ഇന്ത്യക്കെതിരെയുള്ള അവസാന ഏകദിനത്തിൽ വെസ്റ്റ് ഇൻഡീസ് ആശ്വാസ ജയം സ്വന്തമാക്കി. അഞ്ച് വിക്കറ്റിനാണ് വിൻഡീസിന്റെ ജയം. ഇന്ത്യ ഉയർത്തിയ 351 റൺസ് 48.2 ഓവറിൽ വിൻഡീസ് മറികടന്നു.
ക്യാപ്റ്റൻ ഷായ്‌ ഹോപ്പിന്റെ സെഞ്ച്വറി മികവിലാണ് വിൻഡീസിന്റെ ജയം. 143 പന്തിൽ പുറത്താവാതെ 163 റൺസ് നേടിയാണ് ഹോപ്പ് തിളങ്ങിയത്. 17 ഫോറുകളും മൂന്ന് സിക്സുകളും അടങ്ങുന്നതാണ് ഇന്നിംഗ്സ്.
ഏകദിനത്തിൽ 150+ റൺസ് നേടുന്ന ആദ്യ വിക്കറ്റ് കീപ്പർ ബാറ്റർ ക്യാപ്റ്റനാണ് ഹോപ്പ്. മുൻ സൗത്ത് ആഫ്രിക്കൻ താരം എ.ബി ഡിവില്ലിയേഴ്സ് ആണ് ഈ റെക്കോഡിൽ ഉണ്ടായിരുന്നത്. 2015ൽ ഡിവില്ലിയേഴ്സ് വെസ്റ്റ് ഇൻഡീസിനെതിരെ 149 റൺസ് നേടിയതായിരുന്നു ഇതിന് മുമ്പുള്ള ഒരു വിക്കറ്റ് കീപ്പർ ബാറ്റർ ക്യാപ്റ്റന്റെ ഉയർന്ന സ്കോർ.
ആമിർ ജാങ്കോയുടെ അർദ്ധ സെഞ്ച്വറിയും വിൻഡീസ് വിജയത്തിൽ നിർണായകമായി.
ഇന്ത്യക്ക് വേണ്ടി കെ.എൽ രാഹുൽ സെഞ്ച്വറി നേടി. 129 റൺസുമായി പുറത്താകാതെ നിന്ന കെ.എൽ. രാഹുലിന്റെ ഇന്നിങ്സാണ് ഇന്ത്യൻ സ്കോറിന് കരുത്തായത്. എകദിന ഫോർമാറ്റിൽ രാഹുലിന്റെ കരിയറിലെ ഏറ്റവും ഉയർന്ന വ്യക്തിഗത സ്കോറാണിത്.
മത്സരത്തിന്റെ തുടക്കത്തിൽ ഇന്ത്യക്ക് തിരിച്ചടിയേറ്റിരുന്നു. മൂന്നാം ഓവറിൽ തന്നെ ഓപ്പണർ ശുഭ്മാൻ ഗില്ലിനെയും വിരാട് കോലിയെയും അടുത്തടുത്ത പന്തുകളിൽ പുറത്താക്കി വെസ്റ്റ് ഇൻഡീസ് പേസർ ജെയ്ഡൻ സീൽസ് ഇന്ത്യയെ ഞെട്ടിച്ചു.
എന്നാൽ തുടർന്ന് ക്രീസിലൊന്നിച്ച രോഹിത് ശർമ്മയും റുതുരാജ് ഗെയ്ക്വാദും ചേർന്ന് ഇന്ത്യൻ ഇന്നിങ്സിനെ പതർച്ചയിൽ നിന്ന് കരകയറ്റി.
രോഹിത്-റുതുരാജ് സഖ്യം മൂന്നാം വിക്കറ്റിൽ 137 റൺസിന്റെ നിർണായക കൂട്ടുകെട്ടാണ് പടുത്തുയർത്തിയത്.
85 പന്തിൽ 92 റൺസെടുത്ത രോഹിതിന് വെറും 8 റൺസ് അകലെയാണ് തന്റെ 36-ാം ഏകദിന സെഞ്ച്വറി നഷ്ടമായത്.
രുതുരാജ് ഗെയ്ക്വാദ് (57) പുറത്തായ ശേഷം ക്രീസിലെത്തിയ കെ.എൽ. രാഹുൽ ഇന്നിങ്സിന്റെ നിയന്ത്രണം പൂർണ്ണമായും ഏറ്റെടുത്തു. അവസാന ഓവറുകളിൽ വിൻഡീസ് ബൗളർമാരെ കടന്നാക്രമിച്ച രാഹുൽ ഇന്ത്യയുടെ റൺറേറ്റ് കുത്തനെ ഉയർത്തി.അവസാന അഞ്ച് ഓവറിൽ മാത്രം ഇന്ത്യ 65 റൺസാണ് അടിച്ചുകൂട്ടിയത്.
ആദ്യ രണ്ട് മത്സരങ്ങളും വിജയിച്ച ഇന്ത്യ നേരത്തെ പരമ്പര സ്വന്തമാക്കിയിരുന്നു.
