ഉത്തര്‍പ്രദേശിലെ അലിഗഢില്‍ ക്ഷേത്രങ്ങളുടെ ചുവരില്‍ ‘ഐ ലവ് മുഹമ്മദ്’ എന്നെഴുതിയ സംഭവത്തില്‍ ഹിന്ദുത്വര്‍ അറസ്റ്റില്‍. ജിഷാന്ത് സിങ്, ആകാശ് സരസ്വത്, ദിലീപ് ശര്‍മ, അഭിഷേക് സരസ്വത് എന്നിവരാണ് അറസ്റ്റിലായത്. മറ്റൊരു സമുദായത്തിലെ അംഗങ്ങളെ മോശക്കാരായി ചിത്രീകരിക്കാനാണ് പ്രതികള്‍ ശ്രമിച്ചതെന്ന് സീനിയര്‍ പൊലീസ് സൂപ്രണ്ട് നീരജ് കുമാര്‍ ജദൗന്‍ പറഞ്ഞു.

നഗരത്തില്‍ വര്‍ഗീയ സംഘര്‍ഷം സൃഷ്ടിക്കാനായിരുന്നു ഇവരുടെ ശ്രമം. പ്രതികളും മുസ്‌ലിം ബിസിനസുകാരുമായി ഭൂമി തര്‍ക്കമുണ്ടായിരുന്നു. സിസിടിവി ക്യാമറകള്‍ പരിശോധിച്ചാണ് പ്രതികളെ കണ്ടെത്തിയത്. ചോദ്യം ചെയ്യലില്‍ പ്രതികള്‍ കുറ്റം സമ്മതിച്ചെന്നും പൊലീസ് സൂപ്രണ്ട് പറഞ്ഞു.

ക്ഷേത്രങ്ങളുടെ ചുവരില്‍ ‘ഐ ലവ് മുഹമ്മദ്’ എഴുത്തുകള്‍ കണ്ടതിനെ തുടര്‍ന്ന് പ്രദേശത്ത് വലിയ സംഘര്‍ഷാവസ്ഥ രൂപപ്പെട്ടിരുന്നു. കര്‍ണിസേന എന്ന ഹിന്ദുത്വ സംഘടനയാണ് പ്രതിഷേധത്തിന് നേതൃത്വം നല്‍കിയത്. അവരുടെ നിര്‍ദേശ പ്രകാരം മൗലവി മുസ്തഖീം, ഗുല്‍ മുഹമ്മദ്, സുലൈമാന്‍, സോനു, അല്ലാബക്ഷ്, ഹസന്‍, ഹമീദ്, യൂസുഫ് എന്നിവരെ നേരത്തെ പോലിസ് അറസ്റ്റ് ചെയ്തിരുന്നു. സത്യം പുറത്തുവന്ന സാഹചര്യത്തില്‍ പ്രതികളെ വിട്ടെന്നും അവര്‍ക്കെതിരായ കേസുകള്‍ പിന്‍വലിക്കുമെന്നും എസ്എസ്പി അറിയിച്ചു.

കര്‍ണാടകയില്‍ വിവാഹത്തലേന്ന് യുവതി ഹൃദയാഘാതത്തെത്തുടര്‍ന്ന് മരിച്ചു. കര്‍ണാടകയിലെ ചിക്കമംഗളൂരു അജ്ജംപുര താലൂക്കിലെ സൊല്ലാപുര സ്വദേശിനിയായ ശ്രുതി (24)യാണ് മരിച്ചത്. വ്യാഴാഴ്ചയാണ് സംഭവം.

കഴിഞ്ഞ വെള്ളിയാഴ്ചയായിരുന്നു തരിക്കേരേ സ്വദേശിയായ ദിലീപുമായി ശ്രുതിയുടെ വിവാഹം നിശ്ചയിച്ചിരുന്നത്. വിവാഹത്തിനുള്ള ഒരുക്കങ്ങള്‍ക്കിടെയാണ് ശ്രുതിയുടെ അപ്രതീക്ഷിത വിയോഗം.

വ്യാഴാഴ്ച യുവതിയുടെ രക്തസമ്മര്‍ദം താഴ്‌ന്നെന്നും ഇതിനുപിന്നാലെ ഹൃദയാഘാതമുണ്ടായി മരണം സംഭവിച്ചെന്നുമാണ് പ്രാദേശിക മാധ്യമങ്ങളുടെ റിപ്പോര്‍ട്ട്. സംഭവത്തില്‍ അജ്ജംപര പൊലീസ് അന്വേഷണം ആരംഭിച്ചിട്ടുണ്ട്.

2025ലെ കന്നട രാജ്യോത്സവ അവാര്‍ഡ് നടന്‍ പ്രകാശ് രാജ് ഉള്‍പ്പെടെ 70 പേര്‍ക്ക്. പ്രകാശ് രാജിന് പുറമെ മുതിര്‍ന്ന പത്രപ്രവര്‍ത്തകന്‍ ബി.എം ഹനീഫ്, സാഹിത്യ നിരൂപകന്‍ രാജേന്ദ്ര ചെന്നി, എഴുത്തുകാരന്‍ റഹമത്ത് തരികെരെ, എന്‍ആര്‍ഐ സംരംഭകന്‍ സക്കറിയ ജോക്കാട്ടെ തുടങ്ങിയവര്‍ അവാര്‍ഡിന് അര്‍ഹരായി.

കര്‍ണാടക സര്‍ക്കാര്‍ നല്‍കുന്ന രണ്ടാമത്തെ ഉയര്‍ന്ന സിവിലിയന്‍ ബഹുമതിയാണ് രാജ്യോത്സവ അവാര്‍ഡ് എന്ന രാജ്യോത്സവ പ്രശസ്തി. വിവിധ മേഖലകളിലെ നേട്ടങ്ങള്‍ക്കും സേവനങ്ങള്‍ക്കും വ്യക്തികളെയും സംഘടനകളെയും അംഗീകരിക്കുന്നതിനായി സംസ്ഥാന രൂപവത്കരണ ദിനമായ നവംബര്‍ ഒന്നിനാണ് എല്ലാ വര്‍ഷവും ഈ അവാര്‍ഡ് സമ്മാനിക്കുന്നത്.