തിരക്ക് നിയന്ത്രിക്കാന്‍ നിലക്കലിലും ഇടത്താവളങ്ങളിലും വാഹനങ്ങള്‍ തടഞ്ഞുവച്ചതോടെ വെള്ളവും ഭക്ഷണവും കിട്ടാതെ മണിക്കൂറുകളോളം വലഞ്ഞ് തീര്‍ത്ഥാടകര്‍. പന്തളം വലിയ കോയിക്കല്‍ ക്ഷേത്രത്തില്‍ ഇരുമുടിക്കെട്ട് അഴിച്ച് നെയ്യഭിഷേകം നടത്തി നൂറുകണക്കിനുപേര്‍ തീര്‍ത്ഥാടനം പാതിവഴിയില്‍ ഉപേക്ഷിച്ചു മടങ്ങി.
പത്ത് മണിക്കൂറിലേറെ നേരം വഴിയില്‍ കാത്തു നിന്നിട്ടും ശബരിമല ദര്‍ശനം കിട്ടാതെയാണ് തീര്‍ഥാടകര്‍ മടങ്ങുന്നത്. തിരക്ക് മൂലം അപ്പാച്ചിമേട് എത്തിക്കഴിഞ്ഞാന്‍ മുന്നോട്ടുപോകാന്‍ കഴിയാത്ത അവസ്ഥയാണ്. ശബരിപീഠം മുതല്‍ ക്യൂവാണ്. തിരക്കിനെ തുടര്‍ന്ന് ഇന്നലെ വഴിയില്‍ തടഞ്ഞുനിര്‍ത്തിയവരെല്ലാം ഇന്നാണ് എത്തുന്നത്. ഇന്നത്തെ ബുക്കിങ്ങിലുള്ളവര്‍ കൂടിയെത്തുന്നതോടെ തിരക്ക് ഇനിയും വര്‍ധിക്കും.