ചെന്നൈ: സച്ചിൻ ടെണ്ടുൽക്കറാണോ വിരാട് കോഹ്ലിയാണോ ക്രിക്കറ്റിലെ ഏറ്റവും മികച്ച ബാറ്റർ എന്ന നിലനിൽക്കുന്ന തർക്കത്തിൽ തനിക്ക് മുൻതൂക്കം സച്ചിനാണെന്ന് വ്യക്തമാക്കി ഇന്ത്യൻ ഓഫ് സ്പിന്നർ രവിചന്ദ്രൻ അശ്വിൻ.
തന്റെ യൂട്യൂബ് ചാനലിലൂടെ സംസാരിക്കവെയാണ് രണ്ട് ബാറ്റിങ് ഇതിഹാസങ്ങളുമായും ഡ്രസ്സിംഗ് റൂം പങ്കിട്ടിട്ടുള്ള അശ്വിൻ ഈ വിഷയത്തിൽ മനസ്സ് തുറന്നത്.
ക്രിക്കറ്റ് കളിച്ച കാലഘട്ടവും സച്ചിൻ നേരിട്ട അമിതമായ സമ്മർദ്ദവുമാണ് അദ്ദേഹത്തിന് മുൻതൂക്കം നൽകുന്നതെന്ന് അശ്വിൻ ചൂണ്ടിക്കാട്ടി. വ്യത്യസ്ത കാലഘട്ടങ്ങളിലെ കളിക്കാരെ താരതമ്യം ചെയ്യുന്നത് ശരിയല്ല.
സച്ചിന്റെ കാലത്ത് ഏകദിനങ്ങളിൽ സിംഗിൾ വൈറ്റ് ബോൾ മാത്രമാണ് ഉപയോഗിച്ചിരുന്നത്. മത്സരത്തിന്റെ അവസാന ഘട്ടങ്ങളിൽ പന്തിന്റെ തിളക്കം നഷ്ടപ്പെടുന്നതും തിരിഞ്ഞുതുടങ്ങുന്നതും ബാറ്റിങ് ദുഷ്കരമാക്കിയിരുന്നു.
എന്നാൽ ആധുനിക ക്രിക്കറ്റിൽ രണ്ട് പുതിയ പന്തുകളും ഫീൽഡിങ് നിയന്ത്രണങ്ങളും ബാറ്റ്സ്മാന്മാർക്ക് കൂടുതൽ അനുകൂല സാഹചര്യമൊരുക്കുന്നുണ്ടെന്നും അശ്വിൻ നിരീക്ഷിച്ചു.
വിരാടിനെ സച്ചിനൊപ്പം പ്രതിഷ്ഠിക്കുന്ന ആ ഒരു റെക്കോർഡ്!
സച്ചിനാണ് തന്റെ മുൻഗണനയെങ്കിലും കോഹ്ലിയെ ആ തലത്തിലേക്ക് ഉയർത്തുന്ന ഒരു പ്രധാന നാഴികക്കല്ലും അശ്വിൻ എടുത്തുപറഞ്ഞു.
വിരാട് കോഹ്ലി അന്താരാഷ്ട്ര ക്രിക്കറ്റിൽ 100 സെഞ്ചുറികൾ പൂർത്തിയാക്കിയാൽ സച്ചിനും വിരാടും ഒരേ തട്ടിലാണെന്ന് താൻ യാതൊരു സംശയവുമില്ലാതെ സമ്മതിക്കുമെന്ന് അശ്വിൻ പറഞ്ഞു.
നിലവിൽ 86 അന്താരാഷ്ട്ര സെഞ്ചുറികളുള്ള കോഹ്ലിക്ക് സച്ചിന്റെ ചരിത്ര റെക്കോർഡിനൊപ്പമെത്താൻ 14 സെഞ്ചുറികൾ കൂടി വേണം.
2027 ലെ ഏകദിന ലോകകപ്പോടെ കോഹ്ലി തന്റെ അന്താരാഷ്ട്ര കരിയറിന് തിരശ്ശീലയിടുമെന്ന് കരുതുന്നതായും അശ്വിൻ വ്യക്തമാക്കി.
ടെസ്റ്റ്, ടി-20 ഫോർമാറ്റുകളിൽ നിന്ന് നേരത്തെ തന്നെ വിരമിച്ച വിരാടിന് ഇനിയുള്ള ഏകദിന മത്സരങ്ങളിലൂടെ ഈ റെക്കോർഡിലേക്ക് എത്താൻ സാധിക്കുമെന്നും, ലോകകപ്പിന് മുൻപോ ശേഷമോ ഈ നേട്ടം കൈവരിച്ചാൽ അത് സമാനതകളില്ലാത്ത നേട്ടമായിരിക്കുമെന്നും അശ്വിൻ കൂട്ടിച്ചേർത്തു.
