ഇന്ത്യൻ ഇതിഹാസം വിരാട് കോലിയെ പ്രശംസിച്ച് വിക്കറ്റ് കീപ്പർ റിഷബ് പന്ത്. എല്ലാ താരങ്ങളുടെയും കരിയറിൽ മോശം സമയവും നല്ല സമയവും ഉണ്ടാവാറുണ്ടെന്നും എന്നാൽ കോഹ്ലിയുടെ കാര്യത്തിൽ എപ്പോഴും സ്ഥിരതയാർന്ന പ്രകടനമാണ് ഉണ്ടാവാറുള്ളതെന്നാണ് പന്ത് വ്യക്തമാക്കിയത്.
‘എല്ലാ ക്രിക്കറ്റ് താരങ്ങളുടെയും കരിയറിൽ നല്ല സമയവും മോശം സമയവും ഉണ്ടാവാറുണ്ട്. എന്നാൽ വിരാട് കോഹ്ലിയുടെ കാര്യത്തിൽ അങ്ങനെയല്ല. അദ്ദേഹത്തിന്റെ പ്രകടനം എപ്പോഴും മികച്ചതായാണ് തുടരുന്നത്. കരിയറിൽ ഉടനീളം അദ്ദേഹം അത്രയധികം അവിശ്വസനീയമായ പ്രകടനമാണ് നടത്തിയിട്ടുള്ളത്’ റിഷബ് പന്ത് ബിസിനസ് ഓഫ് സ്പോർട്ടിൽ പറഞ്ഞു.
വെസ്റ്റ് ഇൻഡീസിനെതിരെയുള്ള ആദ്യ ഏകദിനത്തിൽ സെഞ്ച്വറി നേടി കോലി തിളങ്ങിയിരുന്നു. തിരുവനന്തപുരം കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടന്ന പോരാട്ടത്തിൽ 88 പന്തിൽ പുറത്താവാതെ 139 റൺസ് നേടിയാണ് കോലി ടീമിന് വിജയം സമ്മാനിച്ചത്. 10 ഫോറുകളും 9 സിക്സുകളും കോലിയുടെ ബാറ്റിൽ നിന്നും പിറന്നു.
ഈ സെഞ്ച്വറിക്ക് പിന്നാലെ ഏകദിനത്തിൽ രണ്ട് വ്യത്യസ്ത ടീമുകൾക്കെതിരെ 10 സെഞ്ച്വറികൾ നേടുന്ന ആദ്യത്തെ താരമായാണ് വിരാട് റെക്കോർഡിട്ടത്. നേരത്തെ ശ്രീലങ്കക്കെതിരെ 10 സെഞ്ച്വറികൾ സ്വന്തമാക്കിയ താരം വിൻഡീസിനെതിരെയും 10 തവണ മൂന്നക്കം കടന്നതോടെയാണ് ഈ വമ്പൻ നേട്ടം കൈവരിച്ചത്.
ആദ്യ ഏകദിനത്തിൽ ഇന്ത്യ എട്ട് വിക്കറ്റുകളുടെ തകർപ്പൻ വിജയമാണ് സ്വന്തമാക്കിയത്. വിൻഡീസ് ഉയർത്തിയ 295 റൺസ് ഇന്ത്യ രണ്ട് വിക്കറ്റ് നഷ്ടത്തിൽ അനായാസം മറികടക്കുകയായിരുന്നു. കോലിക്കൊപ്പം ക്യാപ്റ്റൻ ശുഭ്മൻ ഗില്ലിന്റെ സെഞ്ച്വറിയും ഇന്ത്യയുടെ വിജയത്തിൽ നിർണായകമായി. 108 പന്തിൽ 13 ഫോറുകളും ഒരു സിക്സും അടക്കം 110 റൺസാണ് ഗിൽ നേടിയത്.
