ലിസ്ബൺ: ക്രിസ്റ്റ്യാനോ റൊണാൾഡോയോട് സ്വന്തം രാജ്യമായ പോർച്ചുഗൽ കാണിക്കുന്നത് കടുത്ത നന്ദികേടാണെന്ന് മുൻ ബ്രസീൽ താരം ഫെലിപ്പ് മെലോ. റൊണാൾഡോയുടെ അമ്മ ഡൊളോറസ് അവെയ്റോ ഉന്നയിച്ച വിമർശനങ്ങൾക്ക് പൂർണ്ണ പിന്തുണയുമായി രംഗത്തെത്തിയ മെലോ, റൊണാൾഡോ ഇല്ലായിരുന്നെങ്കിൽ പോർച്ചുഗൽ ഫുട്ബോൾ ഇന്നീ കാണുന്ന നിലയിൽ എത്തുമായിരുന്നില്ലെന്നും തുറന്നടിച്ചു.
ഡൊളോറസ് അവെയ്റോയുടെ വിമർശനവും പശ്ചാത്തലവും
കഴിഞ്ഞ നവംബർ 5-ന്, 23 വർഷം നീണ്ട തന്റെ ഇതിഹാസ അന്താരാഷ്ട്ര കരിയറിന് റൊണാൾഡോ വിരാമം കുറിച്ചിരുന്നു. പോർച്ചുഗലിനായി 234 മത്സരങ്ങളിൽ നിന്ന് 146 ഗോളുകൾ നേടിയിട്ടുള്ള താരത്തിന് മുഖ്യ പരിശീലകൻ ജോർജ് ജീസസ്യമായുള്ള അഭിപ്രായവ്യത്യാസത്തെത്തുടർന്ന് ഒക്ടോബറിൽ ദേശീയ ക്യാമ്പ് വിടേണ്ടി വന്നിരുന്നു.
റൊണാൾഡോയുടെ വിരമിക്കലിന് ശേഷം സ്വന്തം തട്ടകമായ ബ്രാഗയിൽ നടന്ന ആദ്യ മത്സരത്തിൽ ഡെൻമാർക്കിനെതിരെ പോർച്ചുഗൽ 4-1 ന് ദയനീയ തോൽവി വഴങ്ങിയിരുന്നു.
മത്സരത്തിന്റെ ഏഴാം മിനിറ്റിൽ ആരാധകർ എഴുന്നേറ്റുനിന്ന് കൈയടിക്കുകയും, മുൻ ക്യാപ്റ്റന്റെ ഐക്കണിക് നമ്പർ 7 ജേഴ്സി ധരിച്ച് താരങ്ങൾ ആദരവ് അർപ്പിക്കുകയും ചെയ്തിരുന്നു. സ്വന്തം നാട്ടിൽ പോർച്ചുഗൽ നേരിടുന്ന ഏറ്റവും വലിയ തോൽവികളിൽ ഒന്നാണിത്.
ഈ മത്സരത്തിന് പിന്നാലെ സ്പോർട്ടിംഗിന്റെ എസ്റ്റാഡിയോ ജോസ് അൽവാലേഡിൽ നടന്ന ചടങ്ങിൽ മാധ്യമങ്ങളെ അഭിസംബോധന ചെയ്യവെയാണ് ഡൊളോറസ് അവെയ്റോ പോർച്ചുഗൽ ഫെഡറേഷനെതിരെ രൂക്ഷ വിമർശനം ഉന്നയിച്ചത്.
രാജ്യത്തിനായി ഇത്രയധികം നേട്ടങ്ങൾ സമ്മാനിച്ചിട്ടും റൊണാൾഡോയ്ക്ക് അർഹമായ ബഹുമാനം നൽകുന്നതിൽ ഫെഡറേഷൻ പരാജയപ്പെട്ടുവെന്ന് അവർ തുറന്നടിച്ചു.
ഫെലിപ്പ് മെലോയുടെ രൂക്ഷ പ്രതികരണം
ബ്രസീലിനായി 22 മത്സരങ്ങളും, യുവന്റസ്, ഇന്റർ മിലാൻ തുടങ്ങിയ പ്രമുഖ ക്ലബ്ബുകൾക്കുവേണ്ടിയും കളിച്ചിട്ടുള്ള ഫെലിപ്പ് മെലോ, സമൂഹമാധ്യമങ്ങളിലൂടെയാണ് റൊണാൾഡോയ്ക്കുള്ള പിന്തുണ അറിയിച്ചത്.
“ക്രിസ്റ്റ്യാനോ റൊണാൾഡോയെപ്പോലുള്ള ഒരു ഇതിഹാസത്തോട് പോർച്ചുഗൽ ചെയ്തത് അപമാനകരമാണ്. ഇത് തികച്ചും അസംബന്ധമായ നന്ദികേടാണ്.
ക്രിസ്റ്റ്യാനോ ആരാണെന്ന് അവർ മറന്നുപോയതായി തോന്നുന്നു. റൊണാൾഡോയുടെ വരവിന് മുമ്പ് പോർച്ചുഗൽ ഫുട്ബോൾ ചരിത്രത്തിൽ പ്രധാനപ്പെട്ട കിരീടങ്ങൾ നേട്ടങ്ങൾ ഒന്നും തന്നെ ഉണ്ടായിരുന്നില്ല,” മെലോ വ്യക്തമാക്കി.
റൊണാൾഡോയുടെ കാലഘട്ടത്തിലാണ് പോർച്ചുഗൽ 2016-ലെ യൂറോ കപ്പും രണ്ട് യുവേഫ നേഷൻസ് ലീഗ് കിരീടങ്ങളും സ്വന്തമാക്കിയത്.
സ്പോർട്ടിംഗ് ക്ലബ്ബ് റൊണാൾഡോയ്ക്ക് അർഹമായ ആദരവും അംഗീകാരവും നൽകുന്നതിനെ പ്രശംസിച്ച മെലോ തന്റെ കുറിപ്പ് അവസാനിപ്പിച്ചത് ഇങ്ങനെയാണ്:
“ക്രിസ്റ്റ്യാനോ റൊണാൾഡോയെ ബഹുമാനിക്കുക. ക്രിസ്റ്റ്യാനോ റൊണാൾഡോ ഇല്ലായിരുന്നെങ്കിൽ നിങ്ങൾ ഒന്നുമല്ലായിരുന്നു. അതാണ് എന്റെ ചിന്താഗതി.”


