കഴിഞ്ഞ സര്ക്കാര് അഴിമതിയും കൊള്ളയും നടത്തി ജനങ്ങളെ വഞ്ചിച്ചുവെന്ന് ആഭ്യന്തര മന്ത്രി രമേശ് ചെന്നിത്തല. എന്നാല് അഴിമതി നടത്തുന്നവരെ രക്ഷിക്കാന് പുതിയ സര്ക്കാര് അനുവദിക്കില്ലെന്നും അഴിമതിക്കാരെ നിയമത്തിന് മുന്നില് കൊണ്ടുവന്ന് കനത്ത ശിക്ഷ ഉറപ്പാക്കുമെന്നും അദ്ദേഹം വ്യക്തമാക്കി. കേരള എന്.ജി.ഒ അസോസിയേഷന്റെ 51-ാമത് സംസ്ഥാന സമ്മേളനത്തിന്റെ പൊതുസമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സംസ്ഥാനത്തിന്റെ നിലവിലെ സാമ്പത്തിക സ്ഥിതി വളരെ മോശമാണെന്നും ചെന്നിത്തല ചൂണ്ടിക്കാട്ടി. കഴിഞ്ഞ 10 വര്ഷമായി അനാവശ്യമായ ചെലവുകളും അനാവശ്യമായ കടമെടുപ്പും നടന്നെന്നും എന്നാല് ഇതിന്റെ പേരില് ജീവനക്കാരുടെ ആനുകൂല്യങ്ങള് മാറ്റിവെക്കേണ്ടതാണെന്ന നിലപാട് പുതിയ സര്ക്കാരിനില്ലെന്നും അദ്ദേഹം ഉറപ്പുനല്കി.
അതേസമയം സി.പി.എം പ്രവര്ത്തകരെ അഴിച്ചുവിട്ട് പൊലീസിന് നേരെ അക്രമം നടത്തുകയാണെന്ന് ആഭ്യന്തര മന്ത്രി വിമര്ശിച്ചു. ഇ.ഡി ഉദ്യോഗസ്ഥര് എത്തിയ വാഹനങ്ങള് അടിച്ചുതകര്ത്ത സംഭവം തികച്ചും ദൗര്ഭാഗ്യകരമാണെന്നും അദ്ദേഹം പറഞ്ഞു. അധികാരം പോയതിന്റെ വിഷമം അക്രമം കാട്ടിയല്ല തീര്ക്കേണ്ടതെന്നും അദ്ദേഹം കൂട്ടിച്ചേര്ത്തു.
Comments
