ഇന്ത്യ-വെസ്റ്റ് ഇൻഡീസ് ടി-20 പരമ്പരയിലെ നിർണായകമായ നാലാം മത്സരത്തിന് ഹൈദരാബാദ് വേദിയാകുന്നു. നിലവിൽ ആദ്യ മൂന്ന് മത്സരങ്ങൾ അവസാനിച്ചപ്പോൾ 2-1ന് മുന്നിലുള്ള ഇന്ത്യ, ഇന്നത്തെ മത്സരം വിജയിച്ച് പരമ്പര സ്വന്തമാക്കാനുള്ള ലക്ഷ്യത്തിലാണ്.
മറുഭാഗത്ത്, പരമ്പര കൈവിടാതിരിക്കാൻ സന്ദർശകരായ വിൻഡീസിനും വിജയം അനിവാര്യമാണ്.
ചരിത്ര നേട്ടത്തിൽ ചേട്ടൻ
ഈ മത്സരത്തിൽ ആരാധകർ ഏറെ പ്രതീക്ഷയോടെ ഉറ്റുനോക്കുന്നത് മലയാളി സൂപ്പർ താരം സഞ്ജു സാംസണിന്റെ വെടിക്കെട്ട് ബാറ്റിംഗിനാണ്. മത്സരത്തിൽ മികച്ച പ്രകടനം പുറത്തെടുക്കുന്നതിനൊപ്പം ഒരു ചരിത്രനേട്ടവും സഞ്ജുവിന് സ്വന്തമാക്കാൻ സാധിക്കും.
അന്താരാഷ്ട്ര ടി-20 ക്രിക്കറ്റിൽ ഇന്ത്യയ്ക്കുവേണ്ടി 100 സിക്സുകൾ പൂർത്തിയാക്കാൻ സഞ്ജുവിന് ഇനി വെറും രണ്ട് സിക്സുകൾ കൂടിമതി.
ആറാം തമ്പുരാൻ
ഇന്ന് രണ്ട് സിക്സുകൾ കൂടി നേടാനായാൽ, ഇന്ത്യയ്ക്കായി ഈ നേട്ടം കൈവരിക്കുന്ന ആറാമത്തെ താരമെന്ന റെക്കോർഡ് സഞ്ജു സ്വന്തം പേരിലെഴുതും.
രോഹിത് ശർമ, സൂര്യകുമാർ യാദവ്, വിരാട് കോഹ്‌ലി, ഹർദിക് പാണ്ഡ്യ, അഭിഷേക് ശർമ എന്നിവരാണ് ഇതിനുമുമ്പ് ടി-20യിൽ ഇന്ത്യയ്ക്കായി സിക്സറുകളുടെ സെഞ്ചുറി തികച്ചിട്ടുള്ളത്.
ഹൈദരാബാദിലെ വീണ്ടും വിളിക്കുന്നു
ഹൈദരാബാദിൽ ഇന്ത്യ അവസാനമായി കളിച്ച ട്വന്റി20 മത്സരം മികച്ച ഓർമ്മകൾ സമ്മാനിക്കുന്നതാണ്.
2024ൽ ബംഗ്ലദേശിനെതിരെ നടന്ന ആ മത്സരത്തിൽ 6 വിക്കറ്റ് നഷ്ടത്തിൽ 297 റൺസ് അടിച്ചുകൂട്ടിയ ഇന്ത്യ 133 റൺസിന്റെ കൂറ്റൻ വിജയമാണ് സ്വന്തമാക്കിയത്.
അന്ന് 47 പന്തിൽ 111 റൺസ് വാരിക്കൂട്ടിയ സഞ്ജു സാംസണിന്റെ വെടിക്കെട്ട് സെഞ്ചുറിയും ആരാധകരുടെ മനസ്സിലുണ്ട്. സമാനമായ ഒരു പ്രകടനം ഇന്നും ആവർത്തിക്കുമെന്ന പ്രതീക്ഷയിലാണ് ഹൈദരാബാദിലെ ക്രിക്കറ്റ് പ്രേമികൾ.
പരമ്പരയിലെ ആദ്യ മത്സരത്തിൽ 11 റൺസിന് പുറത്തായെങ്കിലും, രണ്ടാം മത്സരത്തിൽ 41 പന്തിൽ 82 റൺസ് നേടി സഞ്ജു തകർപ്പൻ തിരിച്ചുവരവ് നടത്തിയിരുന്നു.
മൂന്നാം മത്സരത്തിൽ മൂന്ന് റൺസ് മാത്രമാണ് നേടാനായതെങ്കിലും, ഹൈദരാബാദിൽ സഞ്ജു തന്റെ പഴയ പ്രതാപത്തിലേക്ക് തിരികെവരുമെന്നാണ് ആരാധകരുടെ വിശ്വാസം.
വിൻഡീസിനെതിരായ പരമ്പരയ്ക്ക് മുമ്പ് അഫ്ഗാനിസ്ഥാനെതിരായ ടി-20 പരമ്പരയിലും രണ്ട് അർധസെഞ്ചുറികളോടെ സഞ്ജു തകർപ്പൻ ഫോം പുറത്തെടുത്തിരുന്നു.
അതേസമയം, ആവേശകരമായി മാറിയ മൂന്നാം ടി-20 മത്സരത്തിൽ 14 റൺസിനാണ് ഇന്ത്യ വിജയം കണ്ടത്. ഇന്ത്യ ഉയർത്തിയ 224 റൺസിന്റെ വലിയ വിജയലക്ഷ്യം പിന്തുടർന്നിറങ്ങിയ വിൻഡീസിന് നിശ്ചിത ഓവറിൽ 7 വിക്കറ്റ് നഷ്ടത്തിൽ 209 റൺസ് നേടാനേ സാധിച്ചുള്ളൂ.
ഹൈദരാബാദിലും സമാനമായ ആക്രമണോത്സുക ബാറ്റിംഗ് ആവർത്തിക്കാനാണ് ശ്രേയസ് അയ്യരുടെയും സംഘത്തിന്റെയും ശ്രമം.
