ഇന്ത്യൻ ടി20 ടീമിന്റെ മുൻ നായകൻ സൂര്യകുമാർ യാദവ് സഹതാരങ്ങളായ രോഹിത് ശർമ്മ, വിരാട് കോഹ്‌ലി, ഹാർദിക് പാണ്ഡ്യ എന്നിവരെക്കുറിച്ചുള്ള രസകരമായ അനുഭവങ്ങളും നിരീക്ഷണങ്ങളും പങ്കുവെച്ചിരിക്കുകയാണ്.
രോഹിത് ശർമ്മയും, വിരാട് കോഹ്‌ലിയും, ഹാർദിക് പാണ്ഡ്യയും താനും ഒരു കാറിൽ യാത്ര ചെയ്യുകയാണെങ്കിൽ ആരെയൊക്കെ എവിടെയൊക്കെ ഇരുത്തും എന്ന ചോദ്യത്തിന് തികച്ചും തമാശ രൂപേണയാണ് താരം മറുപടി നൽകിയത്.
“രോഹിത് ശർമ്മയെ ഒരു കാരണവശാലും ഡ്രൈവിംഗ് സീറ്റിലിരുത്തില്ല, കാരണം പെട്ടെന്ന് വഴി തെറ്റിപ്പോകാൻ സാധ്യതയുണ്ട്. അതുകൊണ്ട് അദ്ദേഹത്തെ ഡ്രൈവർക്ക് തൊട്ടടുത്ത സീറ്റിലിരുത്തും.
എപ്പോഴും സംസാരിക്കാൻ ഒട്ടനവധി വിശേഷങ്ങളുള്ള വിരാട് കോഹ്‌ലിയെ ഡ്രൈവർക്ക് തൊട്ടുപിന്നിലെ സീറ്റിലായിരിക്കും ഇരുത്തുക.
എല്ലാവരുടെയും ശ്രദ്ധ പിടിച്ചുപറ്റാൻ ഇഷ്ടപ്പെടുന്ന ഹാർദിക് പാണ്ഡ്യയെ കാറിന്റെ മുകളിലായിരിക്കും ഇരുത്തുക,” സൂര്യകുമാർ ചിരിയോടെ വ്യക്തമാക്കി.
തമാശകൾക്കപ്പുറം, കോഹ്‌ലി, രോഹിത്, ഇന്ത്യൻ കോച്ച് ഗൗതം ഗംഭീർ എന്നിവരിൽ നിന്ന് താൻ പഠിച്ച പാഠങ്ങളെക്കുറിച്ചും സൂര്യകുമാർ മനസ്സ് തുറന്നു.
വിരാട് കോഹ്‌ലിയുടെ കഠിനാധ്വാനവും കർശനമായ ഫിറ്റ്‌നസ് ദിനചര്യകളും നേരിട്ട് കണ്ടുപഠിക്കുന്നതിനായി അദ്ദേഹത്തിന്റെ അതേ സമയത്തുതന്നെ താനും ജിമ്മിലും പരിശീലനത്തിനും ഇറങ്ങാറുണ്ടായിരുന്നുവെന്ന് സൂര്യകുമാർ വെളിപ്പെടുത്തി.
കളിക്കളത്തിലും പുറത്തും സഹതാരങ്ങളെ എങ്ങനെ മനസ്സിലാക്കണമെന്നും ഒപ്പം ടീമിനെ എങ്ങനെ നയിക്കണമെന്നുമുള്ള കൃത്യമായ ക്യാപ്റ്റൻസി പാഠങ്ങൾ രോഹിത് ശർമ്മയിൽ നിന്നാണ് ഉൾക്കൊണ്ടത്.
ഇതിനുപുറമെ, ഇന്ത്യൻ മുഖ്യ പരിശീലകൻ ഗൗതം ഗംഭീറിൽ നിന്ന് വിജയതൃഷ്ണയും വിനയവും ഒരുപോലെ കൊണ്ടുപോകേണ്ടതിന്റെ പ്രാധാന്യമാണ് താൻ പഠിച്ചതെന്നും സൂര്യകുമാർ കൂട്ടിച്ചേർത്തു.
കളിക്കളത്തിൽ ഒട്ടും വിട്ടുവീഴ്ചയില്ലാത്ത മത്സരബുദ്ധിയും, പുറത്തിറങ്ങിക്കഴിഞ്ഞാൽ തികഞ്ഞ വിനയവും കാത്തുസൂക്ഷിക്കുന്ന ഗംഭീറിന്റെ ശൈലി തനിക്ക് വലിയ പ്രചോദനമാണെന്നും സൂര്യകുമാർ യാദവ് ഓർത്തെടുത്തു.
