ഐച്ചി-നഗോയ: ജപ്പാനിലെ ഐച്ചി-നഗോയയിൽ നടന്നുക്കൊണ്ടിരിക്കുന്ന ഏഷ്യൻ പാരാ ഗെയിംസ് 2026-ൽ പുരുഷന്മാരുടെ 100 മീറ്റർ ടി47 വിഭാഗത്തിൽ വെള്ളിമെഡൽ നേടി ഇന്ത്യയുടെ അഭിമാനമായി മാറിയിരിക്കുകയാണ് മലയാളി താരം മുഹമ്മദ് ബാസിൽ.
തിരുവനന്തപുരം സായ് നാഷണൽ സെന്റർ ഓഫ് എക്സലൻസിലെ (SAI NCOE) താരമായ ബാസിൽ 10.72 സെക്കൻഡിൽ ഫിനിഷ് ചെയ്താണ് ഈ അഭിമാനകരമായ നേട്ടം സ്വന്തമാക്കിയത്.
മത്സരത്തിൽ ഇന്ത്യക്ക് ഇരട്ട നേട്ട സമ്മാനിച്ചുകൊണ്ട് സഹതാരം ദിലീപ് ഗവിത് മഹാദു 10.69 സെക്കൻഡിൽ ഫിനിഷ് ചെയ്ത് സ്വർണമെഡൽ കരസ്ഥമാക്കി. ഇരുവരുടെയും തകർപ്പൻ പ്രകടനത്തിലൂടെ ഇന്ത്യയ്ക്ക് ഒരേയിനത്തിൽ സ്വർണവും വെള്ളിയും സ്വന്തമാക്കാൻ സാധിച്ചു.
ഗെയിംസ് റെക്കോർഡ് തിളക്കത്തിൽ ബാസിൽ
ടി47 വിഭാഗത്തിൽ 10.72 സെക്കൻഡിൽ ഫിനിഷ് ചെയ്ത ബാസിലിന്റെ പ്രകടനം പുതിയൊരു ഗെയിംസ് റെക്കോർഡായാണ് രേഖപ്പെടുത്തപ്പെട്ടിരിക്കുന്നത്.
മത്സരത്തിന്റെ ഹീറ്റ്സിൽ 10.79 സെക്കൻഡിൽ ഫിനിഷ് ചെയ്ത് താരം നേരത്തെ തന്നെ തന്റെ മികച്ച ഫോം തെളിയിച്ചിരുന്നു.
കഠിനാധ്വാനത്തിന്റെയും അർപ്പണബോധത്തിന്റെയും ശാസ്ത്രീയ പരിശീലനത്തിന്റെയും വിജയമാണ് ബാസിലിന്റെ ഈ ചരിത്രനേട്ടം.
അന്താരാഷ്ട്ര കായികവേദിയിൽ ഇന്ത്യൻ പാരാ അത്‌ലറ്റുകളുടെ വളർന്നുവരുന്ന മികവിന്റെ മറ്റൊരു തെളിവുകൂടിയാണിത്.
ഫുട്ബോളിൽ നിന്ന് ട്രാക്കിലേക്ക്; ബാസിലിന്റെ കായിക യാത്ര
കേരളത്തിൽ മലപ്പുറം ജില്ലയിലെ പൊന്നാനിക്ക് സമീപമുള്ള പള്ളപ്രം സ്വദേശിയാണ് മുഹമ്മദ് ബാസിൽ. ജന്മനാ വലത് കൈ ഇല്ലാത്ത ബാസിൽ സ്കൂൾ കാലഘട്ടത്തിലാണ് തന്റെ കായിക കഴിവുകൾ തിരിച്ചറിഞ്ഞത്. തുടക്കത്തിൽ ഫുട്ബോളിൽ സജീവമായിരുന്നെങ്കിലും പിന്നീട് അത്‌ലറ്റിക്സിലേക്ക് ചുവടുമാറ്റുകയായിരുന്നു.
സ്കൂൾ തലത്തിൽ തന്നെ മികച്ച വേഗത പ്രകടിപ്പിച്ച താരം സി.ബി.എസ്.ഇ അത്ലറ്റിക്സ് മത്സരങ്ങളിൽ ശ്രദ്ധേയമായ പ്രകടനങ്ങൾ കാഴ്ചവെച്ചു. പാരാ അത്‌ലറ്റിക്സിലേക്ക് തിരിഞ്ഞതോടെ ബാസിലിന്റെ കരിയറിൽ വഴിതിരിവുണ്ടായി.
തിരുവനന്തപുരം സായ് (SAI) കേന്ദ്രത്തിലെ ഉയർന്ന നിലവാരത്തിലുള്ള പരിശീലനവും ശാസ്ത്രീയ പിന്തുണയും അദ്ദേഹത്തിന്റെ പ്രകടനം കൂടുതൽ മെച്ചപ്പെടുത്താൻ സഹായിച്ചു.
നേട്ടങ്ങളുടെ പെരുമഴ
കരിയറിൽ ഇതിനോടകം നിരവധി അന്താരാഷ്ട്ര നേട്ടങ്ങൾ സ്വന്തമാക്കിയിട്ടുള്ള താരമാണ് മുഹമ്മദ് ബാസിൽ:
2025 പാരീസ് വേൾഡ് പാരാ അത്ലറ്റിക്സ് ഗ്രാൻഡ് പ്രിക്സ്: പുരുഷന്മാരുടെ 100 മീറ്റർ T47 വിഭാഗത്തിൽ സ്വർണം.
2025 ഖേലോ ഇന്ത്യ പാരാ ഗെയിംസ്: 100 മീറ്ററിൽ സ്വർണമെഡൽ.
2026 ഗ്ലാസ്ഗോ കോമൺവെൽത്ത് ഗെയിംസ്: 10.63 സെക്കൻഡിന്റെ വ്യക്തിഗത മികച്ച സമയം കുറിച്ച് കോമൺവെൽത്ത് ഗെയിംസിൽ ഇന്ത്യയെ പ്രതിനിധീകരിച്ച താരം, 10.83 സെക്കൻഡിൽ ഫിനിഷ് ചെയ്ത് വെള്ളിമെഡലും നേടി.
അന്നത്തെ മത്സരത്തിലും ഇന്ത്യ സ്വർണവും വെള്ളിയും സ്വന്തമാക്കിയ ചരിത്ര നേട്ടത്തിന്റെ ഭാഗമായിരുന്നു ബാസിൽ.
തിരുവനന്തപുരം സായ് കേന്ദ്രത്തെ സംബന്ധിച്ചിടത്തോളം ഏറെ അഭിമാനകരമായ ഈ വിജയം, രാജ്യത്തെ വളർന്നുവരുന്ന പാരാ അത്‌ലറ്റുകൾക്ക് വലിയ പ്രചോദനമാണ്.
മികച്ച പിന്തുണയും പരിശീലനവും ലഭിച്ചാൽ അന്താരാഷ്ട്ര തലത്തിൽ കൊടുമുടി കയറാൻ ഇന്ത്യൻ താരങ്ങൾക്ക് കഴിയുമെന്നതിന്റെ ഏറ്റവും മികച്ച ഉദാഹരണമാണ് മുഹമ്മദ് ബാസിൽ.
