മെന്‍സ് അണ്ടര്‍ 23 സ്റ്റേറ്റ് ട്രോഫിയില്‍ മണിപ്പൂരിനെതിരെ കേരളം ജയം. 162 റണ്‍സിന് കേരളം വിജയം സ്വന്തമാക്കി. ആദ്യം ബാറ്റ് ചെയ്ത കേരളം 50 ഓവറില്‍ ഒന്‍പത് വിക്കറ്റ് നഷ്ടത്തില്‍ 278 റണ്‍സെടുത്തു. മറുപടി ബാറ്റിങ്ങിന് ഇറങ്ങിയ മണിപ്പൂര്‍ 47ആം ഓവറില്‍ 116 റണ്‍സിന് ഓള്‍ ഔട്ടാവുകയായിരുന്നു.

രണ്ടാം വിക്കറ്റില്‍ ഒമര്‍ അബൂബക്കറും കാമില്‍ അബൂബക്കറും ചേര്‍ന്ന് നേടിയ 66 റണ്‍സാണ് കേരള ഇന്നിങ്സിന് അടിത്തറയിട്ടത്. ഒമര്‍ 51 പന്തുകളില്‍ നിന്ന് 60ഉം കാമില്‍ 26ഉം റണ്‍സാണ് എടുത്തത്. അഞ്ചാം വിക്കറ്റില്‍ ക്യാപ്റ്റന്‍ രോഹന്‍ നായരും അഭിജിത് പ്രവീണും ചേര്‍ന്ന് നേടിയ 105 റണ്‍സ് കേരളത്തിന്റെ ലീഡ് ഉയര്‍ത്തുകയായിരുന്നു. രോഹന്‍ നായര്‍ 65 പന്തില്‍ 54ഉം അഭിജിത് പ്രവീണ്‍ 74 പന്തില്‍ 55ഉം റണ്‍സെടുത്തു. അവസാന ഓവറുകളില്‍ അതിവേഗം സ്‌കോര്‍ ഉയര്‍ത്തിയ അക്ഷയ് ടി കെയുടെ പ്രകടനമാണ് കേരളത്തിന്റെ സ്‌കോര്‍ 278ലേക്ക് എത്തിച്ചത്. അക്ഷയ് 34 പന്തുകളില്‍ നിന്ന് 44 റണ്‍സെടുത്തു.

മറുപടി ബാറ്റിങ്ങിന് ഇറങ്ങിയ മണിപ്പൂരിന് ഭേദപ്പെട്ട പ്രകടനം കാഴ്ച വയ്ക്കാനായില്ല. 28 റണ്‍സെടുത്ത ഡൊമിനിക് ആണ് മണിപ്പൂരിന്റെ ടോപ് സ്‌കോറര്‍.

ഇന്ത്യയും ഓസ്‌ട്രേലിയയും കൊമ്പുകോര്‍ക്കുന്ന ബോര്‍ഡര്‍ ഗവാസ്‌കര്‍ പരമ്പരയിലെ രണ്ടാം ടെസ്റ്റിനിടെയുണ്ടായ വാഗ്വാദത്തില്‍ ഇന്ത്യന്‍ പേസര്‍ മുഹമ്മദ് സിറാജും ഓസീസ് ബാറ്റര്‍ ട്രാവിസ് ഹെഡും കുറ്റക്കാരാണെന്ന് ഐ.സി.സി വിധിച്ചു. ഇരുവര്‍ക്കും ഓരോ ഡീമെരിറ്റ് പോയിന്റ് വീതം നല്‍കി. സിറാജിന് മാച്ച് ഫീയുടെ 20 ശതമാനം പിഴയുമുണ്ട്. ഐ.സി.സി പെരുമാറ്റച്ചട്ടം ലംഘിച്ചതിനാണ് നടപടി. രണ്ടാമതൊരു ഡീമെറിറ്റ് കൂടി പോയിന്റ് കൂടി ലഭിച്ചാല്‍ താരങ്ങള്‍ക്ക് മത്സരത്തില്‍ വിലക്കുവരും.

ബാറ്റര്‍ വിക്കറ്റ് നഷ്ടമായി പുറത്തേക്ക് പോകുമ്പോള്‍ അധിക്ഷേപകരമോ പ്രകോപനപരമായതോ ആയ ഭാഷാപ്രയോഗം, ആംഗ്യം എന്നിവ പാടില്ലെന്ന വ്യവസ്ഥയാണ് സിറാജ് ലംഘിച്ചത്. കളിക്കാരനെയോ സപ്പോര്‍ട്ടിങ് സ്റ്റാഫിനെയോ അമ്പയറെയോ മാച്ച് റഫറിയെയോ അധിഷേപിക്കുന്ന തരത്തിലുള്ള പെരുമാറ്റം പാടില്ലെന്ന വ്യവസ്ഥയാണ് ഹെഡ് ലംഘിച്ചത്.

എന്നാല്‍ താരത്തിന് പിഴ നല്‍കേണ്ടെന്ന് ഐ.സി.സി വിലയിരുത്തി. ഇരുവരും തങ്ങളുടെ കുറ്റം സമ്മതിക്കുകയും മാച്ച് റഫറി രഞ്ജന്‍ മദുഗല്ലെ നിര്‍ദേശിച്ച ശിക്ഷ അംഗീകരിക്കുകയും ചെയ്‌തെന്ന് ഐ.സി.സി വ്യക്തമാക്കി.

ഓസീസിന്റെ ആദ്യ ഇന്നിങ്‌സിലെ 82ാം ഓവറിലായിരുന്നു നാടകീയ സംഭവങ്ങള്‍ അരങ്ങേറിയത്. ആദ്യ പന്തില്‍ സിറാജിനെ ബൗണ്ടറി കടത്തിയ ഹെഡ് മൂന്നാം പന്തില്‍ സിക്‌സറിനും പറത്തി. എന്നാല്‍ തൊട്ടടുത്ത ഫുള്‍ലെങ്ത് ഡെലിവറിയില്‍ സിറാജ് ഹെഡിനെ ബൗള്‍ഡാക്കി.

പിന്നാലെ ഏറെ അഗ്രസീവായാണ് സിറാജ് ആഘോഷിച്ചത്. ഹെഡ് തിരികെ പ്രതികരിച്ചതോടെ സിറാജ് പവലിയനിലേക്ക് കയറിപ്പോകാന്‍ ആംഗ്യം കാണിച്ചു. ഇത് വലിയ രീതിയില്‍ ചര്‍ച്ചയായിരുന്നു.

മത്സരത്തില്‍ ആക്രമിച്ച് കളിച്ച ട്രാവിസ് ഹെഡ് അഡ്‌ലെയ്ഡില്‍ തന്റെ ടെസ്റ്റ് കരിയറിലെ എട്ടാം സെഞ്ച്വറി പൂര്‍ത്തിയാക്കി. സെഞ്ച്വറിക്ക് ശേഷം സ്‌കോറിങ് ഹെഡ് ഇരട്ടിവേഗത്തിലാക്കി. 141 പന്തില്‍ 140 റണ്‍സുമായാണ് താരം പുറത്തായത്. 17 ഫോറും നാല് സിക്‌സറുമടങ്ങുന്നതാണ് ഇന്നിങ്‌സ്. അഡ്‌ലെയ്ഡ് സ്‌റ്റേഡിയത്തില്‍ നിറഞ്ഞ കാണികള്‍ സഞ്ച്വറി നേടിയ ഹെഡിന് വേണ്ടി കൈയടിക്കുകയും സിറാജിനെ കൂവി വിളിക്കുകയും ചെയ്തു.

ഓപ്പണര്‍ ജോര്‍ജിയ വോള്‍ (101), എല്ലിസ് പെറി (105) എന്നിവരുടെ സെഞ്ചുറികളുടെ മികവില്‍ ഓസ്ട്രേലിയ ഇന്ത്യയ്ക്കെതിരായ രണ്ടാം വനിതാ ഏകദിനത്തില്‍ 122 റണ്‍സിന് ബ്രിസ്ബേനില്‍ പരമ്പര സ്വന്തമാക്കി. ബാറ്റ് ചെയ്യാന്‍ തിരഞ്ഞെടുത്തതിന് ശേഷം ഓസ്ട്രേലിയ ലക്ഷ്യം കണ്ടു. 8 വിക്കറ്റിന് 371 എന്ന കൂറ്റന്‍ സ്‌കോര്‍ സ്വന്തമാക്കി. ഏകദിന മത്സരത്തില്‍ ഇന്ത്യയ്ക്കെതിരായ ഏറ്റവും ഉയര്‍ന്ന സ്‌കോറാണിത്. പിന്നീട് ആതിഥേയര്‍ ഇന്ത്യയെ 44.5 ഓവറില്‍ 249 റണ്‍സിന് പുറത്താക്കി മത്സരം അനായാസം അവസാനിപ്പിച്ചു.

”ഞങ്ങള്‍ക്ക് ഇടയില്‍ കുറച്ച് കൂട്ടുകെട്ട് ലഭിച്ചു, ഞങ്ങള്‍ക്ക് പോസിറ്റീവ് മാനസികാവസ്ഥ ഉണ്ടായിരുന്നു, പക്ഷേ ഞങ്ങള്‍ക്ക് കുറച്ച് റണ്‍സ് മാത്രമേ ഉണ്ടായിരുന്നുള്ളൂ,” മത്സരത്തിന് ശേഷം ഹര്‍മന്‍പ്രീത് പറഞ്ഞു.

‘ഞങ്ങള്‍ കുറച്ച് അവസരങ്ങള്‍ സൃഷ്ടിച്ചു, പക്ഷേ അവ എടുക്കാന്‍ കഴിഞ്ഞില്ല, അവര്‍ എങ്ങനെ ബാറ്റ് ചെയ്തു എന്നതിന്റെ ക്രെഡിറ്റ് ഞങ്ങള്‍ അവര്‍ക്ക് നല്‍കണം. അടുത്ത മത്സരത്തില്‍ ഞങ്ങള്‍ എങ്ങനെ ബൗള്‍ ചെയ്യുമെന്ന് ഞങ്ങളുടെ പദ്ധതികളെക്കുറിച്ച് ചിന്തിക്കേണ്ടതുണ്ട്. ഞങ്ങള്‍ക്ക് 50 ഓവറുകള്‍ പൂര്‍ണ്ണമായി ബാറ്റ് ചെയ്യണം, ഞങ്ങള്‍ ചെയ്യണം”.

ആദ്യ ഏകദിനത്തില്‍ ഇന്ത്യ അഞ്ച് വിക്കറ്റിന് തോറ്റിരുന്നു. മൂന്നാമത്തെയും അവസാനത്തെയും ഏകദിനം ബുധനാഴ്ച പെര്‍ത്തില്‍ നടക്കും.