താരൻ പൂർണ്ണമായി ഒഴിവാക്കാൻ ഒറ്റമൂലികളൊന്നുമില്ലെങ്കിലും, നമ്മുടെ ദിനചര്യയിലും ശീലങ്ങളിലും ചില ചെറിയ മാറ്റങ്ങൾ വരുത്തുന്നതിലൂടെ ഇതിനെ ഫലപ്രദമായി പ്രതിരോധിക്കാൻ സാധിക്കും. ഇന്ന് മിക്ക ആളുകളെയും അലട്ടുന്ന ഒരു സാധാരണ പ്രശ്നമാണ് താരൻ.
തലയോട്ടിയിലെ ചർമ്മം വരണ്ടുപോകുന്നതും, അമിതമായി എണ്ണമയം ഉണ്ടാകുന്നതും, ‘മലസീസിയ’ (Malassezia) എന്ന ഫംഗസിന്റെ വളർച്ചയുമെല്ലാമാണ് താരൻ ഉണ്ടാകാനുള്ള പ്രധാന കാരണങ്ങൾ.
കാലാവസ്ഥയിലെ വ്യതിയാനങ്ങൾ, മാനസിക സമ്മർദ്ദം, മുടിയുടെ ശുചിത്വക്കുറവ് തുടങ്ങിയ കാര്യങ്ങളും പ്രശ്നം കൂടുതൽ വഷളാക്കാം.
താരൻ അകറ്റാനും തലയോട്ടി ആരോഗ്യത്തോടെ സൂക്ഷിക്കാനും ശ്രദ്ധിക്കേണ്ട പ്രധാന കാര്യങ്ങൾ താഴെ പറയുന്നവയാണ്:
- കൃത്യമായ ഇടവേളകളിൽ മുടി കഴുകുക
തലയോട്ടിയിൽ അടിഞ്ഞുകൂടുന്ന എണ്ണമയം, വിയർപ്പ്, അഴുക്ക്, ചർമ്മത്തിലെ മൃതകോശങ്ങൾ എന്നിവ താരൻ വർദ്ധിപ്പിക്കും. അതിനാൽ മുടിയുടെ സ്വഭാവത്തിനനുസരിച്ച് കൃത്യമായ ഇടവേളകളിൽ മുടി കഴുകാൻ ശ്രദ്ധിക്കുക.
എണ്ണമയമുള്ള സ്കാൽപ്പ് ഉള്ളവർ കൂടുതൽ ഇടവേളകളില്ലാതെ മുടി കഴുകുന്നത് നല്ലതാണ്. എന്നാൽ അമിതമായി മുടി കഴുകുന്നതും ശക്തമായ ഷാംപൂ ഉപയോഗിക്കുന്നതും ഒഴിവാക്കണം.
- താരനെ പ്രതിരോധിക്കുന്ന ഷാംപൂ തിരഞ്ഞെടുക്കുക
സാധാരണ ഷാംപൂകൾ ഉപയോഗിച്ചിട്ടും താരൻ കുറയുന്നില്ലെങ്കിൽ ആന്റി-ഡാൻഡ്രഫ് ഷാംപൂകളിലേക്ക് മാറാം.
കെറ്റോകോണസോൾ (Ketoconazole), സിങ്ക് പിരിത്തിയോൺ (Zinc Pyrithione), സെലീനിയം സൾഫൈഡ് (Selenium Sulfide) തുടങ്ങിയ ഘടകങ്ങൾ അടങ്ങിയ ഷാംപൂകൾ താരൻ നിയന്ത്രിക്കാൻ ഏറെ സഹായിക്കും.
ഉൽപ്പന്നത്തിന്റെ നിർദ്ദേശപ്രകാരം ഇത് ഉപയോഗിക്കുകയും, ആവശ്യമായ സമയം സ്കാൽപ്പിൽ നിലനിർത്താൻ ശ്രദ്ധിക്കുകയും വേണം. ഒരേ ഷാംപൂ ഉപയോഗിച്ചിട്ടും ഫലമില്ലെങ്കിൽ ഒരു ഡെർമറ്റോളജിസ്റ്റിന്റെ നിർദ്ദേശം തേടാം.
- നനഞ്ഞ മുടി അധികനേരം കെട്ടിവയ്ക്കരുത്
കുളിച്ച ശേഷം മുടി നന്നായി ഉണക്കിയതിന് ശേഷം മാത്രം കെട്ടിവയ്ക്കുക. നനഞ്ഞ മുടി ദീർഘനേരം കെട്ടിവയ്ക്കുന്നതും ഈർപ്പമുള്ള തലയോട്ടിയുമായി ഉറങ്ങാൻ കിടക്കുന്നതും ഒഴിവാക്കണം.
മുടി കഴുകിയ ശേഷം വൃത്തിയുള്ള ടവൽ ഉപയോഗിച്ച് വെള്ളം പതുക്കെ ഒപ്പിയെടുക്കുക. അമിതമായി ഉരച്ചുണക്കുന്നത് തലയോട്ടിയിൽ അസ്വസ്ഥതകളുണ്ടാക്കാം.
- ചീപ്പും ടവലും വൃത്തിയായി സൂക്ഷിക്കുക
മുടി ചീന്താൻ ഉപയോഗിക്കുന്ന ചീപ്പുകളിൽ അഴുക്കും എണ്ണമയവും മൃതകോശങ്ങളും അടിഞ്ഞുകൂടാൻ സാധ്യതയുണ്ട്. അതിനാൽ ചീപ്പ് ഇടയ്ക്കിടെ കഴുകി വൃത്തിയാക്കണം.
ടവലുകളും തലയണയുടെ കവറുകളും പതിവായി കഴുകി ഉണക്കി ഉപയോഗിക്കുക. മറ്റുള്ളവരുടെ ചീപ്പും ടവലും ഉപയോഗിക്കാതിരിക്കാൻ ശ്രദ്ധിക്കുക.
- അമിതമായി എണ്ണ തേക്കുന്നത് ഒഴിവാക്കുക
മുടിക്ക് എണ്ണ തേക്കുന്നത് നല്ലതാണെങ്കിലും, താരനുള്ളവർ സ്കാൽപ്പിൽ അമിതമായി എണ്ണ പുരട്ടി ദീർഘനേരം വെക്കുന്നത് ഒഴിവാക്കണം. പ്രത്യേകിച്ച് എണ്ണമയമുള്ള തലയോട്ടി ഉള്ളവരിൽ ഇത് പ്രശ്നം കൂടുതൽ വഷളാക്കും.
എണ്ണയാണെങ്കിൽ മുടിയുടെ നീളത്തിലും അറ്റങ്ങളിലും മാത്രം ആവശ്യത്തിന് ഉപയോഗിക്കുക. തലയോട്ടിയിൽ ചൊറിച്ചിലോ അസ്വസ്ഥതയോ അനുഭവപ്പെട്ടാൽ എണ്ണയുടെ ഉപയോഗം താൽക്കാലികമായി നിർത്തുക.
- നഖം ഉപയോഗിച്ച് തലയോട്ടി ചൊറിയരുത്
താരൻ മൂലം തലയോട്ടിയിൽ കഠിനമായ ചൊറിച്ചിൽ അനുഭവപ്പെടുന്നത് സ്വാഭാവികമാണ്.
എന്നാൽ നഖം ഉപയോഗിച്ച് ശക്തമായി ചൊറിയുന്നത് തലയോട്ടിയിൽ മുറിവുകളുണ്ടാക്കാനും അണുബാധയ്ക്കുള്ള സാധ്യത വർദ്ധിപ്പിക്കാനും ഇടയാക്കും.
- ഹെയർ സ്റ്റൈലിങ് ഉൽപ്പന്നങ്ങളുടെ ഉപയോഗം കുറയ്ക്കുക
ഹെയർ ജെൽ, സ്പ്രേ, സീറം തുടങ്ങിയ രാസവസ്തുക്കൾ അടങ്ങിയ ഉൽപ്പന്നങ്ങൾ അമിതമായി ഉപയോഗിക്കുന്നത് തലയോട്ടിയിൽ അവശിഷ്ടങ്ങൾ അടിഞ്ഞുകൂടാൻ കാരണമാകും.
പുതിയ ഏതെങ്കിലും ഹെയർ കെയർ ഉൽപ്പന്നം ഉപയോഗിച്ചതിന് ശേഷം ചൊറിച്ചിലോ അസ്വസ്ഥതോ ഉണ്ടാകുകയാണെങ്കിൽ ഉടൻ തന്നെ അതിന്റെ ഉപയോഗം നിർത്തുക.
- ഭക്ഷണത്തിലും ജീവിതശൈലിയിലും ശ്രദ്ധിക്കുക
സമീകൃതമായ ഭക്ഷണക്രമം മുടിയുടെയും ചർമ്മത്തിന്റെയും ആരോഗ്യത്തിന് വളരെ പ്രധാനമാണ്. പ്രോട്ടീൻ, സിങ്ക്, ബി വിറ്റാമിനുകൾ എന്നിവ അടങ്ങിയ പച്ചക്കറികൾ, പഴങ്ങൾ, പയർവർഗ്ഗങ്ങൾ, മുട്ട, മത്സ്യം, നട്സ് എന്നിവ ഭക്ഷണത്തിൽ ഉൾപ്പെടുത്തുക.
കൂടാതെ, ആവശ്യത്തിന് ഉറക്കവും മാനസിക സമ്മർദ്ദം കുറയ്ക്കുന്ന ശീലങ്ങളും മൊത്തത്തിലുള്ള ആരോഗ്യത്തിനും താരനെ പ്രതിരോധിക്കുന്നതിനും ഏറെ ഗുണം ചെയ്യും.
