ബ്യൂണസ് അയേഴ്സ്: അർജന്റീനയുടെ ഇതിഹാസ താരം ലയണൽ മെസ്സിയുടെ വിടവാങ്ങൽ മത്സരത്തിന് പിന്നാലെ യുവതാരം നിക്കോ പാസിന് മെസ്സിയുടെ അമ്മ സീലിയ കുസിറ്റിനി നൽകിയ ഹൃദയസ്പർശിയായ സന്ദേശം പുറത്ത്.
അർജന്റീന ദേശീയ ടീമിലും ഇറ്റാലിയൻ ക്ലബ്ബായ കോമോയിലും മിന്നും ഫോമിൽ കളിക്കുന്ന 22-കാരൻ നിക്കോ പാസിന്റെ അമ്മാവനായ ഫാബിയൻ പാസാണ് ഈ വികാരനിർഭരമായ നിമിഷം വെളിപ്പെടുത്തിയത്.
കോസ്റ്റാറിക്കയ്ക്കെതിരായ സൗഹൃദ മത്സരത്തിൽ അർജന്റീന നേടിയ 7-0 വിജയത്തിൽ നിക്കോ പാസ് ഇരട്ട ഗോൾ നേടിയതിന് പിന്നാലെയാണ് ഈ വെളിപ്പെടുത്തൽ.
മെസ്സിയുടെ അമ്മയുടെ ആ വാക്കുകൾ
ബുധനാഴ്ച ‘റേഡിയോ ലാ റെഡിന്റെ’ ടോട്ടി 910 പരിപാടിയിൽ സംസാരിക്കവെയാണ് ഡിസൈനറും മുൻ താരം പാബ്ലോ പാസിന്റെ സഹോദരനുമായ ഫാബിയൻ പാസ് ഇക്കാര്യം പങ്കുവെച്ചത്.
ഒക്ടോബറിൽ ബെനിനെതിരെ നടന്ന ലയണൽ മെസ്സിയുടെ വിടവാങ്ങൽ മത്സരത്തിന് ശേഷമായിരുന്നു സംഭവം.
“മെസ്സിയുടെ വിടവാങ്ങൽ മത്സരത്തിന് ശേഷം നിക്കോ പാസ് ഡ്രസ്സിംഗ് റൂമിൽ നിന്ന് പുറത്തേക്ക് വരുമ്പോൾ മെസ്സിയുടെ അമ്മ സീലിയ കരയുകയായിരുന്നു. മുൻപേ പരിചയമുള്ളതിനാൽ നിക്കോ അവരുടെ അടുത്തേക്ക് ചെന്ന് അഭിവാദ്യം ചെയ്തു.
അപ്പോൾ സീലിയ നിക്കോയുടെ കൈകളിൽ പിടിച്ചുകൊണ്ട് പറഞ്ഞു: ‘നീ എന്റെ മകന്റെ പിൻഗാമിയാണ്’,” ഫാബിയൻ വെളിപ്പെടുത്തി.
സ്തബ്ധനായിപ്പോയ നിക്കോ പാസ്
ഈ അപ്രതീക്ഷിത പ്രതികരണം നിക്കോ പാസിനെ വല്ലാതെ സ്പർശിച്ചുവെന്നും താരം അക്ഷരാർത്ഥത്തിൽ സ്തബ്ധനായിപ്പോയെന്നും ഫാബിയൻ പറഞ്ഞു. “ഞാൻ പുറത്ത് കാറിൽ നിക്കോയെ കാത്തിരിക്കുകയായിരുന്നു.
അവൻ വന്ന് കാറിൽ കയറിയപ്പോൾ ആകെ സ്തബ്ധനായിരുന്നു. എന്താണ് സംഭവിച്ചതെന്ന് അവന് വിശ്വസിക്കാൻ പോലും കഴിഞ്ഞില്ല. അവൻ ഇപ്പോഴും ഒരു ചെറുപ്പക്കാരനാണ്, ആ വാക്കുകൾ അവനെ അത്രയധികം സ്വാധീനിച്ചു,” ഫാബിയൻ കൂട്ടിച്ചേർത്തു.
മിന്നും ഫോമിൽ അർജന്റീനയുടെ പുതിയ പ്രതീക്ഷ
മെസ്സിയുടെ പടിയിറക്കത്തിന് ശേഷം അർജന്റീനൻ നിരയിലെ ഏറ്റവും നിർണ്ണായക താരമായി നിക്കോ പാസ് മാറിക്കഴിഞ്ഞു.
കോസ്റ്റാറിക്കയ്ക്കെതിരെ നേടിയ ഇരട്ട ഗോളോടെ ദേശീയ ടീമിനായി കളിച്ച അവസാന അഞ്ച് മത്സരങ്ങളിൽ നിന്ന് താരം അഞ്ച് ഗോളുകൾ സ്വന്തമാക്കി.
ഇറ്റാലിയൻ ക്ലബ്ബായ കോമോയ്ക്കായി ഈ സീസണിൽ 14 മത്സരങ്ങളിൽ നിന്ന് ആറ് ഗോളുകളും എട്ട് അസിസ്റ്റുകളും നേടി യൂറോപ്യൻ ഫുട്ബോളിലും നിക്കോ പാസ് തരംഗം സൃഷ്ടിക്കുകയാണ്.


