ന്യൂസിലൻഡിനെതിരായ നാലാം ഏകദിനത്തിൽ ഇന്ത്യയ്ക്ക് വമ്പൻ തോൽവി. മൗണ്ട് മൗംഗനുയിയിലെ ബേ ഓവലിൽ നടന്ന മത്സരത്തിൽ 244 റൺസിന്റെ കൂറ്റൻ പരാജയമാണ് ഇന്ത്യ നേരിട്ടത്. 334 റൺസ് വിജയലക്ഷ്യം പിന്തുടർന്നിറങ്ങിയ ഇന്ത്യൻ ബാറ്റിംഗ് നിര, മാറ്റ് ഹെന്റിയുടെ മാരക ബൗളിംഗിന് മുന്നിൽ തകർന്ന് വെറും 26.4 ഓവറിൽ 89 റൺസിന് പുറത്തായി.
ഇന്ത്യയുടെ ക്രിക്കറ്റ് ചരിത്രത്തിൽ ആദ്യമായാണ് ഒരേ വർഷത്തിൽ ഏകദിനത്തിലും ടി-20യിലും 100 റൺസിന് താഴെ ഓൾ ഔട്ടാവുന്നത്. ഈ ടി-20യിൽ ഇംഗ്ലണ്ടിനെതിരെ 76 റൺസിനും ഇന്ത്യ പുറത്തായിരുന്നു. ഈ രണ്ട് തോൽവികളും ഇന്ത്യ ഏറ്റുവാങ്ങിയത് ശ്രേയസ് അയ്യരുടെ ക്യാപ്റ്റൻസിക്ക് കീഴിലാണ്.
ഹെൻറി ആറ് വിക്കറ്റ് നേടിയാണ് ഇന്ത്യയെ വീഴ്ത്തിയത്. രോഹിത് ശർമ്മ, വിരാട് കോലി, ശ്രേയസ് അയ്യർ എന്നിവരെ ആദ്യ ഓവറിൽ തന്നെ പുറത്താക്കിയ ഹെന്റി മത്സരത്തിന്റെ ഗതി പൂർണ്ണമായും മാറ്റിമറിച്ചു. പിന്നീട് ഇഷാൻ കിഷൻ, കുൽദീപ് യാദവ്, ഗൂർനൂർ ബ്രാർ എന്നിവരെക്കൂടി വീഴ്ത്തിയ ഹെൻറി കിവീസിന് വിജയം സമ്മാനിച്ചു.
ആദ്യം ബാറ്റ് ചെയ്ത ന്യൂസിലൻഡ് 108 പന്തിൽ 125 റൺസ് നേടിയ വിൽ യങ്, 58 റൺസ് നേടിയ ടീം സീഫെർട്ട് എന്നിവരുടെ മികവിലാണ് 50 ഓവറിൽ 334 റൺസെന്ന ശക്തമായ സ്കോർ പടുത്തുയർത്തിയത്.
പരമ്പരയിലെ നാല് മത്സരങ്ങൾ പിന്നിട്ടപ്പോൾ ഇന്ത്യ 2-1ന് മുന്നിലാണ്. നവംബർ 15നാണ് അവസാന മത്സരം.
