ആറുവിക്കറ്റ് കഴിഞ്ഞുള്ള ആ ക്ലൈമാക്‌സ് ഇല്ലായിരുന്നെങ്കില്‍, ഈ ടെസ്റ്റ് കാഴ്ചകള്‍ക്കിത്ര ഭംഗിയുണ്ടാവുമായിരുന്നില്ല. ബംഗ്ലാദേശിനെതിരേ 34-ന്‌
നാല് എന്ന നിലയില്‍ കൂപ്പുകുത്തിയ, അതല്ലെങ്കില്‍ 144-ന്‌ ആറ് എന്ന അവസ്ഥയില്‍ തകര്‍ന്ന ടീം ഇന്ത്യ, അവിടെനിന്നങ്ങോട്ട് നടത്തിയ അതിജീവനം അദ്ഭുതപ്പെടുത്തുന്നതാണ്. ആ അതിജീവനത്തിന്റെ ജീവനാഡിയായി പ്രവര്‍ത്തിച്ചതാവട്ടെ, രവിചന്ദ്രന്‍ അശ്വിനും രവീന്ദ്ര ജഡേജയും.

ഐസിസി ടൂര്‍ണമെന്റുകളില്‍ പുരുഷന്‍മാര്‍ക്കും വനിതകള്‍ക്കും തുല്യ സമ്മാനത്തുക നല്‍കുമെന്ന് ഐസിസി. യുഎഇയില്‍ ഒക്ടോബറില്‍ നടക്കാനിരിക്കുന്ന വനിത ട്വന്റി 20 ലോകകപ്പ് മുതല്‍ പ്രഖ്യാപനം നടപ്പാക്കുമെന്ന് ഐസിസി.

പുരുഷ ലോകകപ്പുകളിലേതിന് സമാനമായ പാരിതോഷികം തന്നെയാകും ഇനി മുതല്‍ വനിത ലോകകപ്പുകള്‍ക്കുമുണ്ടാവുക. ഒരു പ്രധാന ടീം കായിക ഇനത്തില്‍ ഇതാദ്യമായാണ് ഇത്തരമൊരു തീരുമാനം എടുക്കുന്നതെന്ന് ഐസിസി പറഞ്ഞു.

2023 ട്വന്റി 20 ലോകകപ്പ് ജേതാക്കളായ ആസ്‌ട്രേലിയക്ക് എട്ടു കോടി രൂപയായിരുന്നു സമ്മാനത്തുക ലഭിച്ചിരുന്നത്. ഈ വര്‍ഷം ജേതാക്കളാകുന്ന ടീമിന് 19 കോടിയിലേറെ രൂപ ലഭിക്കും. വനിത ക്രിക്കറ്റിന് ആഗോള വ്യാപകമായി പ്രചാരം നല്‍കുന്നതിനു വേണ്ടിയാണ് ഈ തീരുമാനമെന്ന് ഐസിസി അറിയിച്ചു.

ഇന്ത്യ-ബംഗ്ലാദേശ് ക്രിക്കറ്റ് പരമ്പര റദ്ദാക്കണമെന്ന ഭീഷണിയുമായി ഹിന്ദുത്വ സംഘടനകള്‍. ഹിന്ദു ജനജാഗ്രതി സമിതിയും മാനവസേവ പ്രതിഷ്ഠാനുമാണ് ആവശ്യമുയര്‍ത്തി ബിസിസിഐഐയ്ക്കും കേന്ദ്ര സര്‍ക്കാരിനും കത്തു നല്‍കിയത്. ബംഗ്ലാദേശില്‍ ഹിന്ദുക്കള്‍ക്കെതിരെ ആക്രമണം നടക്കുമ്പോള്‍ ഇത്തരം മത്സരവുമായി മുന്നോട്ടു പോകാന്‍ അനുവദിക്കില്ല എന്നും കത്തില്‍ പറയുന്നു.

ഈ മാസം 19നാണ് ബംഗ്ലാദേശ് ക്രിക്കറ്റ് ടീമിന്റെ ഇന്ത്യന്‍ പര്യടനം ആരംഭിക്കുന്നത്. ഇന്ത്യയുമായി ടെസ്റ്റ്-ടി20 പരമ്പരകളാണു നടക്കാനിരിക്കുന്നത്. രണ്ട് പരമ്പരയും റദ്ദാക്കണമെന്നാണ് ഹിന്ദുത്വ സംഘടന ആവശ്യപ്പെട്ടിരിക്കുന്നത്.

ബംഗ്ലാദേശില്‍ ശൈഖ് ഹസീനയുടെ രാജിക്കു പിന്നാലെ ഹിന്ദുക്കള്‍ക്കെതിരായ ആക്രമണങ്ങള്‍ വര്‍ധിച്ചിരിക്കുകയാണെന്നാണ് ജനജാഗ്രതി സമിതി ആരോപിക്കുന്നത്.