ലിസ്ബൺ: പോർച്ചുഗൽ ദേശീയ ടീം പരിശീലകൻ ജോർജ് ജീസസിനെതിരെ ക്രിസ്റ്റ്യാനോ റൊണാൾഡോയുടെ പങ്കാളി ജോർജിന റോഡ്രിഗസ് കടുത്ത അധിക്ഷേപം നടത്തിയെന്ന രീതിയിൽ സമൂഹമാധ്യമങ്ങളിൽ പ്രചരിച്ച വാർത്തകൾ വ്യാജമെന്ന് റിപ്പോർട്ട്.
ജോർജ് ജീസസുമായുള്ള അഭിപ്രായവ്യത്യാസങ്ങളെ തുടർന്ന് റൊണാൾഡോ പോർച്ചുഗൽ ക്യാമ്പ് വിട്ടതിന് പിന്നാലെയായിരുന്നു ഈ വിവാദങ്ങൾ.
യുവേഫ നേഷൻസ് ലീഗിൽ നോർവേയ്‌ക്കെതിരായ മത്സരത്തിൽ 41 കാരനായ ക്രിസ്റ്റ്യാനോ റൊണാൾഡോയെ പകരക്കാരനായി പോലും ഇറക്കാതിരുന്ന പരിശീലകൻ ജോർജ് ജീസസിന്റെ നടപടി വൻ ചർച്ചയായിരുന്നു.
ഇതിനുപിന്നാലെ റൊണാൾഡോ ടീം ക്യാമ്പ് വിട്ട് മാഡ്രിഡിലേക്ക് മടങ്ങുകയും ചെയ്തിരുന്നു. ഈ സംഭവവികാസങ്ങൾക്കിടയിലാണ് ജോർജിനയുടെ ഇൻസ്റ്റാഗ്രാം സ്റ്റോറി എന്ന രീതിയിൽ ചില വ്യാജ പോസ്റ്റുകൾ പ്രചരിച്ചത്.
സർ അലക്സ് ഫെർഗൂസന്റെ പേരിൽ പ്രചരിച്ച വ്യാജ വരികൾ ഉദ്ധരിച്ച്, ജോർജ് ജീസസിന് തന്നെ കളിപ്പിക്കാൻ ഉദ്ദേശ്യമില്ലായിരുന്നെങ്കിൽ എന്തിനാണ് ആദ്യം ടീമിലേക്ക് വിളിച്ചതെന്നും ഇത് അധികാരമല്ല, അരക്ഷിതാവസ്ഥയാണെന്നും ജോർജിന വിമർശിച്ചെന്നുമായിരുന്നു പ്രചാരണം.
കൂടാതെ “ഈ മനുഷ്യന് ക്രിസ്തുവിന്റെ നാമം എങ്ങനെ വഹിക്കാൻ കഴിയുമെന്ന് എനിക്കറിയില്ല” എന്ന് ജോർജിന കുറിച്ചതായും, പോസ്റ്റ് ചെയ്ത് മിനിറ്റുകൾക്കകം ഇത് ഡിലീറ്റ് ചെയ്തതായും വാർത്തകൾ വന്നിരുന്നു.
എന്നാൽ ഈ സോഷ്യൽ മീഡിയ സ്റ്റോറികളും പ്രചരിച്ച പരാമർശങ്ങളും യാതൊരുവിധ ഔദ്യോഗിക അടിസ്ഥാനവുമില്ലാത്തതും വ്യാജമായി നിർമ്മിക്കപ്പെട്ടതുമാണെന്ന് പ്രമുഖ സ്പോർട്സ് മാധ്യമങ്ങൾ വ്യക്തമാക്കി.
റൊണാൾഡോ ക്യാമ്പ് വിട്ടയുടൻ താരം സമൂഹമാധ്യമങ്ങളിലൂടെ തനിക്ക് പിന്തുണ അറിയിച്ച ആരാധകർക്കും സഹതാരങ്ങൾക്കും നന്ദി അറിയിക്കുകയും, സംഭവത്തിലെ യഥാർത്ഥ സത്യം ഉചിതമായ സമയത്ത് തുറന്നുപറയുമെന്ന് വ്യക്തമാക്കുകയും ചെയ്തിരുന്നു.
