ്റ്റിലെ 11 ബൂത്തുകളിലും, ഡയമണ്ട് ഹാര്ബറിലെ 4 ബൂത്തുകളിലുമാണ് വീണ്ടും വോട്ടെടുപ്പ് നടക്കുന്നത്.
Comments
