അഫ്ഗാനിസ്ഥാനെതിരായ ടി-20 പരമ്പര തൂത്തുവാരി ഇന്ത്യ. ഡൽഹി അരുൺ ജെയ്റ്റ്ലി സ്റ്റേഡിയത്തിൽ നടന്ന അവസാന മത്സരത്തിൽ 127 റൺസിന്റെ കൂറ്റൻ വിജയമാണ് ഇന്ത്യ സ്വന്തമാക്കിയത്. മത്സരത്തിനിടെ എതിർ ടീം ക്യാപ്റ്റനെ ചേർത്തുപിടിച്ച ഇന്ത്യൻ താരങ്ങളുടെ മാതൃകാപരമായ പ്രവർത്തിയും കായിക ലോകത്ത് വലിയ ചർച്ചയായിട്ടുണ്ട്.
പരമ്പര തൂത്തുവാരിയതിന് പിന്നാലെ അഫ്ഗാൻ നായകൻ ഇബ്രാഹിം സദ്രാനെ ഇന്ത്യൻ ടീമിന്റെ വിജയാഘോഷത്തിലും ട്രോഫിക്കൊപ്പമുള്ള ഫോട്ടോയിലും പങ്കാളിയാക്കി ഇന്ത്യൻ ക്യാപ്റ്റൻ ശ്രേയസ് അയ്യർ. തോൽവിയുടെ നിരാശയിലായിരുന്ന എതിർ ടീം ക്യാപ്റ്റനെ ഹൃദയത്തോട് ചേർത്തുപിടിച്ച ഈ മനോഹര നിമിഷത്തിന് പിന്നിൽ മലയാളി താരം സഞ്ജു സാംസണിന്റെ മാസ്റ്റർ മൈൻഡും ഉണ്ടായിരുന്നു എന്നത് ആരാധകരെ ആവേശത്തിലാഴ്ത്തിയിരിക്കുകയാണ്.
സഞ്ജുവിന്റെ ആ നിർദ്ദേശം:
ഇന്ത്യൻ ടീം ട്രോഫിയുമായി ഫോട്ടോയ്ക്ക് തയ്യാറെടുക്കുന്നതിനിടെ സഞ്ജു സാംസൺ നൽകിയ നിർദ്ദേശപ്രകാരമാണ് ക്യാപ്റ്റൻ ശ്രേയസ് അയ്യർ അഫ്ഗാൻ ക്യാപ്റ്റനെ ഫോട്ടോയ്ക്കായി അങ്ങോട്ട് വിളിച്ചത്. ഇതിന്റെ വീഡിയോ സാമൂഹിക മാധ്യമങ്ങളിൽ വലിയ രീതിയിൽ തരംഗമായിരിക്കുകയാണണ്. മുൻപ് 2018-ൽ ബെംഗളൂരുവിൽ വെച്ച് അജിൻക്യ രഹാനെയും സമാനമായ രീതിയിൽ അഫ്ഗാൻ ടീമിനെ വിജയമാഘോഷത്തിൽ പങ്കെടുപ്പിച്ചത് ക്രിക്കറ്റ് ആരാധകർ ഓർത്തെടുക്കുന്നുണ്ട്.
അഭിഷേക് ശർമയുടെ വെടിക്കെട്ട് സെഞ്ച്വറി:
മത്സരത്തിൽ ആദ്യം ബാറ്റ് ചെയ്ത ഇന്ത്യ 222 റൺസിന്റെ കൂറ്റൻ വിജയലക്ഷ്യമാണ് അഫ്ഗാനിസ്ഥാനു മുന്നിൽ വെച്ചത്. വെടിക്കെട്ട് ബാറ്റിങ് കാഴ്ചവെച്ച സൂപ്പർ താരം അഭിഷേക് ശർമ 34 പന്തിൽ 108 റൺസ് നേടി തിളങ്ങി. 11 കൂറ്റൻ സിക്സുകളും ഒമ്പത് ഫോറുകളും അടങ്ങുന്നതായിരുന്നു അദ്ദേഹത്തിന്റെ പ്രകടനം. മലയാളി താരം സഞ്ജു സാംസൺ 35 പന്തിൽ രണ്ട് ഫോറും നാല് സിക്സറുകളും സഹിതം 50 റൺസ് നേടി മികച്ച പിന്തുണ നൽകി.
മറുപടി ബാറ്റിങ്ങിനിറങ്ങിയ അഫ്ഗാനിസ്ഥാൻ 94 റൺസിന് പുറത്താവുകയായിരുന്നു. ഇന്ത്യയ്ക്കായി ബൗളിങ്ങിൽ നിതീഷ് കുമാർ റെഡ്ഡിയും രവി ബിഷ്ണോയിയും മൂന്ന് വിക്കറ്റ് വീതവും, അക്സർ പട്ടേൽ രണ്ട് വിക്കറ്റും, ജസ്പ്രീത് ബുംറയും യാഷ് താക്കൂറും ഓരോ വിക്കറ്റ് വീതവും വീഴ്ത്തി.
അടുത്ത ലക്ഷ്യം ഏഷ്യൻ ഗെയിംസ്:
അഫ്ഗാനിസ്ഥാനെതിരായ പരമ്പര വിജയത്തിന് ശേഷം ശ്രേയസ് അയ്യരുടെയും സംഘത്തിന്റെയും അടുത്ത ലക്ഷ്യം ഏഷ്യൻ ഗെയിംസാണ്. ഇതിന്റെ മുന്നോടിയായി സെപ്റ്റംബർ 22-ന് ഇന്ത്യ ജപ്പാനെതിരെ ഒരു ടി-20 മത്സരവും കളിക്കും.
