കേപ്ടൗണ്‍: ഇന്ത്യന്‍ പുരുഷ ടീം ആദ്യം നാഗ്പ്പൂരിലും പിറകെ ഡല്‍ഹി ഫിറോസ് ഷാ കോട്‌ലയിലും ഓസ്‌ട്രേലിയക്കാരെ മൂന്ന് ദിവസത്തിനകം കശക്കി ബോര്‍ഡര്‍-ഗവാസ്‌ക്കര്‍ ട്രോഫി നിലനിര്‍ത്തിയവരാണ്. പുരുഷ വിജയം നല്‍കുന്ന ആത്മവിശ്വാസത്തില്‍ ഇന്ത്യന്‍ വനിതാ ടീം ഇന്ന് ടി-20 ലോകകപ്പ് സെമി ഫൈനലില്‍ ഓസീസ് വനിതകളെ നേരിടുന്നു. വനിതാ ക്രിക്കറ്റിലെ അജയ്യരാണ് കങ്കാരുക്കള്‍. അവരെ പ്രയാസപ്പെടുത്തുക എളുപ്പമല്ല. ഇന്ത്യക്ക് ഇത് വരെ ടി-20 ലോകകപ്പ് കിട്ടാതിരിക്കാന്‍ കാരണവും ഓസ്‌ട്രേലിയക്കാര്‍ തന്നെ. 2020 ലെ ഫൈനലില്‍ ഇന്ത്യയെ തരിപ്പണമാക്കിയായിരുന്നു ഓസ്‌ട്രേലിയക്കാര്‍ കിരീടം സ്വന്തമാക്കിയത്. ഇത്തവണയും ഓസ്‌ട്രേലിയന്‍ പ്രേതം ഇന്ത്യയെ വിരട്ടുമോ എന്നതാണ് ചോദ്യം. ഹര്‍മന്‍പ്രീത് കൗര്‍ നയിക്കുന്ന ഇന്ത്യന്‍ സംഘം ദക്ഷിണാഫ്രിക്കന്‍ മണ്ണില്‍ എത്തിയ ശേഷം ഗംഭീര പ്രകടനമാണ് നടത്തുന്നത്. ഐ.സി.സി അണ്ടര്‍ 19 വനിതാ ലോകകപ്പില്‍ കിരീടം സ്വന്തമാക്കിയ സംഘത്തിലെ ചിലരും സീനിയര്‍ സംഘത്തിലെ ചിലരും ചേര്‍ന്നതാണ് ഇന്ത്യന്‍ സംഘം. പാക്കിസ്താനെ തരിപ്പണമാക്കി ആരംഭിച്ച ഇന്ത്യ വിന്‍ഡീസിനെയും മറികടന്ന് ഇംഗ്ലണ്ടിന് മുന്നിലെത്തിയപ്പോള്‍ തല താഴ്ത്തി. എന്നാല്‍ നിര്‍ണായക മല്‍സരത്തില്‍ അയര്‍ലന്‍ഡിനെ മഴ നിയമത്തില്‍ കീഴടക്കി. പക്ഷേ യഥാര്‍ത്ഥ പോരാട്ടം ഇന്നാണ്.

കഴിഞ്ഞ ലോകകപ്പ് ഓസ്‌ട്രേലിയയില്‍ നടന്നപ്പോള്‍ ഉദ്ഘാടന മല്‍സരത്തില്‍ ഇന്ത്യ സിഡ്‌നിയില്‍ ഓസ്‌ട്രേലിയക്കാരെ തകര്‍ത്തിരുന്നു. എന്നാല്‍ മെല്‍ബണില്‍ ഫൈനലില്‍ നേര്‍ക്കുനേര്‍ വന്നപ്പോള്‍ ഓസ്‌ട്രേലിയക്കാര്‍ 85 റണ്‍സിന് പകരം വീട്ടി. ഇന്ത്യയും ഓസ്‌ട്രേലിയയും എപ്പോള്‍ ഏറ്റുമുട്ടുമ്പോഴും അതില്‍ തീയും പുകയുമുണ്ടാവാറുണ്ട്. പക്ഷേ വിജയ ശരാശരിയില്‍ എന്നും മുന്നില്‍ ഓസ്‌ട്രേലിയക്കാരാണ്. ഈ ലോകകപ്പില്‍ ഇത് വരെ ഓസ്‌ട്രേലിയ വെല്ലുവിളിക്കപ്പെട്ടിട്ടില്ല. ഇന്ത്യയെ ഇംഗ്ലണ്ട് വെല്ലുവിളിച്ചപ്പോള്‍ ഹര്‍മനും സംഘവും തല താഴ്ത്തിയിരുന്നു.: സ്മൃതി മന്ദാന, ജെമീമ റോഡ്രിഗസ്, റിച്ചാ ഘോഷ് എന്നിവരാണ് ഇത്തവണ ഇന്ത്യയുടെ ബാറ്റിംഗ് കരുത്ത്. ഇവരില്‍ റിച്ച മധ്യനിരയില്‍ കരുത്തയാണ്. സ്മൃതി മികവിലായിരുന്നു ഇന്ത്യ അവസാന മല്‍സരം പിന്നിട്ടത്. ഷഫാലി വര്‍മയാണ് ഇന്ത്യക്ക് നല്ല തുടക്കം നല്‍കാറ്. പക്ഷേ സ്ഥിരതയില്‍ ഷഫാലി പിറകിലാണ്. 33, 28, 8, 24 എന്നിങ്ങനെയായിരുന്നു ഷഫാലിയുടെ സ്‌ക്കോര്‍. അണ്ടര്‍ 19 ടീം നായികയില്‍ നിന്നും നല്ല തുടക്കം കിട്ടിയാല്‍ അത് ഉപയോഗപ്പെടുത്താന്‍ ജെമീമക്കും ഹര്‍മന്‍പ്രീതിനും റിച്ചക്കും സ്മൃതിക്കുമാവും. ബൗളിംഗില്‍ രേണുകാ സിംഗാണ് ഇന്ത്യയുടെ കരുത്ത്. മെഗ്‌ലാനിംഗ് നയിക്കുന്ന ഓസീസ് സംഘത്തില്‍ അലീസ ഹീലി, ബെത്ത് മൂണേ, ആഷ്‌ലെ ഗാര്‍ഡ്‌നര്‍ എന്നിവരെല്ലാം കരുത്തരാണ്.