ലിസ്ബൺ: പോർച്ചുഗൽ ദേശീയ ടീം ക്യാമ്പിൽ നിന്ന് ക്രിസ്റ്റ്യാനോ റൊണാൾഡോ അപ്രതീക്ഷിതമായി പുറത്തുപോയ സംഭവത്തിൽ പ്രതികരണവുമായി സഹതാരം ബ്രൂണോ ഫെർണാണ്ടസ് രംഗത്ത്.
പരിശീലകൻ ജോർജ് ജീസസുമായുള്ള അഭിപ്രായവ്യത്യാസങ്ങളെത്തുടർന്ന് താരം ടീം വിട്ടതിന് പിന്നാലെയാണ് മാഞ്ചസ്റ്റർ യുണൈറ്റഡ് മിഡ്ഫീൽഡർ കൂടിയായ ബ്രൂണോ നിലപാട് വ്യക്തമാക്കിയത്.
യുവേഫ നേഷൻസ് ലീഗിൽ നോർവേയ്‌ക്കെതിരായ മത്സരത്തിൽ 41 കാരനായ ക്രിസ്റ്റ്യാനോ റൊണാൾഡോയെ പകരക്കാരനായി പോലും ഇറക്കാതിരുന്ന കോച്ച് ജോർജ് ജീസസിന്റെ നടപടി വൻ വിവാദങ്ങൾക്ക് വഴിവെച്ചിരുന്നു.
പരിശീലകൻ തന്നെ വഞ്ചിച്ചതായി റൊണാൾഡോയ്ക്ക് തോന്നിയതായും, തുടർന്ന് കോച്ചും ഫുട്ബോൾ ഫെഡറേഷൻ പ്രസിഡന്റും മാപ്പ് പറയാമെന്ന് സമ്മതിച്ചെങ്കിലും പിന്നീട് വാക്കുകളിൽ നിന്ന് പിന്മാറിയത് റൊണാൾഡോയെ പ്രകോപിപ്പിച്ചതായും സ്പാനിഷ് മാധ്യമങ്ങൾ റിപ്പോർട്ട് ചെയ്തിരുന്നു.
തന്റെ തീരുമാനത്തിന് പിന്നിലെ സത്യം ഉചിതമായ സമയത്ത് പൊതുജനങ്ങൾക്ക് മുന്നിൽ വ്യക്തമാക്കുമെന്ന് റൊണാൾഡോയും അറിയിച്ചിരുന്നു.
റൊണാൾഡോയുടെ അഭാവത്തിൽ ക്യാപ്റ്റന്റെ ചുമതലയേറ്റെടുത്ത ബ്രൂണോ ഫെർണാണ്ടസിന്റെ നേതൃത്വത്തിൽ ഡെൻമാർക്കിനെതിരായ മത്സരത്തിൽ പോർച്ചുഗൽ 4-2 എന്ന സ്കോറിന് ആവേശകരമായ വിജയം സ്വന്തമാക്കുകയും ചെയ്തു.
മത്സരത്തിന് മുന്നോടിയായി റൊണാൾഡോയുമായി നടത്തിയ സംഭാഷണത്തെക്കുറിച്ച് ബ്രൂണോ മാധ്യമങ്ങളോട് സംസാരിച്ചു.
റൊണാൾഡോയോട് താൻ സംസാരിച്ചിരുന്നുവെന്നും, അദ്ദേഹം രാജ്യത്തിന്റെ ഏറ്റവും വലിയ ഫുട്ബോൾ ഐക്കൺ തന്നെയാണെന്ന് ബ്രൂണോ വ്യക്തമാക്കി.
ദേശീയ ടീമിൽ യാതൊരുവിധ ഭിന്നതകളുമില്ലെന്നും ടീം ഒറ്റക്കെട്ടാണെന്നും അദ്ദേഹം കൂട്ടിച്ചേർത്തു.
ബ്രൂണോ ഫെർണാണ്ടസ് പറഞ്ഞത്:
“ഞാൻ ക്രിസ്റ്റ്യാനോ റൊണാൾഡോയുമായി സംസാരിച്ചു. അദ്ദേഹം നമ്മുടെ ദേശീയ ടീമിന്റെയും രാജ്യത്തിന്റെയും എക്കാലത്തെയും മികച്ച ഐക്കൺ ആണെന്ന് ഞാൻ അദ്ദേഹത്തോട് പറഞ്ഞു.
നമ്മുടെ ദേശീയ ടീം ഒരിക്കലും വിഭജിക്കപ്പെട്ടിട്ടില്ല, മറിച്ച് ഒറ്റക്കെട്ടായാണ് നിൽക്കുന്നത്. ഇത്തരം കാര്യങ്ങൾ ആന്തരികമായി പരിഹരിക്കപ്പെടേണ്ടതാണ്, അത് ഇരു കക്ഷികൾക്കും ഗുണകരമാകുന്ന രീതിയിൽ ഒത്തുതീർപ്പാകുമെന്നാണ് കരുതുന്നത്.”
നിലവിലുള്ള അന്താരാഷ്ട്ര ഇടവേളയിൽ കളിച്ച മൂന്ന് മത്സരങ്ങളിലും വിജയം സ്വന്തമാക്കിയ പോർച്ചുഗൽ ടീം, വരും മത്സരങ്ങൾക്കായുള്ള തയ്യാറെടുപ്പിലാണ്.
