ഞായറാഴ്ച പെട്ടെന്നുണ്ടായ സാങ്കേതിക തകരാറിനെ തുടർന്ന് പ്രവർത്തനരഹിതമായി ഫേസ്ബുക്ക്. അക്കൗണ്ടുകൾ ലോഗിൻ ചെയ്യാനും പ്ലാറ്റ്‌ഫോമിലെ പ്രധാന ഫീച്ചറുകൾ ഉപയോഗിക്കാനും സാധിക്കുന്നില്ലെന്നാണ് ഭൂരിഭാഗം ആളുകളും റിപ്പോർട്ട് ചെയ്യുന്നത്. ലോഗിൻ ചെയ്യാനും ഫേസ്ബുക്ക് ഉപയോഗിക്കാനും ശ്രമിക്കുമ്പോൾ അക്കൗണ്ട് ടെംപററിലി അൺഅവൈലബിൾ എന്നാണ് കാണിക്കുന്നത്.
ആപ്പിലൂടെയും വെബ്‌സൈറ്റിലൂടെയും ലോഗിൻ ചെയ്യാനുള്ള ശ്രമങ്ങൾ പരാജയപ്പെടുന്നതിനൊപ്പം, ന്യൂസ് ഫീഡ് അപ്‌ഡേറ്റുകൾ ലഭിക്കുന്നതിൽ കടുത്ത കാലതാമസമോ തടസമോ നേരിടുന്നതായും ഉപയോക്താക്കൾ വ്യക്തമാക്കുന്നു. കൂടാതെ, ചിത്രങ്ങളും വീഡിയോകളും അപ്‌ലോഡ് ചെയ്യാനും ഫേസ്ബുക്കുമായി ബന്ധിപ്പിച്ചിട്ടുള്ള മെസഞ്ചർ സർവീസ് വഴി സന്ദേശങ്ങൾ അയക്കാനും പലർക്കും സാധിക്കുന്നില്ല.
ഫേസ്ബുക്ക് അക്കൗണ്ട് ടെംപററിലി അൺഅവൈലബിൾ ആണെന്ന രീതിയിൽ ലഭിക്കുന്ന നോട്ടിഫിക്കേഷനുകൾ നിരവധി ഉപയോക്താക്കൾ എക്സിൽ പങ്കുവെച്ചു. ഈ സാങ്കേതിക തകരാറിൻ്റെ യഥാർഥ കാരണമെന്താണെന്നതിനെക്കുറിച്ചോ, സേവനങ്ങൾ എപ്പോൾ പൂർണമായി പുനഃസ്ഥാപിക്കുമെന്നതിനെക്കുറിച്ചോ ഫേസ്ബുക്കിൻ്റെ മാതൃകമ്പനിയായ മെറ്റ ഇതുവരെ ഔദ്യോഗിക വിശദീകരണങ്ങളോ പ്രസ്താവനകളോ പുറത്തുവിട്ടിട്ടില്ല.
