മുംബൈ: ബോർഡർ-ഗവാസ്‌കർ ട്രോഫിക്ക് (BGT) മുന്നോടിയായി നടത്തിയ പരിശീലന മത്സരത്തിൽ എം.എസ്. ധോണിയെ ആദ്യമായി കണ്ടപ്പോഴുള്ള അനുഭവം തുറന്നുപറഞ്ഞ് മുൻ ഇന്ത്യൻ വിക്കറ്റ് കീപ്പർ പാർത്ഥിവ് പട്ടേൽ.
മുൻ ഇന്ത്യൻ താരം ആകാശ് ചോപ്രയുമായുള്ള പോഡ്‌കാസ്റ്റിൽ സംസാരിക്കവെയാണ് ധോണിയെക്കുറിച്ചുള്ള തന്റെ ആദ്യ നിഗമനം തെറ്റായിരുന്നുവെന്ന് പാർത്ഥിവ് വെളിപ്പെടുത്തിയത്.
“സഹീർ ഖാന്റെ ബൗൺസറിൽ പുറത്തായപ്പോൾ വെറുതെ നൽകുന്ന പ്രചാരണമാണെന്ന് കരുതി”:
2004-ൽ ബാംഗ്ലൂരിൽ നടന്ന ഒരു പരിശീലന മത്സരത്തിലാണ് പാർത്ഥിവ് ആദ്യമായി ധോണിയെ കാണുന്നത്.തനിക്കൊരു പകരക്കാരനായി ഉയർന്നുവരുന്ന വിക്കറ്റ് കീപ്പർ എന്ന നിലയിൽ ആളുകൾ ധോണിയുടെ പേര് എപ്പോഴും പറയുന്നത് പാർത്ഥിവിന്റെ ശ്രദ്ധയിൽപ്പെട്ടിരുന്നു.
“ബാംഗ്ലൂരിൽ ബിജിടി പരിശീലന മത്സരത്തിനിടയിലാണ് ഞാൻ ധോണിയെ ആദ്യമായി കാണുന്നത്.
അന്ന് സഹീർ ഖാന്റെ ഒരു ബൗൺസറിൽ ധോണി പെട്ടെന്ന് പുറത്തായി. അത് കണ്ടപ്പോൾ അന്താരാഷ്ട്ര ക്രിക്കറ്റ് തികച്ചും വ്യത്യസ്തമാണെന്നും ആളുകൾ വെറുതെ അദ്ദേഹത്തിന് അമിത ഹൈപ്പ് നൽകുകയാണെന്നുമാണ് ഞാൻ കരുതിയത്.” എന്ന് പാർത്ഥിവ് പട്ടേൽ
സിക്‌സറുകളുടെ മഴയും കാഴ്ചപ്പാട് മാറിയതും:
എന്നാൽ മാസങ്ങൾക്ക് ശേഷം ദിയോധർ ട്രോഫിയിലും ചലഞ്ചർ ട്രോഫിയിലും ധോണിയുടെ ബാറ്റിംഗ് കണ്ടതോടെ തന്റെ ധാരണ പൂർണ്ണമായും മാറിയെന്ന് പാർത്ഥിവ് കൂട്ടിച്ചേർത്തു.
“ആ സംഭവത്തിന് 6-7 മാസങ്ങൾക്ക് ശേഷം വാങ്കഡെയിൽ നടന്ന ദിയോധർ ട്രോഫി മത്സരത്തിൽ ചുവന്ന പന്തിൽ ധോണി 5-6 സിക്‌സറുകളാണ് പറത്തിയത്. വെറും 50-60 പന്തുകളിൽ നിന്ന് സെഞ്ചുറിയും നേടി. ചലഞ്ചർ ട്രോഫിയിലും അദ്ദേഹം അത് ആവർത്തിച്ചു.”
“എന്റെ കരിയർ പോയതിന് കാരണം ധോണിയല്ല”:
2006-ൽ പാകിസ്ഥാനെതിരായ ഫൈസലാബാദ് ടെസ്റ്റിൽ ധോണി 148 റൺസ് നേടിയതോടെ, ഇന്ത്യയുടെ പ്രധാന വിക്കറ്റ് കീപ്പറായി തനിക്ക് തിരിച്ചെത്തുക പ്രയാസമാണെന്ന് മനസ്സിലായതായി പാർത്ഥിവ് സമ്മതിച്ചു.
എങ്കിലും തന്റെ കരിയർ മങ്ങിയതിന് കാരണം ധോണിയല്ലെന്നും പാർത്ഥിവ് വ്യക്തമാക്കി.
“2005-06 കാലഘട്ടത്തിൽ പാകിസ്ഥാനെതിരെ ധോണി മികച്ച സെഞ്ചുറി നേടുകയും ഏകദിനങ്ങളിൽ തകർപ്പൻ പ്രകടനം പുറത്തെടുക്കുകയും ചെയ്തതോടെ ഇന്ത്യയുടെ ഒന്നാം നമ്പർ വിക്കറ്റ് കീപ്പറാകാനുള്ള എന്റെ അവസരം മങ്ങിയെന്ന് എനിക്കറിയാമായിരുന്നു.
എന്നാൽ ഞാൻ തെറ്റായ സമയത്താണ് ജനിച്ചതെന്നോ ധോണി കാരണമാണ് ടീമിൽ നിന്ന് പുറത്തായതെന്നോ ഞാൻ കരുതുന്നില്ല. എന്റെ പ്രകടനം താഴേക്ക് പോയതുകൊണ്ടാണ് എനിക്ക് സ്ഥാനം നഷ്ടമായത്, തുടർന്നാണ് ധോണിക്ക് ആ അവസരം ലഭിച്ചത്.”
2002-ൽ ഇംഗ്ലണ്ടിനെതിരെ നോട്ടിംഗ്ഹാമിൽ നടന്ന് ടെസ്റ്റ് മത്സരത്തിലൂടെയാണ് പാർത്ഥിവ് പട്ടേൽ ഇന്ത്യയ്ക്കായി അന്താരാഷ്ട്ര അരങ്ങേറ്റം കുറിക്കുന്നത്. 2003-ൽ ഏകദിന അരങ്ങേറ്റവും കുറിച്ചു.
എന്നാൽ എം.എസ്. ധോണിയുടെ വരവോടെ പാർത്ഥിവിനും ദിനേശ് കാർത്തിക്കിനും ടീമിൽ തുടർച്ചയായ അവസരങ്ങൾ നഷ്ടമാവുകയായിരുന്നു.
