പുകവലി ഉപേക്ഷിക്കണമെന്ന് ആഗ്രഹമുണ്ടെങ്കിലും പലതവണ ശ്രമിച്ചു പരാജയപ്പെട്ടവരാണോ നിങ്ങൾ? എങ്കിൽ ഒരിക്കൽ കൂടി ഒന്ന് ശ്രമിച്ചു നോക്കൂ! വെറും ഏഴ് ദിവസം സിഗരറ്റ് തൊടാതെ ഇരുന്നാൽ നമ്മുടെ ശരീരത്തിൽ അത്ഭുതകരമായ മാറ്റങ്ങളാണ് സംഭവിക്കുന്നത്.
പുകവലി നിർത്തുന്നത് ആദ്യ ദിവസങ്ങളിൽ അല്പം ബുദ്ധിമുട്ടായി തോന്നിയേക്കാമെങ്കിലും, ശരീരം സ്വയം സുഖപ്പെടുത്താനുള്ള പ്രക്രിയ (Healing Process) ആരംഭിക്കുന്നത് ഈ ദിവസങ്ങളിൽ തന്നെയാണ്.
ഒരാഴ്ചക്കാലം സിഗരറ്റ് ഒഴിവാക്കുമ്പോൾ ശരീരത്തിൽ ഓരോ ദിവസവും ഉണ്ടാകുന്ന പ്രധാനപ്പെട്ട മാറ്റങ്ങൾ താഴെ പറയുന്നവയാണ്:
ആദ്യ ദിവസം: ശരീരം വീണ്ടെടുക്കൽ തുടങ്ങുന്നു
സിഗരറ്റ് വലിക്കുന്നത് നിർത്തി ആദ്യ 24 മണിക്കൂറിനുള്ളിൽ തന്നെ ശരീരത്തിൽ മാറ്റങ്ങൾ പ്രകടമായി തുടങ്ങും. പുകവലിയിലൂടെ ശരീരത്തിലെത്തുന്ന വിഷവാതകമായ കാർബൺ മോണോക്സൈഡിന്റെ അളവ് രക്തത്തിൽ കുറയാൻ തുടങ്ങും.
ഇത് രക്തത്തിന് ഓക്സിജൻ വഹിക്കാനുള്ള ശേഷി സാധാരണ നിലയിലേക്ക് മടക്കിക്കൊണ്ടുവരാൻ സഹായിക്കുന്നു.
രണ്ടാം ദിവസം: നിക്കോട്ടിൻ പിൻവലിയൽ ലക്ഷണങ്ങൾ
സിഗരറ്റിലെ നിക്കോട്ടിൻ ശരീരത്തെ അതിന് അടിമപ്പെടുത്തുന്ന ഘടകമാണ്. അതിനാൽ പുകവലി നിർത്തുമ്പോൾ ശക്തമായ ആഗ്രഹം, അസ്വസ്ഥത, ഉത്കണ്ഠ, ശ്രദ്ധക്കുറവ് തുടങ്ങിയ ലക്ഷണങ്ങൾ (Nicotine Withdrawal Symptoms) ഉണ്ടായേക്കാം.
ഈ സമയത്ത് ധാരാളം വെള്ളം കുടിക്കുന്നതും നടക്കാൻ പോകുന്നതും ദീർഘമായി ശ്വാസോച്ഛ്വാസം ചെയ്യുന്നതും ആശ്വാസം നൽകും.
മൂന്നാം ദിവസം: ശ്വസനം എളുപ്പമാകുന്നു
പുകവലി നിർത്തി 72 മണിക്കൂർ പിന്നിടുമ്പോൾ ശരീരത്തിലെ നിക്കോട്ടിന്റെ അളവ് ഗണ്യമായി കുറയുന്നു.
ചിലർക്ക് സിഗരറ്റോടുള്ള ആഗ്രഹം ഈ സമയത്ത് ശക്തമായി അനുഭവപ്പെടാമെങ്കിലും, ചെറിയൊരു നടത്തത്തിലൂടെയോ സുഹൃത്തുക്കളുമായി സംസാരിക്കുന്നതിലൂടെയോ ഇതിനെ പ്രതിരോധിക്കാം.
ഈ ഘട്ടത്തിൽ ശ്വസനം കൂടുതൽ എളുപ്പമാകുന്നതായി അനുഭവപ്പെടാം.
നാലാം ദിവസം: രുചിയും മണവും തിരിച്ചുകിട്ടുന്നു
നാല് ദിവസം കഴിയുമ്പോൾ ശരീരം വീണ്ടെടുക്കാനുള്ള ശ്രമങ്ങൾ തുടരുകയാണ്. ചിലരിൽ ഉറക്കക്കുറവ്, ദേഷ്യം, മാനസിക സമ്മർദം എന്നിവ അനുഭവപ്പെടാമെങ്കിലും, കൃത്യമായ ഉറക്കവും ലഘു വ്യായാമങ്ങളും ഇതിനെ മറികടക്കാൻ സഹായിക്കും.
കൂടാതെ, ആഹാരത്തിന്റെ രുചിയും മണവും തിരിച്ചറിയാനുള്ള കഴിവിലും ഈ ദിവസങ്ങളിൽ പുരോഗതി ഉണ്ടാകാം.
അഞ്ചാം ദിവസം: പുതിയ ശീലങ്ങളും രക്തയോട്ടവും
ചായ കുടിക്കുമ്പോഴോ ഭക്ഷണശേഷമോ സിഗരറ്റ് വലിക്കണമെന്ന് തോന്നുന്ന സാഹചര്യങ്ങളെ തിരിച്ചറിയുക എന്നതാണ് പ്രധാനം.
ഈ സമയത്ത് സിഗരറ്റിന് പകരം ചെറിയൊരു നടത്തം, ആരോഗ്യകരമായ ലഘുഭക്ഷണം തുടങ്ങിയവ ശീലമാക്കാം.
പുകവലി നിർത്തി അഞ്ച് ദിവസമാകുമ്പോൾ രക്തത്തിലെ കാർബൺ മോണോക്സൈഡിന്റെ അളവ് പൂർണ്ണമായും സാധാരണ നിലയിലാകുകയും ഓക്സിജൻ നില മെച്ചപ്പെടുകയും ചെയ്യും.
ആറാം ദിവസം: സാമ്പത്തിക ലാഭവും ആരോഗ്യവും
പുകവലിക്ക് വേണ്ടി ദിവസവും ചെലവാക്കുന്ന തുക കണക്കാക്കി നോക്കൂ! ആറു ദിവസം കൊണ്ട് ആ പണം വലിയൊരു തുകയായി ലാഭിക്കാൻ സാധിക്കും.
ഈ ചെറിയ സാമ്പത്തിക നേട്ടം പോലും പുകവലി ഉപേക്ഷിക്കാനുള്ള വലിയൊരു പ്രചോദനമാക്കാം. ഈ ഘട്ടത്തിലും ശരീരത്തിന്റെ വീണ്ടെടുക്കൽ പ്രക്രിയ തുടർന്നുകൊണ്ടിരിക്കുകയാണ്.
ഏഴാം ദിവസം: ഒരാഴ്ചയുടെ വലിയ നേട്ടം
തുടർച്ചയായി ഏഴ് ദിവസം പുകവലിക്കാതെ പൂർത്തിയാക്കുക എന്നത് അഭിനന്ദനാർഹമായ കാര്യമാണ്! ഒരാഴ്ചകൊണ്ട് ശ്വാസകോശം പൂർണ്ണമായി ശുദ്ധമാകില്ലെങ്കിലും, ഇത് ആരോഗ്യകരമായ ഒരു ജീവിതത്തിലേക്കുള്ള വലിയൊരു തുടക്കമാണ്.
ഓർക്കുക, ഒരാഴ്ച എന്നത് ഒരു തുടക്കം മാത്രമാണ്. പുകവലി ഒഴിവാക്കുന്നത് ഇനിയും തുടരുക. ഈ യാത്രയിൽ ബുദ്ധിമുട്ട് അനുഭവപ്പെടുകയാണെങ്കിൽ നിക്കോട്ടിൻ പാച്ച്, ഗം, കൗൺസലിങ് തുടങ്ങിയ മാർഗ്ഗങ്ങൾക്കായി ഒരു ഡോക്ടറുടെ സഹായം തേടാവുന്നതാണ്. പുകവലി ഉപേക്ഷിക്കൂ, ആരോഗ്യം സംരക്ഷിക്കൂ!
