തിരുവനന്തപുരം: കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടന്ന വെസ്റ്റ് ഇൻഡീസിനെതിരായ ഒന്നാം ഏകദിനത്തിൽ ഇന്ത്യ എട്ട് വിക്കറ്റിന്റെ തകർപ്പൻ ജയം സ്വന്തമാക്കിയെങ്കിലും, മലയാളി താരം സഞ്ജു സാംസണിന്റെ അഭാവം കളി കാണാനെത്തിയ ആരാധകർക്ക് വലിയ നിരാശയായി.
എന്നാൽ സ്വന്തം തട്ടകത്തിൽ സഞ്ജു ഇല്ലായിരുന്നിട്ടും ഗാലറിയിൽ സഞ്ജു സാംസണിന്റെ പേര് മുഴങ്ങിക്കേട്ട നിമിഷങ്ങൾക്കായിരുന്നു കാര്യവട്ടം സാക്ഷ്യം വഹിച്ചത്.
ഇന്ത്യൻ ഇന്നിങ്സിലെ അവസാന ഘട്ടത്തിൽ റുതുരാജ് ഗെയ്ക്വാദ് ബാറ്റ് ചെയ്യാൻ ക്രീസിലേക്ക് എത്തിയപ്പോഴാണ് സ്റ്റേഡിയത്തിലുടനീളം ആരാധകർ “സഞ്ജു സഞ്ജു” എന്ന് ആർത്തുവിളിച്ചത്.
ഐപിഎല്ലിൽ ചെന്നൈ സൂപ്പർ കിങ്സിന്റെ നായകനാണ് റുതുരാജ് ഗെയ്ക്വാദ്. ചെന്നൈ താരമായ റുതുരാജിനെ കണ്ടതോടെയാണ് ആരാധകർ സഞ്ജുവിനായി വീണ്ടും മുദ്രാവാക്യം വിളികളുയർത്തിയത്.
സ്വന്തം മണ്ണിലെ ഈ മത്സരത്തിൽ സഞ്ജു സാംസൺ ഇറങ്ങിയിരുന്നെങ്കിൽ കാണികൾക്കത് അവിസ്മരണീയ നിമിഷമായി മാറുമായിരുന്നു.
നിലവിൽ ഏഷ്യൻ ഗെയിംസ് ക്രിക്കറ്റ് മത്സരങ്ങൾക്കായി ജപ്പാനിലാണ് സഞ്ജു സാംസൺ ഉള്ളത്. അതുകൊണ്ട് തന്നെയാണ് താരത്തിന് കാര്യവട്ടത്തെ മത്സരത്തിൽ പങ്കെടുക്കാൻ സാധിക്കാതെ പോയത്.
കാര്യവട്ടത്ത് വിരാട് കോഹ്ലി – ശുഭ്മാൻ ഗിൽ വെടിക്കെട്ട്
സ്വന്തം മണ്ണിൽ സഞ്ജുവിനെ മിസ് ചെയ്തെങ്കിലും ആരാധകരെ ആവേശത്തിലാഴ്ത്തുന്ന ബാറ്റിങ് പ്രകടനമാണ് കാര്യവട്ടത്ത് ഇന്ത്യൻ താരങ്ങൾ പുറത്തെടുത്തത്.
വിരാട് കോഹ്ലിയുടെയും (139*) ശുഭ്മാൻ ഗില്ലിന്റെയും (110) തകർപ്പൻ സെഞ്ചുറികളുടെ കരുത്തിൽ ഇന്ത്യ സുഗമമായി വിജയ ലക്ഷ്യം മറികടന്നു.
ആദ്യം ബാറ്റ് ചെയ്ത വെസ്റ്റ് ഇൻഡീസ് 7 വിക്കറ്റിന് 295 റൺസെടുത്തപ്പോൾ, 41.4 ഓവറിൽ രണ്ട് വിക്കറ്റ് മാത്രം നഷ്ടപ്പെടുത്തി 300 റൺസുമായി ഇന്ത്യ ലക്ഷ്യത്തിലെത്തി.
88 പന്തിൽ 10 ഫോറും 9 സിക്സറും സഹിതം 157.95 സ്ട്രൈക്ക് റേറ്റിലായിരുന്നു കോഹ്ലിയുടെ റൺവേട്ട. തുടർച്ചയായ സിക്സറുകളിലൂടെയാണ് കോഹ്ലി തന്റെ സെഞ്ചുറിയും ഇന്ത്യയുടെ വിജയറൺസും പൂർത്തിയാക്കിയത്.
ക്യാപ്റ്റൻ ശുഭ്മാൻ ഗിൽ 108 പന്തിൽ 13 ഫോറും ഒരു സിക്സുമടക്കം 110 റൺസെടുത്തു. രോഹിത് ശർമ 35 പന്തിൽ 32 റൺസ് നേടിയപ്പോൾ റുതുരാജ് ഗെയ്ക്വാദ് 13 റൺസുമായി പുറത്താകാതെ നിന്നു.
ആരാധകരുടെ പ്രതീക്ഷ ഇനി ഏഷ്യൻ ഗെയിംസ് സെമി
കാര്യവട്ടത്ത് കളി കാണാൻ സാധിച്ചില്ലെങ്കിലും ഏഷ്യൻ ഗെയിംസിൽ സഞ്ജുവിന്റെ തകർപ്പൻ പ്രകടനം കാണാമെന്ന പ്രതീക്ഷയിലാണ് ആരാധകർ.
ക്വാർട്ടർ ഫൈനലിൽ അഫ്ഗാനിസ്ഥാനെതിരെ ഇന്ത്യയുടെ കളി മഴ കാരണം നടന്നില്ലെങ്കിലും റാങ്കിങ്ങിൽ മുന്നിലുള്ള ഇന്ത്യ സെമിയിലേക്ക് മാർച്ച് ചെയ്തിരിക്കുകയാണ്.
ഇനി സെമിയിൽ സഞ്ജു സാംസൺ ഓപ്പണറുടെ റോളിൽ ഇറങ്ങി വലിയ സ്കോർ കണ്ടെത്തുമെന്നാണ് ആരാധകരുടെ പ്രതീക്ഷ.
