ഫുട്ബോൾ കളിക്കളത്തിൽ മാത്രമല്ല, ആഡംബര വസ്തുക്കളുടെ ഉപയോഗത്തിലും തന്റേതായ ശൈലി സൂക്ഷിക്കുന്ന താരമാണ് ക്രിസ്റ്റ്യാനോ റൊണാൾഡോ.
ലോകത്ത് മറ്റാർക്കുമില്ലാത്തത്രയും അപൂർവ്വവും വിലമതിക്കാനാവാത്തതുമായ വാച്ച് ശേഖരത്തിന് ഉടമയാണ് സിആർ സെവൻ.
സാധാരണക്കാർക്ക് ചിന്തിക്കാനാവാത്തത്ര ഉയർന്ന വിലയുള്ള എക്സ്‌ക്ലൂസീവ് വാച്ചുകൾ സ്വന്തമാക്കാൻ റൊണാൾഡോ ഒരിക്കലും മടിക്കാറില്ല. തന്റെ ഇഷ്ടങ്ങൾക്കനുസരിച്ച് വാച്ചുകൾ കസ്റ്റമൈസ് ചെയ്ത് ധരിക്കുന്നതാണ് അദ്ദേഹത്തിന്റെ മറ്റൊരു പ്രത്യേകത.
പ്രിയപ്പെട്ട ബ്രാൻഡുകളും കാർട്ടിയർ സാന്റോസും
ലോകപ്രശസ്ത വാച്ച് നിർമ്മാതാക്കളായ ജേക്കബ് ആൻഡ് കോ (Jacob & Co), ഹ്യൂബ്ലോട്ട് (Hublot), പാടെക് ഫിലിപ്പ് (Patek Philippe) തുടങ്ങിയ ആഡംബര ബ്രാൻഡുകളാണ് റൊണാൾഡോയുടെ ശേഖരത്തിലുള്ളത്.
ഇതിനുപുറമെ അപൂർവ്വമായി ചില റോളക്സ് വാച്ചുകളും അതിൻ്റെ ലളിതമായ മോഡലുകളും അദ്ദേഹം ധരിക്കാറുണ്ട്. അടുത്തിടെ അദ്ദേഹം ധരിച്ച ‘കാർട്ടിയർ സാന്റോസ്’ (Cartier Santos) വാച്ച് വലിയ രീതിയിൽ ശ്രദ്ധിക്കപ്പെട്ടിരുന്നു.
ചരിത്രപ്രസിദ്ധമായ കാർട്ടിയർ ടാങ്കിന്റെ അത്രയും ജനപ്രീതി ഇല്ലെങ്കിലും, ബ്രാൻഡിന്റെ ഏറ്റവും ഐക്കണിക് മോഡലുകളിൽ ഒന്നാണ് സാന്റോസ്.
ഇരുപതാം നൂറ്റാണ്ടിന്റെ തുടക്കത്തിൽ ലൂയിസ് കാർട്ടിയർ, പൈലറ്റ് ആൽബെർട്ടോ സാന്റോസ്-ഡുമോണ്ടിനായി നിർമ്മിച്ച ഈ വാച്ച് ആധുനിക റിസ്റ്റ് വാച്ചുകളുടെ ചരിത്രത്തിലെ ഒരു നാഴികക്കല്ലാണിത്.
ചതുരാകൃതിയിലുള്ള കേസ്, അതിലെ ദൃശ്യമായ സ്ക്രൂകൾ, റോമൻ അക്കങ്ങൾ എന്നിവ ഈ വാച്ചുകളെ മറ്റ് വൃത്താകൃതിയിലുള്ള വാച്ചുകളിൽ നിന്ന് തികച്ചും വ്യത്യസ്തമാക്കുന്നു.
കസ്റ്റമൈസ്ഡ് കാർട്ടിയർ സാന്റോസ് 100 XL ക്രോണോഗ്രാഫ്
എന്നാൽ റൊണാൾഡോ എപ്പോഴും മറ്റുള്ളവരിൽ നിന്ന് വ്യത്യസ്തനാകാനാണ് ഇഷ്ടപ്പെടുന്നത്. 2004-ൽ യഥാർത്ഥ സാന്റോസിന്റെ ശതാബ്ദി ആഘോഷിക്കാൻ പുറത്തിറക്കിയ ‘കാർട്ടിയർ സാന്റോസ് 100 XL ക്രോണോഗ്രാഫ്’ ആണ് അദ്ദേഹം സ്വന്തമാക്കിയിരിക്കുന്നത്.
വലുതും കട്ടിയുള്ളതുമായ ഈ വാച്ച് ‘ടൈം 4 ഡയമണ്ട്സ്’ (Time 4 Diamonds) എന്ന കമ്പനിയെക്കൊണ്ട് പൂർണ്ണമായും കസ്റ്റമൈസ് ചെയ്യിച്ചെടുത്തതാണ്. വാച്ചിന്റെ കേസ്, ബെസെൽ, ക്ലാസ്പ് എന്നിവ പൂർണ്ണമായും തിളങ്ങുന്ന വജ്രങ്ങൾ കൊണ്ട് പൊതിഞ്ഞിരിക്കുന്നു.
ക്ലാസിക് കറുത്ത ലെതർ സ്ട്രാപ്പിന് പകരം കടും ചുവപ്പ് നിറത്തിലുള്ള അലിഗേറ്റർ (Alligator) സ്ട്രാപ്പിലാണ് അദ്ദേഹം ഇത് ധരിക്കുന്നത്. ഇതൊരു കസ്റ്റം പീസ് ആയതിനാൽ കൃത്യമായ വില പുറത്തുവിട്ടിട്ടില്ലെങ്കിലും, ഇതിന്റെ മൂല്യം കോടികൾ കടക്കുമെന്നാണ് കണക്കാക്കുന്നത്.
റൊണാൾഡോയുടെ ശേഖരത്തിലെ ഏറ്റവും വിലയേറിയ വാച്ച് ഇതായിരിക്കില്ലെങ്കിലും, ഏറ്റവും സവിശേഷമായ ഒന്നാണ് ഈ ഡയമണ്ട് കാർട്ടിയർ വാച്ച്.
