നാഗോയ: ഏഷ്യൻ ഗെയിംസ് പുരുഷ ക്രിക്കറ്റിൽ മഴ വില്ലനാകുന്നു. ഐച്ചി-നാഗോയ മേഖലയിൽ പെയ്യുന്ന കനത്ത മഴ കാരണം ക്വാർട്ടർ ഫൈനൽ മത്സരങ്ങളെല്ലാം ടോസ് പോലും ഇടാനാവാതെ ഉപേക്ഷിച്ചിരുന്നു.
ടൂർണമെന്റിലെ തുടർന്നുള്ള മത്സരങ്ങളെയും മോശം കാലാവസ്ഥ പ്രതികൂലമായി ബാധിക്കുമെന്നാണ് കാലാവസ്ഥാ പ്രവചനം വ്യക്തമാക്കുന്നത്.
വ്യാഴാഴ്ച (ഒക്ടോബർ 1) നടക്കുന്ന സെമി ഫൈനൽ പോരാട്ടങ്ങൾക്ക് 60 ശതമാനവും, ഒക്ടോബർ 3-ന് നടക്കുന്ന ഫൈനൽ മത്സരത്തിന് 40 ശതമാനവും മഴയ്ക്ക് സാധ്യതയുണ്ട്.
കനത്ത മഴയെ തുടർന്ന് ക്വാർട്ടർ മത്സരങ്ങൾ ഉപേക്ഷിച്ചതോടെ, ഐസിസി ടി20 റാങ്കിംഗിലെ മുൻതൂക്കം പരിഗണിച്ചാണ് ഇന്ത്യ, പാകിസ്ഥാൻ, ശ്രീലങ്ക, ബംഗ്ലാദേശ് ടീമുകൾ സെമിയിൽ പ്രവേശിച്ചത്.
സെമി ഫൈനലും മഴ കൊണ്ടുപോയാൽ?
വ്യാഴാഴ്ച നടക്കാനിരിക്കുന്ന സെമി ഫൈനൽ മത്സരങ്ങളും മഴമൂലം ഉപേക്ഷിക്കേണ്ടി വന്നാൽ, മികച്ച ടി20 റാങ്കിംഗിന്റെ അടിസ്ഥാനത്തിൽ ഇന്ത്യയും പാകിസ്ഥാനും നേരിട്ട് ഫൈനലിലേക്ക് മുന്നേറും.
ഇത് ക്രിക്കറ്റ് പ്രേമികൾ ഏറെ ആഗ്രഹിക്കുന്ന ഇന്ത്യ-പാകിസ്ഥാൻ സ്വപ്ന ഫൈനലിന് വഴിയൊരുക്കുമെങ്കിലും, ഫൈനൽ ദിവസവും മഴ തുടർന്നാൽ കാര്യങ്ങൾ മാറും.
കഴിഞ്ഞ ഏഷ്യൻ ഗെയിംസിൽ അഫ്ഗാനിസ്ഥാനെതിരെയുള്ള ഫൈനൽ മത്സരം മഴമൂലം ഉപേക്ഷിച്ചപ്പോൾ ഉയർന്ന സീഡിംഗ് ഉള്ള ടീമെന്ന നിലയിൽ ഇന്ത്യയ്ക്കാണ് സ്വർണം ലഭിച്ചത്. എന്നാൽ 2026 ലെ ഗെയിംസ് നിയമങ്ങളിൽ മാറ്റം വരുത്തിയിട്ടുണ്ട്.
പുതിയ നിയമപ്രകാരം ഫൈനൽ മത്സരവും മഴയിൽ പൂർത്തിയാക്കാൻ സാധിച്ചില്ലെങ്കിൽ ഇന്ത്യയും പാകിസ്ഥാനും സ്വർണ്ണ മെഡൽ പങ്കിടേണ്ടി വരും.
കഴിഞ്ഞകാലങ്ങളിലെ രാഷ്ട്രീയ-കായിക സാഹചര്യങ്ങൾ കണക്കിലെടുക്കുമ്പോൾ, ഇരു ടീമുകൾക്കും മെഡൽ പോഡിയത്തിൽ ഒന്നിച്ച് നിൽക്കേണ്ടി വരുന്നത് കൗതുകകരമായ ഒരു കാഴ്ചയായിരിക്കും.
ഏപ്രിൽ മാസമുണ്ടായ പഹൽഗാം ഭീകരാക്രമണത്തിന് ശേഷം ഇരുരാജ്യങ്ങളും തമ്മിലുള്ള നയതന്ത്ര ബന്ധം വഷളായിരുന്നു. തുടർന്ന് പാകിസ്ഥാനെതിരായ മത്സരങ്ങൾക്ക് ശേഷം ഇന്ത്യൻ താരങ്ങൾ ഹസ്തദാനം നൽകാൻ വിസമ്മതിച്ചിരുന്നു.
കൂടാതെ എസിസി പ്രസിഡന്റും പാക് മന്ത്രിയുമായ മൊഹ്സിൻ നഖ്വിയിൽ നിന്ന് ട്രോഫികളും മെഡലുകളും വാങ്ങുന്നതിൽ നിന്നും ഇന്ത്യൻ ടീമുകൾ വിട്ടുനിന്നിരുന്നു. ഫൈനൽ മഴയിൽ ഒലിച്ചുപോയാൽ ഈ ചരിത്രവും വീണ്ടും ചർച്ചയാകും.
