ന്യൂസിലാൻഡിനെതിരെയുള്ള രണ്ടാം ടി-20യിൽ തിളങ്ങാനാവാതെ മലയാളി താരം സഞ്ജു സാംസൺ. 17 പന്തുകളിൽ നിന്നും 14 റൺസ് നേടിയാണ് സഞ്ജു മടങ്ങിയത്. ഓരോ വീതം ഫോറുകളും സിക്സുമാണ് സഞ്ജു നേടിയത്. ആദ്യ ഓവർ തന്നെ സഞ്ജു മെയ്ഡൻ ആക്കി മാറ്റിയിരുന്നു.
ഇതോടെ ഇന്റർനാഷണൽ ടി-20യിൽ ആദ്യ ഓവറിൽ മെയ്ഡനാക്കി മാറ്റിയ ഇന്ത്യൻ ഓപ്പണർമാരുടെ നിർഭാഗ്യ ലിസ്റ്റിലാണ് സഞ്ജു ഇടം നേടിയത്. സഞ്ജു ഇന്ത്യക്ക് വേണ്ടി തന്റെ കരിയറിൽ ആദ്യമായാണ് ആദ്യ ഓവർ റൺസ് നേടാതെ പൂർത്തിയാക്കുന്നത്. ശിഖർ ധവാൻ, രോഹിത് ശർമ്മ, യശ്വസി ജെയ്‌സ്വാൾ എന്നീ ഓപ്പണർമാരും ഓരോ തവണ ആദ്യ ഓവറിൽ മെയ്ഡൻ ആക്കിയിട്ടുണ്ട്.
ഏറ്റവും കൂടുതൽ തവണ ആദ്യ ഓവറിൽ മെയ്ഡനാക്കിയ ഇന്ത്യൻ ഓപ്പണർ കെ.എൽ രാഹുലാണ്‌ ഈ പട്ടികയിലെ ഒന്നാമൻ. 5 തവണയാണ് രാഹുൽ ആദ്യ ഓവർ റൺസ് നേടാതെ പൂർത്തിയാക്കിയത്.
മത്സരത്തിൽ ടോസ് നഷ്ടപ്പെട്ട് ആദ്യം ബാറ്റ് ചെയ്ത ന്യൂസിലാൻഡ് 180 റൺസാണ് നേടിയത്. ഗ്ലെൻ ഫിലിപ്പ്സ്, ബെവൺ ജേക്കബ്‌സ് എന്നിവർ അർധ സെഞ്ച്വറി നേടി തിളങ്ങി.
കഴിഞ്ഞ മത്സരത്തിൽ തിളങ്ങിയ ഫിലിപ്പ്സ് 43 പന്തിൽ 70 റൺസാണ് അടിച്ചെടുത്തത്. നാല് വീതം ഫോറുകളും സിക്സുകളും അടങ്ങുന്നതാണ് ഇന്നിംഗ്സ്. ബെവൺ ജേക്കബ്‌സ് 46 പന്തിൽ 5 ഫോറുകളും ഒരു സിക്‌സും അടക്കം 58 റൺസും നേടി.
മത്സരത്തിൽ ഇന്ത്യൻ ബൗളിംഗിൽ അർഷ്ദീപ് സിംഗ് രണ്ട് വിക്കറ്റും ഭുവനേശ്വർ കുമാർ, നിതീഷ് കുമാർ റെഡ്ഢി, പ്രിൻസ് യാദവ് എന്നിവർ ഓരോ വീതം വിക്കറ്റുകൾ നേടി.
രണ്ട് മാറ്റങ്ങളുമായാണ് ഇന്ത്യ ഈ മത്സരത്തിൽ കളത്തിലിറങ്ങിയത്. പരിക്കേറ്റ ഇഷാൻ കിഷന് പകരം യുവതാരം വൈഭവ് സൂര്യവംശി ഇടം നേടിയപ്പോൾ മായങ്ക് യാദവിന്‌ പകരം പ്രിൻസ് യാദവും ടീമിലെത്തി.
ഇന്ത്യ പ്ലെയിംഗ് ഇലവൻ
സഞ്ജു സാംസൺ(വിക്കറ്റ് കീപ്പർ), അഭിഷേക് ശർമ്മ, വൈഭവ് സൂര്യവംശി, ശ്രേയസ് അയ്യർ(ക്യാപ്റ്റൻ), തിലക് വർമ്മ, നിതീഷ് കുമാർ റെഡ്ഡി, നമൻ ധിർ, അക്‌സർ പട്ടേൽ, ഭുവനേശ്വർ കുമാർ, അർഷ്ദീപ് സിംഗ്, പ്രിൻസ് യാദവ്.
ന്യൂസിലാൻഡ് പ്ലെയിംഗ് ഇലവൻ
ഫിൻ അലൻ, ടിം സൈഫെർട്ട്(വിക്കറ്റ് കീപ്പർ), ഡാരിൽ മിച്ചൽ, ഗ്ലെൻ ഫിലിപ്പ്സ്, ബെവൺ ജേക്കബ്‌സ്, മൈക്കൽ ബ്രേസ്‌വെൽ, മിച്ചൽ സാൻ്റ്നർ(ക്യാപ്റ്റൻ), നഥാൻ സ്മിത്ത്, മാറ്റ് ഹെൻറി, ജേക്കബ് ഡഫി, ലോക്കി ഫെർഗൂസൻ.
