പുണെ: ഐഎസ്എല്ലിൽ വിജയത്തോടെ തുടങ്ങി കേരള ബ്ലാസ്റ്റേഴ്സ്. ഇന്ന് ബാലെവാഡി സ്റ്റേഡിയത്തിൽ നടന്ന സീസണിലെ ബ്ലാസ്റ്റേഴ്സിന്റെ ആദ്യ മത്സരത്തിൽ ഇന്റർ കാശിയെ എതിരില്ലാത്ത രണ്ട് ഗോളിന് ബ്ലാസ്റ്റേഴ്സ് തകർത്തു.
ടീം: ഇന്റർ കാശി 0 – 2 കേരള ബ്ലാസ്റ്റേഴ്സ്
സ്‌കോറർമാർ:
വിബിൻ മോഹനൻ (18′)
ആന്ദ്രേ ഗ്രീൻ (90+4)
ഫിഫ ട്രാൻസ്ഫർ ബാൻ മൂലം മുഴുവൻ ഇന്ത്യൻ താരങ്ങളുമായി ഇറങ്ങിയ ഇന്റർ കാശിയെ ആദ്യ പകുതിയിൽ തന്നെ ബ്ലാസ്റ്റേഴ്സ് പൂട്ടി.
ക്യാപ്റ്റൻ വിബിൻ മോഹനനാണ് ബ്ലാസ്റ്റേഴ്സിനായി അക്കൗണ്ട് തുറന്നത്. 18-ാം മിനിറ്റിൽ കോറോ സിങ്ങിന്റെ അളന്നുമുറിച്ച പാസിൽ നിന്നായിരുന്നു ആ ഗോൾ. ബോക്സിന് പുറത്ത് നിന്ന് വിബിൻ തൊടുത്ത ഷോട്ട് നേരെ വലയിൽ കയറി. ഇതോടെ ആദ്യ പകുതിയിൽ ബ്ലാസ്റ്റേഴ്സ് 1-0ന് മുന്നിൽ.
രണ്ടാം പകുതിയിൽ ഇന്റർ കാശി തിരിച്ചടിക്കാൻ ശ്രമിച്ചെങ്കിലും ബ്ലാസ്റ്റേഴ്സ് പ്രതിരോധം ഉറച്ചുനിന്നു. അവസാനം എക്സ്ട്രാ ടൈമിൽ ഇംഗ്ലീഷ് വിംഗർ ആന്ദ്രേ ഗ്രീൻ രണ്ടാം ഗോൾ അടിച്ച് വിജയം ഉറപ്പിച്ചു.
പുതിയ പരിശീലകൻ ആഷ്ലി വെസ്റ്റ്‌വുഡിന് കീഴിൽ നാല് വിദേശ താരങ്ങളുമായി ഇറങ്ങിയ ബ്ലാസ്റ്റേഴ്സിന് ഈ ജയം വലിയ ആത്മവിശ്വാസമാകും. കഴിഞ്ഞ സീസണിൽ കൊച്ചിയിൽ ഇന്റർ കാശിയോട് 2-1ന് തോറ്റതിന്റെ മധുരപ്രതികാരം കൂടിയായി ഈ ജയം.
ബ്ലാസ്റ്റേഴ്സ് ഇലവൻ:
അർഷ് ഷെയ്ഖ് (GK), ഹോർമിപാം, ബോൾട്ടൺ, ദോഹ്ലിങ്, സുമിത് ശർമ്മ, വിബിൻ മോഹനൻ (C), ഫ്രെഡി, കോറോ സിങ്, കോസോവിച്ച്, ആന്ദ്രേ ഗ്രീൻ, ശ്രീക്കുട്ടൻ.
