മുംബൈ: ഇന്ത്യയുടെ ഏകദിന ക്യാപ്റ്റനായി രോഹിത് ശർമ്മ തന്നെ തുടരേണ്ടിയിരുന്നുവെന്ന് മുൻ ഇന്ത്യൻ ക്രിക്കറ്റ് താരം വസീം ജാഫർ. 2025 ഒക്ടോബറിൽ സീനിയർ താരമായ രോഹിതിൽ നിന്ന് ശുഭ്മാൻ ഗിൽ ക്യാപ്റ്റൻസി ഏറ്റെടുത്തെങ്കിലും, 2027 ലെ ഏകദിന ലോകകപ്പ് വരെ ടീം മാനേജ്മെന്റ് രോഹിത് ശർമ്മയ്ക്കൊപ്പം തന്നെ മുന്നോട്ടുപോകേണ്ടതായിരുന്നുവെന്നാണ് ജാഫർ അഭിപ്രായപ്പെടുന്നത്.
ഗില്ലിന് ക്യാപ്റ്റൻസി നൽകിയത് ധൃതി പിടിച്ചോ?
ആ വലിയ ടൂർണമെന്റിന് ശേഷം മാത്രം ഗില്ലിന് നായകസ്ഥാനം കൈമാറാമായിരുന്നു എന്നും അദ്ദേഹം വ്യക്തമാക്കുന്നു. തന്റെ യൂട്യൂബ് ചാനലിൽ സംസാരിക്കവെ ജാഫർ പറഞ്ഞത് ഇങ്ങനെയാണ്:
“രോഹിത് ശർമ്മയെ ഏകദിന ക്യാപ്റ്റനായി നിലനിർത്തണമായിരുന്നു. അദ്ദേഹം ഇന്ത്യയുടെ മികച്ച ക്യാപ്റ്റനാണ്, അതിനാൽ 2027 ലോകകപ്പ് വരെ ഇന്ത്യയുടെ നായകനായി തുടരണമായിരുന്നു. ഗിൽ മികച്ച പ്രകടനം കാഴ്ചവെയ്ക്കുന്നതുകൊണ്ട് ഈ തീരുമാനം പൂർണ്ണമായും തെറ്റാണെന്ന് ഞാൻ പറയില്ല. എങ്കിലും, രോഹിത് ശർമ്മയെപ്പോലൊരാൾ ലഭ്യമാകുമ്പോൾ അദ്ദേഹമാണ് ടീമിനെ നയിക്കേണ്ടത്. 50 ഓവർ ലോകകപ്പിന് ശേഷം എപ്പോൾ വേണമെങ്കിലും നിങ്ങൾക്ക് ശുഭ്മാൻ ഗില്ലിന് ബാറ്റൺ കൈമാറാൻ കഴിയുമായിരുന്നു.
“ബാറ്റ് കൊണ്ട് മറുപടി നൽകി ഹിറ്റ്മാൻ
വെസ്റ്റ് ഇൻഡീസിനെതിരായ ഇന്ത്യയുടെ ഏകദിന പരമ്പരയിൽ രോഹിത് ശർമ്മ മികച്ച ഫോമിലാണ് ബാറ്റ് വീശിയത്. ആദ്യ മത്സരത്തിൽ 32 റൺസിന് പുറത്തായെങ്കിലും, പരമ്പരയിലെ ശേഷിച്ച മത്സരങ്ങളിൽ 101, 92 എന്നിങ്ങനെ മികച്ച സ്കോറുകൾ നേടി താരം തന്റെ സാന്നിധ്യമറിയിക്കുകയും ചെയ്തിരുന്നു.
ക്യാപ്റ്റൻസി പോയെങ്കിലും ബാറ്റർ എന്ന നിലയിൽ രോഹിത് ഇപ്പോഴും ഇന്ത്യയുടെ ഏറ്റവും വലിയ മാച്ച് വിന്നർ ആണെന്ന് തെളിയിക്കുന്നതാണ് ഈ പ്രകടനം. 2027 ലോകകപ്പിന് മുൻപ് ഇത്തരമൊരു പരിചയസമ്പന്നനെ ക്യാപ്റ്റൻ സ്ഥാനത്ത് നിന്ന് മാറ്റിയത് ശരിയായോ എന്ന ചർച്ച ഇപ്പോൾ ക്രിക്കറ്റ് ലോകത്ത് ശക്തമാണ്.
