ബ്യൂണസ് അയേഴ്‌‌സ്: അർജന്റീന ദേശീയ ഫുട്ബോൾ ടീമിന്റെ സൗഹൃദ മത്സരവുമായി ബന്ധപ്പെട്ട് വൻ വിവാദം. ആഫ്രിക്കൻ എതിരാളികളായ ബുർക്കിന ഫാസോയുമായി (Burkina Faso) നടന്ന മത്സരത്തിൽ അർജന്റീന എതിരില്ലാത്ത ഏഴ് ഗോളുകൾക്ക് വിജയിച്ചെങ്കിലും, മത്സരത്തിന് മുന്നോടിയായി എതിർ ടീം നേരിട്ട കടുത്ത യാത്രാ പ്രതിസന്ധിയും സംഘാടകരുടെ വീഴ്ചയും വൻ വിമർശനങ്ങൾക്കിടയാക്കിയിരിക്കുകയാണ്.
സെപ്റ്റംബർ 30-ന് മൊറോക്കോയിലെ കാസബ്ലങ്കയിൽ വെച്ച് ബുർക്കിന ഫാസോ താരങ്ങളുമായി പുറപ്പെടേണ്ടിയിരുന്ന വിമാനം സാങ്കേതിക തകരാറിനെ തുടർന്ന് അവസാന നിമിഷം റദ്ദാക്കുകയായിരുന്നു. വിമാനത്താവളത്തിൽ മണിക്കൂറുകളോളം കാത്തിരിക്കേണ്ടി വന്നതും യാത്രാ അനിശ്ചിതത്വവും ബുർക്കിന ഫാസോയുടെ സീനിയർ താരങ്ങളിൽ കടുത്ത അമർഷമുണ്ടാക്കി. നീണ്ട യാത്രയ്ക്ക് ശേഷം വിശ്രമമില്ലാതെ മത്സരത്തിനിറങ്ങാനാവില്ലെന്ന നിലപാടിൽ മുതിർന്ന താരങ്ങൾ ഉറച്ചുനിന്നു.
ഫുട്ബോൾ ഫെഡറേഷനുമായി നടന്ന ചർച്ചകൾ പരാജയപ്പെട്ടതോടെ, സൗഹൃദ മത്സരം ഉപേക്ഷിക്കേണ്ടിവരുമെന്ന സാഹചര്യം സംജാതമായി. തുടർന്ന് അടിയന്തരമായി അണ്ടർ-23 ടീമിലെ യുവതാരങ്ങളെ ടീമിലേക്ക് ഉൾപ്പെടുത്താൻ തീരുമാനിക്കുകയായിരുന്നു. അർജന്റീന ഫുട്ബോൾ ഫെഡറേഷനും സർക്കാരും ചേർന്ന് മണിക്കൂറുകൾക്കുള്ളിൽ ഇവർക്ക് വിസ നടപടികൾ പൂർത്തിയാക്കി നൽകി.
നീണ്ട 12 മണിക്കൂറിലധികം നീണ്ട അനിശ്ചിതത്വങ്ങൾക്കും യാത്രയ്ക്കുമൊടുവിൽ, മത്സരം തുടങ്ങാൻ വെറും അഞ്ച് മണിക്കൂർ മാത്രം ശേഷിക്കെയാണ് ബുർക്കിന ഫാസോ സംഘം ബ്യൂണസ് അയേഴ്‌സിൽ വിമാനമിറങ്ങിയത്. ലഗേജുകൾ മാറ്റി വെച്ച്, യാതൊരുവിധ വിശ്രമവുമില്ലാതെ അവർ എസ്റ്റാഡിയോ മോനുമെന്റൽ സ്റ്റേഡിയത്തിലെത്തി കളത്തിലിറങ്ങി.
മത്സരച്ചെലവുകൾ കുറയ്ക്കാനായി ശക്തരായ എതിരാളികൾക്ക് പകരം നിലവാരം കുറഞ്ഞ ടീമുകളെ സൗഹൃദ മത്സരങ്ങൾക്കായി തിരഞ്ഞെടുക്കുന്ന അർജന്റീന ഫുട്ബോൾ ഫെഡറേഷന്റെ (AFA) നയത്തിനെതിരെയും രൂക്ഷവിമർശനമുയർന്നിട്ടുണ്ട്. എളുപ്പത്തിൽ ഏഴ് ഗോളുകൾ നേടി അർജന്റീന ജയം ആഘോഷിച്ചെങ്കിലും, മത്സരത്തിന്റെ സംഘാടനത്തിലും എതിർ ടീമിനോട് കാണിച്ച സമീപനത്തിലും പ്രതിഷേധിച്ച് അർജന്റീന ആരാധകർ സോഷ്യൽ മീഡിയയിലടക്കം ഫെഡറേഷനെതിരെ രോഷം പ്രകടിപ്പിക്കുന്നുണ്ട്.
