യുവേഫ നേഷൻസ് ലീഗിൽ വിജയത്തോടെ ഡിഫൻഡിങ് ചാമ്പ്യന്മാരായ പോർച്ചുഗൽ തങ്ങളുടെ കാമ്പെയ്ൻ ആരംഭിച്ചു. ഗ്രൂപ്പ് ഡി-യിൽ നടന്ന മത്സരത്തിൽ വെയിൽസിനെതിരെ ജോവോ ഫെലിക്സ് നേടിയ ഒരേയൊരു ഗോളിന്റെ കരുത്തിലാണ് പറങ്കിപ്പട വിജയം സ്വന്തമാക്കിയത്.
മത്സരം വിജയിച്ചെങ്കിലും നായകൻ ക്രിസ്റ്റ്യാനോ റൊണാൾഡോയുടെ പ്രകടനം ശരാശരി മാത്രമായിരുന്നു എന്നത് ആരാധകരെ നിരാശപ്പെടുത്തുന്നുണ്ട്. ലഭിച്ച ഗോളവസരങ്ങൾ മുതലാക്കാൻ താരത്തിന് സാധിച്ചില്ലെന്നുമാത്രമല്ല, നേടിയ ഒരു ഗോൾ ഓഫ് സൈഡിൽ കുടുങ്ങി നഷ്ടമാവുകയും ചെയ്തു.
മത്സരത്തിന്റെ 67-ാം മിനിറ്റിൽ പരിശീലകൻ ജോർജ് ജീസസ് പിൻവലിക്കുന്നത് വരെ കളിക്കളത്തിലുണ്ടായിരുന്ന റൊണാൾഡോയുടെ പേരിലുള്ളത് ആകെ 27 ടച്ചുകൾ മാത്രമാണ്.
എന്നാൽ എതിർ ടീമായ വെയിൽസിന്റെ ഗോൾകീപ്പർ ഡാനി വാർഡിന്റെ പേരിൽ 63 ടച്ചുകൾ രേഖപ്പെടുത്തിയിരുന്നു എന്നത് ഒരേസമയം രസകരവും എന്നാൽ അത്ഭുതപ്പെടുത്തുന്നതുമാണ്.
തുടർച്ചയായി നിരാശപ്പെടുത്തുന്ന കണക്കുകൾ
ദേശീയ ടീമിനൊപ്പമുള്ള അവസാന നാല് മത്സരങ്ങളിലും റൊണാൾഡോയുടെ ബോൾ ടച്ചുകൾ എതിർ ടീം ഗോൾകീപ്പറേക്കാൾ പിന്നിലാണെന്ന കണക്കുകൾ ഇതിനോടകം ചർച്ചയായിക്കഴിഞ്ഞു.
ഫിഫ ലോകകപ്പ് റൗണ്ട് ഓഫ് 16-ൽ സ്പെയിനെതിരെ പോർച്ചുഗൽ തോറ്റ മത്സരത്തിൽ റൊണാൾഡോയ്ക്ക് 19 ടച്ചുകൾ മാത്രമുണ്ടായിരുന്നപ്പോൾ സ്പാനിഷ് ഗോൾകീപ്പർ ഉനായ് സൈമൺ 45 ടച്ചുകൾ പൂർത്തിയാക്കിയിരുന്നു.
ക്രൊയേഷ്യക്കെതിരായ മത്സരത്തിൽ റൊണാൾഡോയ്ക്ക് 25 ടച്ചും എതിർ ഗോൾകീപ്പർ ഡൊമനിക് ലിവക്കോവിച്ചിന് 37 ടച്ചുമുണ്ടായിരുന്നു.
കൊളംബിയക്കെതിരായ മത്സരത്തിലും സമാനമായ അവസ്ഥയായിരുന്നു.
ക്രെയ്ഗ് ബർലിയുടെ രൂക്ഷ വിമർശനം
മറുവശത്ത്, 41 കാരനായ ക്രിസ്റ്റ്യാനോ റൊണാൾഡോയെ ഇപ്പോഴും ടീമിൽ പ്രധാന താരമായി നിലനിർത്തുന്ന പോർച്ചുഗലിന്റെ തീരുമാനത്തിനെതിരെ മുൻ ചെൽസി താരം ക്രെയ്ഗ് ബർലി കടുത്ത വിമർശനവുമായി രംഗത്തെത്തി.
റൊണാൾഡോയുടെ കാര്യത്തിൽ കടുത്ത തീരുമാനങ്ങൾ എടുക്കാൻ കഴിയാത്ത കോച്ചിനെ ‘പാവ’ എന്ന് വിശേഷിപ്പിച്ച ബർലി, ഈ അന്ധത തുടരുന്നിടത്തോളം കാലം പ്രധാന ടൂർണമെന്റുകളിൽ നിന്ന് പുറത്താകാൻ പോർച്ചുഗൽ അർഹരാണെന്നും തുറന്നടിച്ചു.
നേഷൻസ് ലീഗ് ഗ്രൂപ്പ് സ്റ്റാൻഡിങ്സിൽ നിലവിൽ ഡെൻമാർക്കിനെ വീഴ്ത്തിയ എർലിങ് ഹാലണ്ടിന്റെ നോർവേയ്ക്ക പിന്നിൽ രണ്ടാമതാണ് പോർച്ചുഗൽ. സെപ്റ്റംബർ 28-ന് നോർവേയുമായാണ് പോർച്ചുഗലിന്റെ അടുത്ത മത്സരം.
