തിരുവനന്തപുരം: മലയാളി ക്രിക്കറ്റ് താരം സഞ്ജു സാംസണ് ഇന്ന് 32-ാം പിറന്നാൾ. കേരളത്തിന്റെ അഭിമാനതാരത്തിന് കായികലോകവും ആരാധകരും ഇതിനോടകം തന്നെ ഉന്മേഷഭരിതമായ പിറന്നാൾ ആശംസകൾ നേർന്നുകഴിഞ്ഞു. ഇന്ത്യൻ ടീമിൽ സ്വന്തമായൊരു മേൽവിലാസം പടുത്തുയർത്തിയ സഞ്ജു, കളത്തിലും പുറത്തും ആരാധകരുടെ പ്രിയപ്പെട്ട ‘ചേട്ടനായി’ എന്നും നിറസാന്നിധ്യമാണ്.
2015 ജൂലൈയിലാണ് സഞ്ജു സാംസൺ ആദ്യമായി ഇന്ത്യൻ നീലക്കുപ്പായമണിയുന്നത്. സിംബാബ്വെയ്ക്കെതിരായ ട്വന്റി20 മത്സരത്തിലൂടെയായിരുന്നു രാജ്യാന്തര അരങ്ങേറ്റം.
ആ മത്സരത്തിൽ 24 പന്തിൽ 19 റൺസെടുത്ത് ഇരുപതുകാരനായ സഞ്ജു മടങ്ങിയെങ്കിലും, പിന്നീട് നീണ്ട കരിയറിൽ അവസരങ്ങൾ പലപ്പോഴും വെല്ലുവിളിയായി മുന്നിലെത്തി. എന്നാൽ, കഠിനാധ്വാനത്തിലൂടെയും തകർപ്പൻ പ്രകടനങ്ങളിലൂടെയും താരം തിരിച്ചുവന്നു.
കഴിഞ്ഞ ടി20 ലോകകപ്പിലെ മികച്ച പ്രകടനങ്ങളോടെ ഇന്ത്യൻ ടീമിൽ ഒഴിവാക്കാനാവാത്ത സാന്നിധ്യമായി സഞ്ജു മാറി.
അന്താരാഷ്ട്ര ക്രിക്കറ്റിൽ തിരക്കുകൾക്കിടയിലും താൻ വളർന്നുവന്ന കേരള ക്രിക്കറ്റിനെയും യുവപ്രതിഭകളെയും സഞ്ജു മറന്നില്ല. ‘സഞ്ജു സാംസൺ ഫൗണ്ടേഷൻ’ വഴി നിരവധി കായികതാരങ്ങൾക്ക് താരം താങ്ങായി നിൽക്കുന്നുണ്ട്.
ഇക്കഴിഞ്ഞ സംസ്ഥാന സ്കൂൾ കായികമേളയിൽ സീനിയർ ആൺകുട്ടികളുടെ 100 മീറ്റർ ഓട്ടത്തിൽ റെക്കോഡ് നേട്ടം സ്വന്തമാക്കിയ ആലപ്പുഴ ചാരമംഗലം ഗവ. ഡിവിഎച്ച്എസ്എസ് പ്ലസ് വൺ വിദ്യാർഥി ടി.എം. അതുലിന് എല്ലാവിധ പിന്തുണയും സ്പോൺസർഷിപ്പും നൽകി മാതൃകയായിരിക്കുകയാണ് സഞ്ജു.
അന്താരാഷ്ട്ര വേദികളിൽ തിളങ്ങിനിൽക്കുമ്പോഴും കേരള ടീമിനൊപ്പമുള്ള തന്റെ കടമകൾ സഞ്ജു ഒരിക്കലും മറന്നിട്ടില്ല. പിറന്നാളിന്റെ തലേദിവസമാണ് കേരള ടീമിന്റെ നായകനായി സഞ്ജു വീണ്ടും തിരഞ്ഞെടുക്കപ്പെട്ടത്.
സയ്യിദ് മുഷ്താഖ് അലി ട്രോഫിക്കുള്ള 18 അംഗ കേരള ടീമിനെയാണ് താരം നയിക്കുന്നത്. നവംബർ 14 മുതൽ 26 വരെ പഞ്ചാബിലാണ് ടൂർണമെന്റ് മത്സരങ്ങൾ നടക്കുന്നത്. മധ്യപ്രദേശ്, മഹാരാഷ്ട്ര, ആന്ധ്ര, ത്രിപുര, പോണ്ടിച്ചേരി, അസം, ഹിമാചൽ പ്രദേശ് എന്നീ ടീമുകൾ ഉൾപ്പെടുന്ന ഗ്രൂപ്പ് സിയിലാണ് കേരളത്തിന്റെ സ്ഥാനം.
തിങ്കളാഴ്ച മധ്യപ്രദേശിനെതിരെയാണ് കേരളത്തിന്റെ ആദ്യ മത്സരം. പിറന്നാൾ ദിനത്തിലെ ഈ ഇരട്ടി മധുരം ആരാധകർക്കും വലിയ ആവേശമാണ് സമ്മാനിച്ചിരിക്കുന്നത്.
