ഏകദിനത്തിൽ വെസ്റ്റ് ഇൻഡീസിനെതിരെ പുതിയ ചരിത്രം കുറിച്ച് ഇന്ത്യൻ താരം വിരാട് കോലി. വെസ്റ്റ് ഇൻഡീസിനെതിരെയുള്ള ആദ്യ ഏകദിനത്തിൽ സെഞ്ച്വറി നേടി റെക്കോഡുകൾ വാരിക്കൂട്ടിയ കോലി മറ്റൊരു നേട്ടവും തന്റെ പേരിലാക്കി മാറ്റി.
ഏകദിനത്തിൽ വെസ്റ്റ് ഇൻഡീസിനെതിരെ ഏറ്റവും കൂടുതൽ മത്സരങ്ങൾ കളിക്കുന്ന ഇന്ത്യൻ താരമായും കോലി മാറി. വിൻഡീസിനെതിരെ 44 മത്സരങ്ങളാണ് വിരാട് ഇതുവരെ കളിച്ചത്. വിൻഡീസിനെതിരെ 43 ഏകദിനത്തിൽ കളത്തിലിറങ്ങിയ മുൻ ഇന്ത്യൻ നായകൻ മുഹമ്മദ് അസറുദീനെയാണ് കോലി മറികടന്നത്.
തിരുവനന്തപുരം കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടന്ന പോരാട്ടത്തിൽ 88 പന്തിൽ പുറത്താവാതെ 139 റൺസ് നേടിയാണ് കോലി ടീമിന് വിജയം സമ്മാനിച്ചത്. 10 ഫോറുകളും 9 സിക്സുകളും കോലിയുടെ ബാറ്റിൽ നിന്നും പിറന്നു.
ഏകദിനത്തിൽ രണ്ട് വ്യത്യസ്ത ടീമുകൾക്കെതിരെ 10 സെഞ്ചുറികൾ നേടുന്ന ആദ്യത്തെ താരം കൂടിയാണ് വിരാട്. നേരത്തെ ശ്രീലങ്കക്കെതിരെയും കോലി 10 സെഞ്ച്വറികൾ സ്വന്തമാക്കിയിട്ടുണ്ട്.
മത്സരത്തിൽ വിൻഡീസ് ഉയർത്തിയ 295 റൺസ് ഇന്ത്യ രണ്ട് വിക്കറ്റ് നഷ്ടത്തിൽ അനായാസം മറികടക്കുകയായിരുന്നു. കോലിക്കൊപ്പം ക്യാപ്റ്റൻ ശുഭ്മൻ ഗില്ലിന്റെ സെഞ്ച്വറിയും ഇന്ത്യയുടെ വിജയത്തിൽ നിർണായകമായി. 108 പന്തിൽ 13 ഫോറുകളും ഒരു സിക്സും അടക്കം 110 റൺസാണ് ഗിൽ നേടിയത്.
വിൻഡീസ് നിരയിൽ തിളങ്ങിയത് ജസ്റ്റിൻ ഗ്രീവ്സാണ്. 108 പന്തുകളിൽ 101 റൺസാണ് താരം നേടിയത്. 12 ഫോറുകൾ അടങ്ങുന്നതായിരുന്നു ഇന്നിംഗ്സ്. അമീർ ജാങ്കോ 58 റൺസും നേടി.
ഇന്ത്യൻ ബൗളിംഗിൽ കുൽദീപ് യാദവ് നാല് വിക്കറ്റുകൾ വീഴ്ത്തിയപ്പോൾ പ്രസിദ്ധ് കൃഷ്ണ രണ്ട് വിക്കറ്റുകളും നിതീഷ് കുമാർ റെഡ്ഢി ഒരു വിക്കറ്റും നേടി.
