ലണ്ടൻ: ബ്രിട്ടീഷ് മാധ്യമപ്രവർത്തകനും കടുത്ത ക്രിസ്റ്റ്യാനോ റൊണാൾഡോ ആരാധകനുമായ പിയേഴ്‌സ് മോർഗൻ വെളിപ്പെടുത്തിയ റൊണാൾഡോയുടെ വാട്ട്‌സ്ആപ്പ് മെസ്സേജ് കായിക ലോകത്ത് വൻ ചിരിയും ചർച്ചയുമായി മാറുന്നു. ടോക്ക്സ്‌പോർട്ട് പണ്ഡിറ്റും മുൻ ക്രിസ്റ്റൽ പാലസ് ചെയർമാനുമായ സൈമൺ ജോർദാനെ പരിഹസിച്ച് റൊണാൾഡോ അയച്ച സ്വകാര്യ മെസ്സേജാണ് മോർഗൻ പരസ്യമാക്കിയത്.
യൂസേബിയോയെക്കാളും ഡീഗോ മറഡോണയെക്കാളും മികച്ച താരമാണ് റൊണാൾഡോ എന്ന് പിയേഴ്‌സ് മോർഗൻ ഈയിടെ അവകാശപ്പെട്ടിരുന്നു. എന്നാൽ ഇതിനോട് കടുപ്പമേറിയ ഭാഷയിൽ പ്രതികരിച്ച സൈമൺ ജോർദാൻ, “അദ്ദേഹം നല്ല കളിക്കാരനാണെന്ന് എല്ലാവർക്കും അറിയാം, പക്ഷേ നിങ്ങൾ റൊണാൾഡോയുടെ ആരാധന അവസാനിപ്പിച്ച് കാര്യങ്ങളെ വസ്തുനിഷ്ഠമായി കാണാൻ പഠിക്കണം” എന്ന് വിമർശിച്ചു.
“ആപ്പിൾ പോലെയുണ്ട് ആ മുഖം!” – റൊണാൾഡോയുടെ കിടിലൻ മറുപടി
സൈമൺ ജോർദാൻ നടത്തിയ ഈ വിമർശനത്തിന്റെ വീഡിയോ ക്ലിപ്പ് പിയേഴ്‌സ് മോർഗൻ നേരിട്ട് റൊണാൾഡോയ്ക്ക് വാട്ട്‌സ്ആപ്പിൽ അയച്ചുകൊടുത്തു. വീഡിയോ കണ്ട അൽ-നാസർ ക്യാപ്റ്റൻ നൽകിയ ചിരിയുണർത്തുന്ന മറുപടി ഇതാണ്:
“ആ മിടുക്കനോട് ബോട്ടോക്‌സ് ഇൻജക്ഷൻ എടുക്കുന്നത് നിർത്താൻ പറയൂ… അദ്ദേഹത്തിന്റെ മുഖം കണ്ടാൽ ഒരു തിളങ്ങുന്ന ആപ്പിൾ പോലെ തോന്നും!”
ബുധനാഴ്ച (ഒക്ടോബർ 7) ജേസൺ കാൻഡിയുമായുള്ള ഷോയ്ക്കിടെയാണ് പിയേഴ്‌സ് മോർഗൻ റൊണാൾഡോ അയച്ച ഈ സന്ദേശം പരസ്യമാക്കിയത്. “സൈമൺ ജോർദാൻ, നിങ്ങളൊരു മൃദുലവും സംശയാസ്പദവുമായ മുഖമുള്ള ആപ്പിളാണ്! 20 വർഷം മുമ്പ് സ്വാഭാവികമായ സൗന്ദര്യമുണ്ടായിരുന്ന ആളാണ് നിങ്ങൾ” എന്ന് കൂട്ടിച്ചേർത്ത് മോർഗൻ ലൈവിൽ ജോർദാനെ വീണ്ടും കളിയാക്കി.
അതേസമയം, ലയണൽ മെസ്സിയേക്കാൾ മികച്ച എക്കാലത്തെയും വലിയ അർജന്റീനിയൻ താരം ഡീഗോ മറഡോണയാണെന്ന് താൻ വിശ്വസിക്കുന്നതായി പിയേഴ്‌സ് മോർഗൻ ഈ ആഴ്ച ആദ്യം വ്യക്തമാക്കിയതും വലിയ ചർച്ചയായിരുന്നു.
