കോട്ടയം ഏറ്റുമാനൂര്‍ കണപ്പുരയില്‍ കുടുംബ വഴക്കിനെ തുടര്‍ന്ന് ഭാര്യയും ഭര്‍ത്താവും കിണറ്റില്‍ ചാടി. ഭാര്യ ചാടിയതിന് പിന്നാലെ ഭര്‍ത്താവും ചാടുകയായിരുന്നു.
കണപ്പുര സ്വദേശി ബിനുവും ഭര്‍ത്താവ് ശിവരാജുമാണ് കിണറ്റില്‍ ചാടിയത്.

കോട്ടയത്ത് നിന്ന് ഫയര്‍ഫോഴ്‌സ് യൂണിറ്റ് എത്തി കിണറ്റില്‍ നിന്ന് പുറത്തെത്തിച്ചു. തുടര്‍ന്ന് ഇരുവരേയും ആശുപത്രിയില്‍ പ്രവേശിപ്പിച്ചു. ഭര്‍ത്താവിന്റെ കാലിന് പരിക്കേറ്റിട്ടുണ്ട്.

കരുവന്നൂര്‍ ബാങ്ക് തട്ടിപ്പ് കേസില്‍ നാലുവര്‍ഷമായിട്ടും കുറ്റപത്രം സമര്‍പ്പിക്കാത്തതില്‍ വീണ്ടും ക്രൈംബ്രാഞ്ചിനെതിരെ വിമര്‍ശനവുമായി ഹൈകോടതി. കേസിലെ പല രേഖകളും ഇ.ഡി കസ്റ്റഡിയിലായതിനാലാണ് അന്വേഷണം പൂര്‍ത്തീകരിക്കാനാവാത്തതെന്ന സര്‍ക്കാര്‍ വാദത്തില്‍ അതൃപ്തി രേഖപ്പെടുത്തിയാണ് ജസ്റ്റിസ് ഡി.കെ. സിങ് രൂക്ഷ വിമര്‍ശനമുന്നയിച്ചത്.

ഇ.ഡി റിപ്പോര്‍ട്ട് കോടതിയില്‍ സമര്‍പ്പിച്ചെന്ന് കോടതി പറഞ്ഞു. ക്രൈംബ്രാഞ്ചിന്റെ പക്കലുള്ള കേസ് സി.ബി.ഐക്ക് വിടേണ്ടതാണെന്നും കോടതി വാക്കാല്‍ പറഞ്ഞു. നിലവിലെ അന്വേഷണത്തിന് കോടതിയുടെ മേല്‍നോട്ടമാകാമെന്നും സി.ബി.ഐ അന്വേഷണത്തിന്റെ ആവശ്യം പ്രഥമദൃഷ്ട്യ ഇല്ലെന്നും സര്‍ക്കാറിന് വേണ്ടി ഹാജരായ പ്രോസിക്യൂഷന്‍ ഡയറക്ടര്‍ ജനറല്‍ വിശദീകരിച്ചു. കരുവന്നൂര്‍ ബാങ്ക് തട്ടിപ്പ് കേസില്‍ സി.ബി.ഐ അന്വേഷണം ആവശ്യപ്പെട്ട് മുന്‍ ജീവനക്കാരന്‍ എം.വി. സുരേഷ് സമര്‍പ്പിച്ച ഹരജിയാണ് കോടതി പരിഗണിച്ചത്.

കോഴിക്കോട് കാരശേരിയില്‍ പ്രതിയെ പിടികൂടാനെത്തിയ പൊലീസുകാര്‍ക്ക് വെട്ടേറ്റു. പ്രതിയുടെ വീട്ടില്‍ വെച്ച് വയനാട് എസ്പി യുടെ സ്‌ക്വാഡ് അംഗങ്ങളായ ശാലു,നൗഫല്‍ എന്നിവര്‍ക്കാണ് വെട്ടേറ്റത്.

പ്രതിയായ കാരശേരി വലിയപറമ്പ് സദേശി അര്‍ഷാദും, മാതാവുമാണ് പൊലീസുകാരെ ആക്രമിച്ചത്. വയനാട് കല്പറ്റയില്‍ നിന്നും കാര്‍ മോഷണം പോയ കേസിലെ പ്രതിയാണ് അര്‍ഷാദ്. കൈക്ക് വെട്ടേറ്റ പൊലീസുകാരെ മുക്കം കെഎംസിടി ആശുപത്രിയില്‍ പ്രവേശിപ്പിച്ചു.