മെൽബൺ: ഓസ്ട്രേലിയൻ ഓപ്പണർ ഉസ്മാൻ ഖവാജയ്ക്കെതിരെ കടുത്ത ആരോപണങ്ങളുമായി മുൻ വിക്കറ്റ് കീപ്പർ ഇയാൻ ഹീലി രംഗത്ത്. ഖവാജ മോശം സഹതാരമാണെന്നും, കഴിഞ്ഞ വർഷം ക്വീൻസ്‌ലാൻഡിനായി ഷെഫീൽഡ് ഷീൽഡ് മത്സരത്തിൽ നിന്ന് വിട്ടുനിൽക്കാൻ വ്യാജ ഹാംസ്ട്രിംഗ് പരിക്ക് ഉണ്ടാക്കി മാറി നിൽക്കുകയായിരുന്നുവെന്നും ഹീലി തുറന്നടിച്ചു. SEN റേഡിയോയിലൂടെയായിരുന്നു ഹീലിയുടെ പ്രതികരണം.
ഖവാജയുടെ പുതിയ ആത്മകഥയായ ‘സബ്റി’ൽ (Subber) തന്നെക്കുറിച്ചുള്ള വിമർശനങ്ങൾ പരാമർശിച്ചതിന് പിന്നാലെയാണ് ഇരുവർക്കുമിടയിലെ തർക്കം വീണ്ടും രൂക്ഷമായത്.
ക്വീൻസ്‌ലാൻഡ് ക്രിക്കറ്റിന്റെ ഡെപ്യൂട്ടി ചെയർമാൻ കൂടിയായ ഹീലി, ഖവാജയുടെ ടീമിനോടുള്ള ആത്മാർത്ഥതയില്ലായ്മയെയാണ് ഈ സംഭവത്തിലൂടെ ചോദ്യം ചെയ്യുന്നത്.
വിവാദത്തിന് ആധാരം ഗ്രാൻഡ് പ്രിക്സ് സന്ദർശനം
കഴിഞ്ഞ വർഷം മെൽബണിൽ നടന്ന ഫോർമുല 1 ഓസ്ട്രേലിയൻ ഗ്രാൻഡ് പ്രീയിൽ പങ്കെടുക്കാനായി ഷെഫീൽഡ് ഷീൽഡ് മത്സരം ഖവാജ ഒഴിവാക്കിയിരുന്നു.
എന്നാൽ തനിക്ക് ഹാംസ്ട്രിംഗിന് പരിക്കേറ്റതുകൊണ്ടാണ് മത്സരത്തിൽ നിന്ന് വിട്ടുനിൽക്കുന്നത് എന്നായിരുന്നു ഖവാജയുടെ വാദം.
താൻ ഗ്രാൻഡ് പ്രിക്സിലേക്ക് പോകുന്നുണ്ടെന്നോ മത്സരത്തിൽ നിന്ന് വിട്ടുനിൽക്കുന്നതിന്റെ യഥാർത്ഥ കാരണമോ ഖവാജ ടീമിനെ അറിയിച്ചിരുന്നില്ലെന്ന് ഹീലി ആരോപിക്കുന്നു.
“അവൻ ഗ്രാൻഡ് പ്രിക്സിലേക്ക് പോകുന്ന സമയത്ത് എനിക്കോ ടീമിനോ യാതൊരു വിവരവുമില്ലായിരുന്നു,” ഹീലി പറഞ്ഞു.
തുടർന്ന് ക്വീൻസ്‌ലാൻഡ് മെഡിക്കൽ സ്റ്റാഫ് നടത്തിയ പരിശോധനയിൽ ഖവാജയ്ക്ക് പരിക്കുകളൊന്നുമില്ലെന്ന് വ്യക്തമായതായും ഹീലി വെളിപ്പെടുത്തി.
“ഞങ്ങളുടെ ഡോക്ടർമാരും ഹൈ-പെർഫോമൻസ് ഹെഡും ചേർന്ന് അവനെ പരിശോധിച്ചു. പരിക്കില്ലെന്നും കളിക്കാൻ യോഗ്യനാണെന്നും അവർ കണ്ടെത്തി.
എന്നാൽ ഉച്ചകഴിഞ്ഞ് സ്കാൻ ചെയ്യാൻ ആവശ്യപ്പെട്ടപ്പോൾ അവൻ അതിന് തയ്യാറായില്ല,” ഹീലി വ്യക്തമാക്കി.
നേരത്തെയും വിമർശനവുമായി ഹീലി
ടീമിനോടും സഹതാരങ്ങളോടുമുള്ള ഖവാജയുടെ പ്രതിബദ്ധതയില്ലായ്മ കടുത്ത നിരാശ ഉണ്ടാക്കുന്നുവെന്ന് ഹീലി കൂട്ടിച്ചേർത്തു. അഡ്‌ലെയ്ഡ് ഓവലിൽ നടന്ന മറ്റൊരു ക്വീൻസ്‌ലാൻഡ് മത്സരവും ഖവാജ ഒഴിവാക്കിയത് മുൻപ് ഹീലിയുടെ വിമർശനത്തിന് കാരണമായിരുന്നു.
ക്വീൻസ്‌ലാൻഡിനായി 64 ഫസ്റ്റ് ക്ലാസ് മത്സരങ്ങളിൽ നിന്ന് 4,317 റൺസും 55 ഏകദിനങ്ങളിൽ നിന്ന് 2,634 റൺസും നേടിയിട്ടുള്ള ഖവാജയുടെ മുൻകാല കരിയർ മികച്ചതാണെങ്കിലും, നിലവിലുണ്ടായ ഈ വാക്പോര് ഓസ്ട്രേലിയൻ ക്രിക്കറ്റ് സർക്കിളിൽ വലിയ ചർച്ചയായിരിക്കുകയാണ്.
