ലൊസാൻ: 2036-ലെ ഒളിമ്പിക്സ് ആതിഥേയത്വത്തിനായി മത്സരിക്കുന്ന 7 രാജ്യങ്ങളുടെ പട്ടിക പുറത്തുവിട്ട് അന്താരാഷ്ട്ര ഒളിമ്പിക് കമ്മിറ്റി (IOC). ഖത്തറിനും ജർമ്മനിക്കും ഒപ്പം ഇന്ത്യയും ഈ നിർണായക പട്ടികയിൽ ഇടം പിടിച്ചു എന്നതാണ് ഏറ്റവും വലിയ പ്രത്യേകത.
ഇന്ത്യയെ കൂടാതെ ഖത്തർ, ജർമ്മനി, ഹംഗറി, തുർക്കി, ദക്ഷിണാഫ്രിക്ക, ദക്ഷിണ കൊറിയ എന്നീ രാജ്യങ്ങളാണ് 2036 ഒളിമ്പിക്സിനായി നിലവിൽ IOC-യുമായി തുടർ ചർച്ചകളിൽ ഏർപ്പെട്ടിരിക്കുന്നത്. ഒക്ടോബർ 6-ന് ചേർന്ന യോഗത്തിലാണ് IOC ഇക്കാര്യം ഔദ്യോഗികമായി സ്ഥിരീകരിച്ചത്.
ഇന്ത്യയുടെ നീക്കം അഹമ്മദാബാദിനെ മുൻനിർത്തി
ഒളിമ്പിക്സ് ചരിത്രത്തിൽ ആദ്യമായി ആതിഥേയരാകാൻ ശ്രമിക്കുന്ന ഇന്ത്യ, പ്രധാനമന്ത്രി നരേന്ദ്ര മോദിയുടെ ജന്മനാടായ ഗുജറാത്തിലെ അഹമ്മദാബാദിനെയാണ് ആതിഥേയ നഗരമായി മുന്നോട്ട് വെക്കുന്നത്. ലോകത്തിലെ ഏറ്റവും വലിയ ക്രിക്കറ്റ് സ്റ്റേഡിയമായ നരേന്ദ്ര മോദി സ്റ്റേഡിയം സ്ഥിതി ചെയ്യുന്ന നഗരം കൂടിയാണിത്.
2030-ലെ കോമൺവെൽത്ത് ഗെയിംസിന് അഹമ്മദാബാദ് ആതിഥേയത്വം വഹിക്കുന്നത് 2036 ഒളിമ്പിക്സിനുള്ള വലിയ റിഹേഴ്സലായി കാണുന്നുണ്ട്. 2024-ൽ തന്നെ ഇന്ത്യ ഔദ്യോഗികമായി താൽപര്യപത്രം IOC-ക്ക് നൽകിയിരുന്നു.
അടുത്ത നടപടികൾ എന്തൊക്കെ?
ഒക്ടോബർ 31, 2026: പുതിയ രാജ്യങ്ങൾക്ക് താൽപര്യം അറിയിക്കാനുള്ള അവസാന തീയതി.നവംബർ
2026: 7 രാജ്യങ്ങളും തങ്ങളുടെ പ്രൊജക്ടുകൾ IOC-യുടെ Future Host Commission മുൻപാകെ അവതരിപ്പിക്കും.
മാർച്ച് 2027: ഷോർട്ട്‌ലിസ്റ്റ് ചെയ്യപ്പെടുന്ന രാജ്യങ്ങളുമായി IOC കൂടുതൽ ചർച്ചകൾ നടത്തും.
2029 മധ്യത്തോടെ: 2036 ഒളിമ്പിക്സിന്റെ അന്തിമ ആതിഥേയരെ പ്രഖ്യാപിക്കും.
ഫണ്ടിംഗ്, രാഷ്ട്രീയ പിന്തുണ, ജനപിന്തുണ, കായികതാരങ്ങൾക്കുള്ള സൗകര്യങ്ങൾ എന്നിവയുടെ അടിസ്ഥാനത്തിലാകും ആതിഥേയരെ തീരുമാനിക്കുക എന്ന് IOC പ്രസിഡന്റ് കിർസ്റ്റി കോവെൻട്രി വ്യക്തമാക്കി.
ഖത്തർ ദോഹയെ മുൻനിർത്തിയും ജർമ്മനി മ്യൂണിക്കിനെ മുൻനിർത്തിയുമാണ് മത്സരിക്കുന്നത്. ഇതുവരെ ഒളിമ്പിക്സ് നടത്തിയിട്ടില്ലാത്ത ഖത്തറും തുർക്കിയും ആദ്യ ആതിഥേയത്വത്തിനായി ശ്രമിക്കുമ്പോൾ, ദക്ഷിണാഫ്രിക്ക ആഫ്രിക്കൻ ഭൂഖണ്ഡത്തിലെ ആദ്യ ഒളിമ്പിക്സിനായാണ് ശ്രമിക്കുന്നത്.
