ക്രൈസ്റ്റ് ചർച്ച്: ന്യൂസിലൻഡിനെതിരായ രണ്ടാം ടി20 മത്സരത്തിലും ഇന്ത്യ വിജയം സ്വന്തമാക്കിയെങ്കിലും, യുവതാരം വൈഭവ് സൂര്യവംശിയുടെ ബാറ്റിങ് പൊസിഷനെച്ചൊല്ലി വിമർശനവുമായി മുൻ ഇന്ത്യൻ താരം മുരളി കാർത്തിക് രംഗത്ത്.
ഓപ്പണറായ വൈഭവിനെ ഇഷാൻ കിഷന്റെ അഭാവത്തിൽ വൺ ഡൗണായി (മൂന്നാം നമ്പർ) ഇറക്കിയ ടീം മാനേജ്‌മെന്റിന്റെ തീരുമാനത്തെയാണ് കാർത്തിക് ചോദ്യം ചെയ്തത്. സോണി സ്‌പോർട്‌സിലെ ചർച്ചയ്ക്കിടെയായിരുന്നു അദ്ദേഹത്തിന്റെ പ്രതികരണം.
മത്സരത്തിൽ സഞ്ജു സാംസൺ പുറത്തായതിന് പിന്നാലെ മൂന്നാം നമ്പറിലാണ് വൈഭവ് സൂര്യവംശി ക്രീസിലെത്തിയത്. എന്നാൽ 8 പന്തിൽ 4 റൺസ് മാത്രം എടുത്ത താരം, നാഥൻ സ്മിത്തിന്റെ പന്തിൽ എക്സ്ട്രാ കവറിൽ ഡാരിൽ മിച്ചലിന് ക്യാച്ച് നൽകി പുറത്താവുകയായിരുന്നു.
മുരളി കാർത്തിക്കിന്റെ വാക്കുകൾ ഇങ്ങനെ:
“വൈഭവ് സൂര്യവംശി എവിടെയാണ് മികവ് പുലർത്തുന്നത്? അവൻ ഒരു ഓപ്പണർ എന്ന നിലയിലാണ് മികച്ച പ്രകടനം കാഴ്ചവെച്ചിട്ടുള്ളത്. അവൻ ഇതുവരെ മിഡിൽ ഓർഡറിൽ ബാറ്റ് ചെയ്ത് ശീലിച്ചിട്ടില്ല.
അവൻ ഒരു കൊച്ചുകുട്ടിയാണ്, ഒരു പ്രത്യേക രീതിയിൽ മാത്രം ബാറ്റ് ചെയ്ത് ശീലിച്ചവൻ. അതുകൊണ്ടാണ് അനുഭവസമ്പന്നരായ കളിക്കാരെ ടീമിൽ നിലനിർത്തുന്നത്; അതുവഴി അവർക്ക് വ്യത്യസ്ത റോളുകൾ കൈകാര്യം ചെയ്യാൻ സാധിക്കും.
ഇന്ത്യ മത്സരം ജയിച്ചു എന്നത് വേറെ കാര്യം, എന്നാൽ സൂര്യവംശിയെ കളിപ്പിക്കുകയാണെങ്കിൽ അവൻ ഇന്ന് ഓപ്പൺ ചെയ്യണമായിരുന്നു,” കാർത്തിക് പറഞ്ഞു.
“സഞ്ജു സാംസൺ നിങ്ങളുടെ പ്രധാന കളിക്കാരനാണ്. അദ്ദേഹത്തിന് വ്യത്യസ്തമായ പൊസിഷനിൽ കളിക്കാൻ സാധിക്കും. ഒരു അനുഭവസമ്പന്നനായ കളിക്കാരനാണെങ്കിൽ ഇത്തരം റോളുകൾ ഏറ്റെടുക്കേണ്ടി വരും, പ്രത്യേകിച്ച് വൈഭവ് സൂര്യവംശിയെപ്പോലൊരു യുവതാരത്തെ ഉൾപ്പെടുത്തുമ്പോൾ.
വൈഭവിനെ മിഡിൽ ഓർഡറിലാണ് ബാറ്റ് ചെയ്യിക്കേണ്ടിയിരുന്നതെങ്കിൽ ശിവം ദുബെയ്ക്ക് പ്ലെയിങ് ഇലവനിൽ അവസരം നൽകാമായിരുന്നു,” താരം കൂട്ടിച്ചേർത്തു.
അഞ്ച് മത്സരങ്ങളുടെ പരമ്പരയിലെ ആദ്യ രണ്ട് മത്സരങ്ങളും വിജയിച്ച ഇന്ത്യ നിലവിൽ 2-0 ന് മുന്നിലാണ്. ഒക്ടോബർ 27-ന് വെല്ലിങ്ടണിലാണ് പരമ്പരയിലെ നിർണായകമായ മൂന്നാം മത്സരം നടക്കുന്നത്.
യുവതാരങ്ങളുടെ ബാറ്റിങ് പൊസിഷനിൽ മാനേജ്‌മെന്റ് മാറ്റങ്ങൾ വരുത്തുമോ എന്നാണ് ആരാധകർ ഉറ്റുനോക്കുന്നത്.
