ലിസ്ബൺ: ക്ലബ്ബ്-അന്താരാഷ്ട്ര ഫുട്ബോളിലായി 1,000 ഗോളുകൾ എന്ന ചരിത്രനേട്ടം തികയ്ക്കാനുള്ള ശ്രമത്തിനിടെ ക്രിസ്റ്റ്യാനോ റൊണാൾഡോ സ്വാർത്ഥനായി പെരുമാറുകയാണെന്ന് പോർച്ചുഗീസ് ഫുട്ബോൾ ഇതിഹാസം അന്റോണിയോ സിമോസ്.
41-കാരനായ റൊണാൾഡോ വ്യക്തിപരമായ നേട്ടങ്ങൾക്ക് മാത്രം മുൻഗണന നൽകുന്നത് ടീമിന് ഗുണം ചെയ്യില്ലെന്നും, അവസരം ലഭിച്ചാൽ 49 വയസ്സ് വരെ ദേശീയ ടീമിനായി കളിക്കാൻ റൊണാൾഡോ മടിക്കില്ലെന്നും സിമോസ് പരിഹസിച്ചു.
കരിയറിൽ 1,000 ഗോളുകൾ തികയ്ക്കാൻ റൊണാൾഡോയ്ക്ക് ഇനി 21 ഗോളുകൾ കൂടി മാത്രമാണ് വേണ്ടത്. എന്നാൽ, ഈ സീസണിൽ ക്ലബ്ബിനും രാജ്യത്തിനുമായി എട്ട് മത്സരങ്ങളിൽ നിന്ന് മൂന്ന് ഗോളുകൾ മാത്രമാണ് താരത്തിന് നേടാനായത്.
കഴിഞ്ഞ മാസം ലിസ്ബണിൽ നടന്ന യുവേഫ നേഷൻസ് ലീഗ് പോരാട്ടത്തിൽ വെയിൽസിനെതിരെയുള്ള 1-0 ന്റെ വിജയത്തിൽ പോർച്ചുഗലിനായി നേടിയ വിജയഗോളും ഇതിൽ ഉൾപ്പെടുന്നു.
1966-ലെ ലോകകപ്പിൽ മൂന്നാം സ്ഥാനം നേടിയ വിഖ്യാത പോർച്ചുഗൽ ടീമിലെ പ്രമുഖ താരമായിരുന്ന സിമോസ്, മാധ്യമമായ ‘എ ബോല’യോടാണ് (A Bola) റൊണാൾഡോയുടെ നിലപാടിനെ വിമർശിച്ചത്.
“ചില സമയങ്ങളിൽ അവൻ തന്നെക്കുറിച്ച് മാത്രമേ ചിന്തിക്കുന്നുള്ളൂ എന്ന് തോന്നിപ്പോകും. ഇത്രയും മികച്ചൊരു കരിയറുള്ള, പക്വതയുള്ള ഒരു മനുഷ്യൻ സ്വാർത്ഥതയ്ക്ക് അപ്പുറത്തേക്ക് ചിന്തിക്കാൻ പഠിക്കേണ്ടതുണ്ട്.
ഫുട്ബോൾ എന്നത് ഗോളുകൾ നേടുന്നത് മാത്രം അടിസ്ഥാനമാക്കിയുള്ള ഒന്നല്ല, അത് കളി രീതിയെക്കൂടി ആശ്രയിച്ചിരിക്കുന്ന ഒന്നാണ്. ഈ തിരിച്ചറിവ് അവന്റെ ഭാഗത്തുനിന്ന് ഉണ്ടാകേണ്ടതുണ്ട്.”
റൊണാൾഡോയുടെ വിരമിക്കലില്ലാത്ത നിലപാടിനെ പരിഹസിച്ചുകൊണ്ട് സിമോസ് കൂട്ടിച്ചേർത്തു:
“1,000 ഗോളുകൾ തികച്ച ശേഷവും, അവസരം നൽകിയാൽ 49 വയസ്സ് വരെ അവൻ ദേശീയ ടീമിനായി കളിക്കുന്നത് തുടരും. 41 വയസ്സ് തികയുമ്പോൾ, മത്സരത്തിന്റെ നിർണ്ണായകമായ ഏതെങ്കിലും ഘട്ടത്തിൽ മാത്രം ടീമിന് ഉപകരിക്കപ്പെടുന്ന കളിക്കാരനായി മാറുക എന്നതാണ് പക്വത.
വലിപ്പമേറിയ പേരും പ്രശസ്തിയും കാരണം ബെഞ്ചിൽ നിന്ന് ഇറങ്ങിയാലും കളിയിൽ വലിയ സ്വാധീനം ചെലുത്താൻ അദ്ദേഹത്തിന് സാധിക്കും.”
2003-ൽ പോർച്ചുഗലിനായി അരങ്ങേറ്റം കുറിച്ച ക്രിസ്റ്റ്യാനോ റൊണാൾഡോ ഇതുവരെ 234 മത്സരങ്ങളിൽ നിന്ന് 146 ഗോളുകൾ നേടി ലോക റെക്കോർഡോടെ മുന്നേറുകയാണ്.
