കൊച്ചി:വിനീത് ശ്രീനിവാസൻ സംവിധാനം ചെയ്ത ‘മലർവാടി ആർട്സ് ക്ലബ്ബ്’ എന്ന ചിത്രത്തിന്റെ ഓഡിഷൻ ക്യാമ്പിൽ നിന്ന് നിവിൻ പോളി എന്ന നടൻ ഉയർന്നുവന്ന ആവേശകരമായ ഓർമകൾ പങ്കുവെച്ച് നടൻ അജു വർഗീസ്.ആയിരക്കണക്കിന് അപേക്ഷകരിൽ നിന്ന് തിരഞ്ഞെടുക്കപ്പെട്ട 25 പേരിൽ നിന്നാണ് നിവിൻ പോളി തന്റെ പ്രകടനം കൊണ്ട് വിനീത് ശ്രീനിവാസനെയും കൂട്ടരെയും ഞെട്ടിച്ചത്.
ആലുവ-പെരുമ്പാവൂർ റോഡിലെ ഒരു മെൻസ് ഹോസ്റ്റലിലായിരുന്നു ചിത്രത്തിന്റെ മൂന്ന് ദിവസം നീണ്ട ഓഡിഷൻ ക്യാമ്പ് സംഘടിപ്പിച്ചത്. 25 പേരെ അഞ്ച് ഗ്രൂപ്പുകളാക്കി തിരിച്ച് ദിനംപ്രതി സ്കിറ്റുകളും ഗ്രൂപ്പ് സീനുകളും അവതരിപ്പിക്കേണ്ടതുണ്ടായിരുന്നു.
പൃഥ്വിരാജിന്റെ വർഗീസായി അമ്പരപ്പിക്കുന്ന പെർഫോമൻസ്
ഓഡിഷൻ ക്യാമ്പിലെ ഒരു ഉച്ചകഴിഞ്ഞുള്ള സെഷനിൽ നടന്ന സംഭവത്തെക്കുറിച്ച് അജു വർഗീസ് ഓർത്തെടുക്കുന്നത് ഇങ്ങനെയാണ്.
“എല്ലാവരും റിഹേഴ്സൽ ചെയ്യുന്നതിനിടെയാണ് ഒരു ഗംഭീര പെർഫോമൻസിന്റെ ശബ്ദം കേൾക്കുന്നത്. ഞാൻ ചെന്നു നോക്കുമ്പോൾ ‘തലപ്പാവ്’ എന്ന സിനിമയിൽ രാജു ചേട്ടൻ (പൃഥ്വിരാജ്) ചെയ്ത വർഗീസ് എന്ന കഥാപാത്രത്തിന്റെ പ്രകടനമാണ് അവിടെ നടക്കുന്നത്.അത്രയും കൺവിൻസിങ് ആയിട്ടാണ് അയാൾ അത് ചെയ്യുന്നത്.
ആദ്യം അത് നിവിനാണെന്ന് മനസിലായില്ല. വർഷങ്ങൾക്ക് മുൻപ് എനിക്ക് നിവിനെ പരിചയമുണ്ടായിരുന്നെങ്കിലും ആ താടിയിൽ പെട്ടെന്ന് തിരിച്ചറിഞ്ഞില്ല. എന്തൊരു കലക്കൻ പെർഫോമൻസ് എന്ന് മനസിൽ വിചാരിച്ചപ്പോഴാണ് ആളെ മനസിലായത്.”
“നമുക്ക് പ്രകാശനെ കിട്ടി!”
ഓഡിഷൻ ക്യാമ്പ് പൂർത്തിയായ ശേഷം വിനീത് ശ്രീനിവാസനുമായി സംസാരിച്ചപ്പോഴാണ് നിവിനെ പ്രകാശൻ എന്ന പ്രധാന കഥാപാത്രമായി വിനീത് ഉറപ്പിച്ച കാര്യം അജു അറിയുന്നത്. “നമുക്ക് പ്രകാശനെ കിട്ടി” എന്നാണ് വിനീത് അന്ന് സന്തോഷത്തോടെ പറഞ്ഞത്.
കാലിന് പരിക്കേറ്റ്, താടിയും നീട്ടി ക്യാമ്പിലേക്ക് എത്തിയ ആ യുവാവിന്റെ തകർപ്പൻ എൻട്രിയാണ് പിന്നീട് മലയാള സിനിമയിലെ ഏറ്റവും വലിയ ജനപ്രിയ താരങ്ങളിലൊരാളായി നിവിൻ പോളിയെ മാറ്റിയെടുത്തത്.
