ഫസ്റ്റ് ക്ലാസ് ക്രിക്കറ്റിൽ ചരിത്രം കുറിച്ച് മിസോറാം താരം ചിന്മയ് സുതർ. രഞ്ജി ട്രോഫിയിൽ നാഗാലാൻഡിനെതിരെ 400 റൺസ് നേടിയാണ് താരം തിളങ്ങിയത്. 517 പന്തുകളിൽ നിന്നും പുറത്താവാതെ 400 റൺസാണ് താരം സ്വന്തമാക്കിയത്. 46 ഫോറുകളും ഏഴ് സിക്സുകളും അടങ്ങുന്നതാണ് മിസോറാം താരത്തിന്റെ പ്രകടനം.
രഞ്ജി ട്രോഫിയിലെ രണ്ടാമത്തെ ഉയർന്ന സ്കോറാണ് ചിന്മയ് നേടിയത്. പൃഥ്വി ഷായെ മറികടന്നാണ് താരത്തിന്റെ നേട്ടം. 2023ൽ 379 റൺസായിരുന്നു പൃഥ്വി ഷാ നേടിയിരുന്നത്.
ഫസ്റ്റ് ക്ലാസ് ക്രിക്കറ്റിൽ 400 റൺസ് നേടുന്ന രണ്ടാമത്തെ ഇന്ത്യൻ താരമാണ് ചിന്മയ് സുതർ. ബി.ബി നിംബാൽക്കറാണ് ആദ്യമായി ഈ നേട്ടം കൈവരിച്ച ഇന്ത്യക്കാരൻ. 1948ൽ മഹാരാഷ്ട്രക്ക് വേണ്ടി കത്തിയവാറിനെതിരെയായിരുന്നു നിംബാൽക്കർ 400 കടന്നത്. രഞ്ജി ട്രോഫിയിൽ ഏറ്റവും ഉയർന്ന വ്യക്തിഗത സ്കോർ 443 റൺസ് നേടിയ നിംബാൽക്കറുടെ പേരിലാണ്.
തന്റെ മൂന്നാം ഫസ്റ്റ് ക്ലാസ് ഇന്നിംഗ്സിലാണ് 400 റൺസ് പിറന്നത്. മണിപ്പൂരിനെതിരെ റാഞ്ചിയിൽ അരങ്ങേറ്റം കുറിച്ച താരം ആദ്യ ഇന്നിംഗ്സിൽ 33 റൺസ് നേടിയപ്പോൾ രണ്ടാം ഇന്നിംഗ്സിൽ 99 റൺസിനും പുറത്തായി.
മത്സരത്തിൽ ചിന്മയ് സുതർ 400 കടന്ന ഉടനെ തന്നെ മിസോറാം ഇന്നിംഗ്സ് ഡിക്ലയർ ചെയ്തു. ഒമ്പത് വിക്കറ്റ് നഷ്ടത്തിൽ 581 റൺസ് എന്ന നിലയിലാണ് മിസോറാം ഒന്നാം ഇന്നിംഗ്സ് അവസാനിപ്പിച്ചത്.
