മുംബൈ: ഐ.പി.എൽ 2027 മിനി ലേലത്തിന് മുന്നോടിയായി മുംബൈ ഇന്ത്യൻസ് (എം.ഐ) ഒഴിവാക്കിയ ഇന്ത്യൻ പേസർ ദീപക് ചാഹറിന് ലേലത്തിൽ ഇനിയും വൻ ഡിമാൻഡ് ഉണ്ടാകുമെന്ന് മുൻ ഇന്ത്യൻ താരവും ക്രിക്കറ്റ് നിരീക്ഷകനുമായ ആകാശ് ചോപ്ര. 34-കാരനായ ചാഹറിനെ സ്വന്തമാക്കാൻ ഫ്രാഞ്ചൈസികൾ 8 മുതൽ 9 കോടി രൂപ വരെ മുടക്കാൻ തയ്യാറാകുമെന്നാണ് ചോപ്രയുടെ പ്രവചനം. തന്റെ യൂട്യൂബ് ചാനലിലൂടെയാണ് അദ്ദേഹം ലേല സാധ്യതകൾ വിലയിരുത്തിയത്.
“ദീപക് ചാഹർ, ആവേശ് ഖാൻ, തുഷാർ ദേശ്പാണ്ഡെ എന്നിവരെയാണ് ടീമുകൾ ഒഴിവാക്കിയിരിക്കുന്നത്. ലേലത്തിൽ ഇവർ മൂവരും വലിയ നേട്ടമുണ്ടാക്കും. പഞ്ചാബ് കിങ്സിന് ഫാസ്റ്റ് ബൗളർമാരെ ആവശ്യമുണ്ട്; അവർ ലോക്കി ഫെർഗൂസണെ വിട്ടയച്ചു. ഡൽഹിയിൽ നിന്ന് മിച്ചൽ സ്റ്റാർക്ക് പോയി. മുഹമ്മദ് ഷാമി രാജസ്ഥാനിലേക്ക് എത്തിയതോടെ അവർ തുഷാർ ദേശ്പാണ്ഡെയെ റിലീസ് ചെയ്തു. ദീപക്കിനെയും ബോൾട്ടിനെയും ഒഴിവാക്കിയ മുംബൈയ്ക്കും ഇനി പേസർമാരെ വേണം,” ചോപ്ര വ്യക്തമാക്കി.
ആകാശ് ചോപ്ര പ്രവചിക്കുന്ന ലേലത്തുക (ഏകദേശ കണക്ക്):
താരം മുൻ ടീം പ്രതീക്ഷിക്കുന്ന ലേലത്തുക
ദീപക് ചാഹർ-മുംബൈ ഇന്ത്യൻസ് (9.25 കോടി)-₹8 – 9 കോടി
ആവേശ് ഖാൻ-ലഖ്നൗ സൂപ്പർ ജയന്റ്സ്-₹7 – 8 കോടി
തുഷാർ ദേശ്പാണ്ഡെ-രാജസ്ഥാൻ റോയൽസ് (6.50 കോടി)-₹7.50 കോടി (മുൻ തുകയേക്കാൾ വർധനവ്)
മുസ്തഫിസുർ റഹ്മാൻ-(ലഭ്യമാണെങ്കിൽ)-₹7 – 8 കോടി
ദീപക് ചാഹറിനെ എന്തിനാണ് മുംബൈ ഇന്ത്യൻസ് ഒഴിവാക്കിയതെന്ന് മനസ്സിലാകുന്നില്ലെന്നും, ലേലത്തിൽ ചാഹറും ആവേശ് ഖാനും തങ്ങളുടെ പഴയ വിലയ്ക്ക് അടുത്തുതന്നെ വിറ്റുപോകുമെന്നും ചോപ്ര വിലയിരുത്തി. രാജസ്ഥാൻ റോയൽസിൽ 6.50 കോടി രൂപ പ്രതിഫലം വാങ്ങിയിരുന്ന തുഷാർ ദേശ്പാണ്ഡെയ്ക്ക് ഇത്തവണ ശമ്പളവർധനവോടെ 7.50 കോടി രൂപ വരെ ലഭിക്കാൻ സാധ്യതയുണ്ടെന്നും അദ്ദേഹം കൂട്ടിച്ചേർത്തു.


