ന്യൂസിലൻഡിനെതിരായ നാലാം ഏകദിനത്തിൽ ഇന്ത്യയ്ക്ക് വമ്പൻ തോൽവി. മൗണ്ട് മൗംഗനുയിയിലെ ബേ ഓവലിൽ നടന്ന മത്സരത്തിൽ 244 റൺസിന്റെ കൂറ്റൻ പരാജയമാണ് ഇന്ത്യ നേരിട്ടത്. 334 റൺസ് വിജയലക്ഷ്യം പിന്തുടർന്നിറങ്ങിയ ഇന്ത്യൻ ബാറ്റിംഗ് നിര, മാറ്റ് ഹെന്റിയുടെ മാരക ബൗളിംഗിന് മുന്നിൽ തകർന്ന് വെറും 26.4 ഓവറിൽ 89 റൺസിന് പുറത്തായി.
മത്സരശേഷം ഇന്ത്യൻ ബാറ്റിംഗ് നിരയെ പരിശീലകൻ ഗൗതം ഗംഭീർ വിമർശിക്കുകയും ചെയ്തു. ആദ്യത്തെ 10 ഓവറുകൾ കൂടുതൽ ശ്രദ്ധയോടെ കളിക്കണമായിരുന്നുവെന്നാണ് ഗംഭീർ തോൽവിക്ക് പിന്നാലെ പറഞ്ഞത്.
“ഇന്റർനാഷണൽ ക്രിക്കറ്റിൽ കളിക്കാൻ സാധിക്കാത്ത പന്തുകൾ ഒന്നുമില്ല. ആദ്യത്തെ 10 ഓവറുകളിൽ നമ്മൾ കൂടുതൽ ശ്രദ്ധയോടെ കളിക്കണമായിരുന്നു. മാറ്റ് ഹെൻറി മികച്ച രീതിയിൽ ആണ് പന്തെറിഞ്ഞത്. എന്നാൽ അദ്ദേഹത്തിന്റെ പന്തുകളെ നന്നായി നേരിടാൻ സാധിക്കണമായിരുന്നു. 90 റൺസിന് എല്ലാവരും പുറത്തായത് തീർച്ചയായും ആശങ്കയുണ്ടാക്കുന്ന കാര്യമാണ്. ലോകകപ്പിന് മുന്നോടിയായി ഇത്തരം സാഹചര്യങ്ങൾ ഗൗരവമായി കാണണം. കഴിഞ്ഞ മത്സരത്തിലും നമുക്ക് ഏഴ് വിക്കറ്റുകൾ നഷ്ടമായിരുന്നു. ഇത് ആശങ്കപ്പെടുത്തുന്ന കാര്യമാണ്” ഗംഭീർ പറഞ്ഞു.
ഹെൻറി ആറ് വിക്കറ്റ് നേടിയാണ് ഇന്ത്യയെ വീഴ്ത്തിയത്. രോഹിത് ശർമ്മ, വിരാട് കോലി, ശ്രേയസ് അയ്യർ എന്നിവരെ ആദ്യ ഓവറിൽ തന്നെ പുറത്താക്കിയ ഹെന്റി മത്സരത്തിന്റെ ഗതി പൂർണ്ണമായും മാറ്റിമറിച്ചു. പിന്നീട് ഇഷാൻ കിഷൻ, കുൽദീപ് യാദവ്, ഗൂർനൂർ ബ്രാർ എന്നിവരെക്കൂടി വീഴ്ത്തിയ ഹെൻറി കിവീസിന് വിജയം സമ്മാനിച്ചു.
ആദ്യം ബാറ്റ് ചെയ്ത ന്യൂസിലൻഡ് 108 പന്തിൽ 125 റൺസ് നേടിയ വിൽ യങ്, 58 റൺസ് നേടിയ ടീം സീഫെർട്ട് എന്നിവരുടെ മികവിലാണ് 50 ഓവറിൽ 334 റൺസെന്ന ശക്തമായ സ്കോർ പടുത്തുയർത്തിയത്.
