kerala

മുഖ്യമന്ത്രിക്ക് പോലിസിന്റെ നിയന്ത്രണം കൊണ്ടു നടക്കാനാവില്ല, പരാജിതനായ ആഭ്യന്തര മന്ത്രിയാണ് അദ്ദേഹം: മുല്ലപ്പള്ളി രാമചന്ദ്രന്‍

ഭരിക്കുന്നവരുടെ ഒളിഞ്ഞും തെളിഞ്ഞുമുള്ള സഹായമില്ലങ്കില്‍ ഇങ്ങനെ സംഭവിക്കില്ലായിരുന്നെന്നും ആഭ്യന്തര വകുപ്പ് കൈയില്‍ വെച്ചിരിക്കുന്ന മുഖ്യമന്ത്രിയുടെ പരാജയമായിട്ടേ ഇതിനെ വിലയിരുത്താന്‍ കഴിയുകയുള്ളൂവെന്നും അദ്ദേഹം തുറന്നടിച്ചു.

Published

3 years ago

February 15, 2022

Test User

മുഖ്യമന്ത്രി പിണറായി വിജയനെതിരെയും ആഭ്യന്തര വകുപ്പിനെതിരെയും രൂക്ഷ വിമര്‍ശനവുമായി കോണ്‍ഗ്രസ് നേതാവ് മുല്ലപ്പള്ളി രാമചന്ദ്രന്‍.
പിണറായി സര്‍ക്കാര്‍ അധികാരത്തില്‍ വന്ന ശേഷം കൊടും കുറ്റവാളികളും വാടകക്കൊലയാളികളും നെഞ്ച് വിരിച്ച് നിയമം കൈയിലെടുക്കുന്ന സംഭവ പരമ്പരകള്‍ കേരളത്തില്‍ ഉടനീളം കണ്ട് വരികയാണെന്ന് മുല്ലപ്പള്ളി രാമചന്ദ്രന്‍ വിമര്‍ശിച്ചു. ഫേസ്ബുക്ക് പോസ്റ്റ് വഴിയായിരുന്നു അദ്ദേഹത്തിന്റെ പ്രതികരണം.

കണ്ണൂരില്‍ ഒരു വിവാഹ തലേന്നുണ്ടായ നിസ്സാര വഴക്കിനെ തുടര്‍ന്ന് ഒരു സംഘം യുവാക്കള്‍ തികഞ്ഞ ആസൂത്രണത്തോടെ നടത്തിയ ബോംബാക്രമണവും തുടര്‍ന്നു അക്രമി സംഘത്തിലെ ഒരു യുവാവ് ഉന്നം തെറ്റിയ ബോംബ് പതിച്ചു മരിച്ചതും ഒറ്റപ്പെട്ട സംഭവമായി കാണാന്‍ കഴിയില്ലെന്ന് അദ്ദേഹം പറഞ്ഞു. കോളേജുകളും സര്‍വ്വകലാശാലകളും ക്രിമിനല്‍ സംഘങ്ങളുടെ വളര്‍ത്തു കേന്ദ്രമായി അധ:പതിച്ചെന്നും ജയിലുകളിലിരുന്ന് കള്ളക്കടത്ത് മയക്കുമരുന്ന് ഗ്യാങ്ങുകളെ കുറ്റവാളികള്‍ നിയന്ത്രിക്കുന്നുവെന്നും അദ്ദേഹം കുറ്റപ്പെടുത്തി.

പണ്ടൊക്കെ നഗരങ്ങളെ കേന്ദ്രീകരിച്ചു കൊണ്ടാണ് വാടക ഗുണ്ടകളും ക്രിമിനലുകളും പ്രവര്‍ത്തിച്ചതെങ്കില്‍ ഗ്രാമങ്ങളിലും അവര്‍ വേരുകള്‍ ഉറപ്പിച്ചു കഴിഞ്ഞെന്നും അദ്ദേഹം പറഞ്ഞു. ഒരിക്കലും കേരളത്തില്‍ ഇതുപോലൊരു കാലം ഉണ്ടായിട്ടില്ലെന്നും എന്താണ് നിയമ സമാധാന വാഴ്ച ഇത്രയും പാളം തെറ്റാന്‍ കാരണമെന്നും മുല്ലപ്പള്ളി രാമചന്ദ്രന്‍ ചോദിച്ചു. ഭരിക്കുന്നവരുടെ ഒളിഞ്ഞും തെളിഞ്ഞുമുള്ള സഹായമില്ലങ്കില്‍ ഇങ്ങനെ സംഭവിക്കില്ലായിരുന്നെന്നും ആഭ്യന്തര വകുപ്പ് കൈയില്‍ വെച്ചിരിക്കുന്ന മുഖ്യമന്ത്രിയുടെ പരാജയമായിട്ടേ ഇതിനെ വിലയിരുത്താന്‍ കഴിയുകയുള്ളൂവെന്നും അദ്ദേഹം തുറന്നടിച്ചു. ക്രിമിനലുകള്‍ക്കു വേണ്ടി ക്രമിനലുകള്‍ നടത്തുന്ന ഒരു ഭരണമാണ് ഇവിടെ നടക്കുന്നതെന്നും മുഖ്യമന്ത്രിക്കും അനുചര സംഘത്തിനും ഒരു ജാള്യതയുമില്ലെന്നും കുറ്റപ്പെടുത്തി.

കണ്ണൂര്‍ ശാന്തമെന്ന് വിശ്വസിക്കാന്‍ ഇപ്പോള്‍ എങ്ങിനെ കഴിയുമെന്നും സംഘടിതവും ആസൂത്രിതവുമായ രീതിയില്‍ കുടില്‍ വ്യവസായംപ്പോലെ ബോംബുകള്‍ ഇപ്പോഴും നിര്‍മ്മിക്കുന്നുവെന്നും അദ്ദേഹം പറഞ്ഞു. മുഖ്യമന്ത്രിക്ക് പോലിസിന്റെ നിയന്ത്രണം കൊണ്ടു നടക്കാനാവില്ലെന്നും പരാജിതനായ ആഭ്യന്തര മന്ത്രിയാണ് മുഖ്യമന്ത്രിയെന്നും അദ്ദേഹം വ്യക്തമാക്കി. ജനങ്ങളുടെ ജീവനും സ്വത്തിനും സംരക്ഷണം ഉറപ്പു വരുത്താന്‍ കഴിയാത്ത അവസ്ഥയാണ് അരാജകത്വം അഥവാ അനാര്‍ക്കിയെന്ന് പറയുന്നതെന്ന് പറഞ്ഞ മുല്ലപ്പള്ളി രാമചന്ദ്രന്‍ വല്ലാത്ത ദുര്യോഗമാണ് കേരളം നേരിട്ടു കൊണ്ടിരിക്കുന്നതെന്നും കൂട്ടിചേര്‍ത്തു.

ഫേസ്ബുക്ക് പോസ്റ്റിന്റെ പൂര്‍ണരൂപം:

‘കേഴുക എന്‍ പ്രിയ നാടേ ….’
കണ്ണൂരില്‍ ഒരു വിവാഹ തലേന്നുണ്ടായ നിസ്സാര വഴക്കിനെ തുടര്‍ന്ന് ഒരു സംഘം യുവാക്കള്‍ തികഞ്ഞ ആസൂത്രണത്തോടെ നടത്തിയ ബോംബാക്രമണവും തുടര്‍ന്നു അക്രമി സംഘത്തിലെ ഒരു യുവാവ് ഉന്നം തെറ്റിയ ബോംബ് പതിച്ചു മരിച്ചതും ഒറ്റപ്പെട്ട സംഭവമായി കാണാന്‍ കഴിയില്ല.
ഉത്തര്‍ പ്രദേശും ബീഹാറുമായിരുന്നു ഒരു കാലത്തു അക്രമത്തിനും കൊള്ളക്കും കൊലപാതകത്തിനും കുപ്രസിദ്ധി നേടിയ സംസ്ഥാനങ്ങള്‍. പിണറായി സര്‍ക്കാര്‍ അധികാരത്തില്‍ വന്ന ശേഷം കൊടും കുറ്റവാളികളും വാടകക്കൊലയാളികളും നെഞ്ച് വിരിച്ച് നിയമം കൈയിലെടുക്കുന്ന സംഭവ പരമ്പരകള്‍ കേരളത്തില്‍ ഉടനീളം കണ്ട് വരികയാണ്.
കള്ളക്കടത്തിലും മയക്കുമരുന്ന് വ്യാപാരത്തിലും രാഷ്ട്രീയത്തിലെ ഉന്നതന്മാരുടെ പങ്ക് കേരളം പല ഘട്ടങ്ങളിലും ചര്‍ച്ച നടത്തിയതാണ്.
സ്‌കൂളുകളിലും കോളേജുകളിലും മയക്കു മരുന്ന് സംഘങ്ങള്‍ പിടി മുറുക്കന്നുവെന്ന വാര്‍ത്ത കേട്ട് കേരളം ഞെട്ടുകയാണ്.

കോളേജുകളും സര്‍വ്വകലാശാലകളും ക്രിമിനല്‍ സംഘങ്ങളുടെ വളര്‍ത്തു കേന്ദ്രമായി അധ:പതിച്ചു. ജയിലുകളിലിരുന്ന് കള്ളക്കടത്ത് മയക്കുമരുന്ന് ഗ്യാങ്ങുകളെ കുറ്റവാളികള്‍ നിയന്ത്രിക്കുന്നു.
ചില ഹോട്ടലുകള്‍ കേന്ദ്രീകരിച്ച് നടക്കുന്ന നിശാ പാര്‍ട്ടിയും അതോടനുബന്ധിച്ച് അരങ്ങേറുന്ന സാമൂഹ്യ വിരുദ്ധരുടെ വിളയാട്ടവും ജനങ്ങളെ ഭീതിയിലകപ്പെടുത്തി കഴിഞ്ഞു.
നിശാ പാര്‍ട്ടിയില്‍ പങ്കെടുത്ത രണ്ട് മോഡലുകളുടെ ദുരന്ത മരണം, സിനിമാ നടിയെ കരാറുറപ്പിച്ചു ബലാല്‍സംഗം ചെയ്ത സംഭവം ഇതെല്ലാം സാംസ്‌കാരിക കേരളത്തിനേറ്റ ശക്തമായ പ്രഹരങ്ങളാണ്.
പണ്ടൊക്കെ നഗരങ്ങളെ കേന്ദ്രീകരിച്ചു കൊണ്ടാണ് വാടക ഗുണ്ടകളും ക്രിമിനലുകളും പ്രവര്‍ത്തിച്ചതെങ്കില്‍ ഗ്രാമങ്ങളിലും അവര്‍ വേരുകള്‍ ഉറപ്പിച്ചു കഴിഞ്ഞു.
ഒരിക്കലും കേരളത്തില്‍ ഇതുപോലൊരു കാലം ഉണ്ടായിട്ടില്ല. എന്താണ് നിയമ സമാധാന വാഴ്ച ഇത്രയും പാളം തെറ്റാന്‍ കാരണം? ഭരിക്കുന്നവരുടെ ഒളിഞ്ഞും തെളിഞ്ഞുമുള്ള സഹായമില്ലങ്കില്‍ ഇങ്ങനെ സംഭവിക്കില്ലായിരുന്നു.

ആഭ്യന്തര വകുപ്പ് കൈയില്‍ വെച്ചിരിക്കുന്ന മുഖ്യ മന്ത്രിയുടെ പരാജയമായിട്ടേ ഇതിനെ വിലയിരുത്താന്‍ കഴിയുകയുള്ളൂ. ക്രിമിനലുകള്‍ക്കു വേണ്ടി ക്രമിനലുകള്‍ നടത്തുന്ന ഒരു ഭരണമാണ് ഇവിടെ നടക്കുന്നത്. മുഖ്യ മന്ത്രിക്കും അനുചര സംഘത്തിനും ഒരു ജാള്യതയുമില്ല. പോലീസ് ഡയറക്ടര്‍ ജനറല്‍ മുതല്‍ താഴേത്തട്ടില്‍ പ്രവര്‍ത്തിക്കുന്ന പോലീസ് ഉദ്യോഗസ്ഥന്മാര്‍ വരെ ഉത്തരം പറയേണ്ടതല്ലേ?
പ്രഗത്ഭന്മാരും നീതിമാന്മാരുമായ എത്രയെത്ര ഉന്നത ഐ.പി.എസ്സ്. ഉദ്യോഗസ്ഥന്മാരിവിടെയുണ്ടായിരുന്നു. അഴിമതി നടത്താത്ത , ഉപരിവര്‍ഗത്തിന്റെ ആതിഥ്യം ഒരിക്കലും ഏറ്റുവാങ്ങാത്ത ആ മികച്ച ഉദ്യോഗസ്ഥര്‍ ഇപ്പോഴും തിളങ്ങുന്ന മാതൃകകളാണ്. നിയമ സമാധാനം ഉറപ്പു വരുത്താന്‍ നിതാന്ത ജാഗ്രത കാട്ടിയ അവരുടെ കൂറ് ഭരണഘടനയോടും പൊതു സമൂഹത്തോടുമായിരുന്നു. സ്വാഭിമാന ബോധമുള്ള ഐ. പി. എസ്സ്. ഉദ്യോഗസ്ഥന്മാര്‍ക്ക് വംശനാശം സംഭവിക്കുകയാണൊ?

മോണ്‍സന്‍ മാവുങ്കല്‍ എന്ന തട്ടിപ്പുകാരന്റെ വീട്ടില്‍ സന്ദര്‍ശനം നടത്തി സുഖ ചികിത്സ നടത്തുന്ന ഉന്നത ഉദ്യോഗസ്ഥരുടെ കാലമാണിതെന്നത് ആരെയാണ് ആശങ്കപ്പെടുത്താത്തത്?
എന്തു കുറ്റകൃത്യം ചെയ്താലും ഭരണ സ്വാധീനമുണ്ടെങ്കില്‍ നിഷ് പ്രയാസം ഊരിപ്പോരാമെന്ന നില അത്യന്തം അപകടകരമാണ്.

ബഹു: മുഖ്യ മന്ത്രിയുടെ അറിവിലേക്കാണ് ഇത്രയും പറഞ്ഞു പോയത്.
മുഖ്യ മന്ത്രിയുടെ ജില്ലയില്‍ പണ്ട് രാഷ്ട്രീയ കൊലപാതങ്ങള്‍ നിത്യ സംഭവമായിരുന്നു. കണ്ണൂര്‍ ശാന്തമെന്ന് വിശ്വസിക്കാന്‍ ഇപ്പോള്‍ എങ്ങിനെ കഴിയും. സംഘടിതവും ആസൂത്രിതവുമായ രീതിയില്‍ കുടില്‍ വ്യവസായംപ്പോലെ ബോംബുകള്‍ ഇപ്പോഴും നിര്‍മ്മിക്കുന്നു. ഒരു യുവാവ് ഉന്നം തെറ്റിയ ബോംബ് തട്ടി, തല ചിതറി മരിച്ച സംഭവം കണ്ണൂരിലെ നല്ലവരായ ജനങ്ങളെ വീണ്ടും ഭയ വിഹ്വലരാക്കിയിരിക്കുന്നു.
ഊരിയ വാളും ഉയര്‍ത്തി പിടിച്ച കത്തിയും വക വെക്കാതെ രാഷ്ട്രീയത്തില്‍ നില ഉറപ്പിച്ച മുഖ്യ മന്ത്രി കോളജ് പഠന കാലത്ത് മേഷ യുദ്ധം നടത്തിയത് കേരളീയര്‍ക്ക് അറിയാം. കണ്ണൂര്‍ എസ്സ്.പി. ജോസഫ് തോമസ്സ് ഐ.പി.എസ്സിനെ പേടിച്ചു നടന്ന കാലവും ജനങ്ങള്‍ക്കറിയാം. ആഭ്യന്തര മന്ത്രിയായ താങ്കള്‍ ഇപ്പോഴും ഉന്നത പോലീസ് ഉദ്യോഗസ്ഥരെ ഭയപ്പെടുകയാണൊ ?
ബഹു: മുഖ്യ മന്ത്രി, പോലിസിന്റെ നിയന്ത്രണം അങ്ങേക്ക് കൊണ്ടു നടക്കാനാവില്ല. പരാജിതനായ ആഭ്യന്തര മന്ത്രിയാണ് അങ്ങ്.
ജനങ്ങളുടെ ജീവനും സ്വത്തിനും സംരക്ഷണം ഉറപ്പു വരുത്താന്‍ കഴിയാത്ത അവസ്ഥയാണ് അരാജകത്വം അഥവാ അനാര്‍ക്കിയെന്ന് പറയുന്നത്.
വല്ലാത്ത ദുര്യോഗമാണ് കേരളം നേരിട്ടു കൊണ്ടിരിക്കുന്നത്.
‘ കേഴുക എന്‍ പ്രിയ നാടെ’ എന്ന് അറിയാതെ പറഞ്ഞു പോവുകയാണ്.

kerala

അബ്ദുറഹീം: കണക്കുകൾ പുറത്തുവിട്ട് നാട്ടിലെ ട്രസ്റ്റ് കമ്മിറ്റി

ക്രൗഡ് ഫണ്ടിങ് വഴി ലഭിച്ചത് : 47,87,65,347 രൂപ
ഇതുവരെയുള്ള ചെലവ് : 36,27,34,927 രൂപ
ബാക്കി : 11,60,30,420 രൂപ

Published

6 hours ago

November 15, 2024

webdesk17

കോഴിക്കോട് : സഊദിയിലെ റിയാദിൽ ജയിൽ മോചനം കാത്ത് കഴിയുന്ന ഫറോക്ക് കോടമ്പുഴ സ്വദേശി മച്ചിലകത്ത് അബ്ദുറഹീമിന്റെ ദിയ ധനം കണ്ടെത്തുന്നതിന്റെ ഭാഗമായി 47,87,65,347 രൂപ ക്രൗഡ് ഫണ്ടിങ്ങിലൂടെ സമാഹരിച്ചതായി അബ്ദുറഹീം ലീഗൽ അസ്സിസ്റ്റൻസ് ട്രസ്റ്റ് കമ്മിറ്റി വാർത്താസമ്മേളനത്തിൽ അറിയിച്ചു. ഇതിൽ ഇതുവരെയായി 36,27,34,927 രൂപ ചെലവായതായും ബാക്കി 11,60,30,420 രൂപ ട്രസ്റ്റിന്റെ ബാങ്ക് അക്കൗണ്ടിലുള്ളതായും ഭാരവാഹികൾ വ്യക്തമാക്കി. ഓഡിറ്റ് റിപ്പോർട്ട് ഉൾപ്പടെയുള്ള വ്യക്തമായ കണക്കുകളാണ് കമ്മിറ്റി പുറത്ത് വിട്ടത്. ബാക്കിയുള്ള തുക അബ്ദുറഹീം ജയിൽ മോചിതനായി നാട്ടിൽ തിരിച്ചെത്തിയ ശേഷം എന്ത് ചെയ്യണമെന്ന് സർവകക്ഷി സമിതിയുടെ മേൽനോട്ടത്തിലുള്ള ട്രസ്റ്റ് തീരുമാനമെടുക്കുമെന്ന് ചെയർമാൻ സുരേഷ് കുമാർ, ജനറൽ കൺവീനർ കെ കെ ആലിക്കുട്ടി എന്നിവർ പറഞ്ഞു.

സമാനതകളില്ലാത്ത ദൗത്യമാണ് നിറവേറ്റിയത്. റിയൽ കേരള സ്റ്റോറിയായി മാറിയ ഫണ്ട് സമാഹരണത്തിൽ ലോകം കൈകോർത്തത് കേരള ചരിത്രത്തിൽ സുവർണ്ണ രേഖയായി അവശേഷിക്കുമെന്നും ഭാരവാഹികൾ പറഞ്ഞു. നാട്ടിലെയും റിയാദിലെയും നിയമ സഹായ സമിതികൾ വഴി ചെലവായ തുകയിലേക്കും ആപിന്റെ ടി ഡി എസ് ഇനത്തിലും ബാക്കി നൽകാനുള്ള തുക വൈകാതെ നൽകി എല്ലാ സാമ്പത്തിക ഇടപാടുകളും സുതാര്യമായി പൂർത്തിയാക്കും .

അബ്ദുറഹീമിന്റെ മോചനത്തിന് വേണ്ടി തീരുമാനമെടുക്കുകയും ആത്മധൈര്യത്തോടെ മുന്നോട്ട് പോവുകയും ചെയ്ത റിയാദിലെ അബ്ദുറഹീം നിയമ സഹായ സമിതി, മഹാ യജ്ഞത്തിൽ കൈകോർത്ത ലോക മലയാളി സമൂഹത്തിനും മത, രാഷ്ട്രീയ സംഘടനകൾ ഉൾപ്പടെ വിവിധ തലങ്ങളിലെ സംഘടനകൾക്കും ജീവകാരുണ്യ പ്രവർത്തകർക്കും മാധ്യമങ്ങൾക്കും വിശിഷ്യാ സഊദി ഉൾപ്പടെയുള്ള പ്രവാസി സമൂഹത്തിനും ലീഗൽ അസ്സിസ്റ്റൻസ് കമ്മിറ്റി ഹൃദ്യമായ നന്ദി രേഖയപെടുത്തി.

റിയാദിലെ നിയമ സഹായ സമിതിയോടൊപ്പം ഇന്ത്യൻ എംബസിയുടെ നിരന്തരമായ ഇടപെടലുകളാണ് ദിയ നൽകാനും റഹീമിന്റെ വധശിക്ഷ റദ്ദ് ചെയ്യാനും കാരണമായത്. അംബാസഡർ ഡോ. സുഹൈൽ അജാസ്ഖാൻ ഉൾപ്പടെ ഡിസിഎം, വെൽഫയർ വിഭാഗത്തിലെ ഉദ്യോഗസ്ഥർ, റഹീമിന്റെ മോചനത്തിന് വേണ്ടി തുടക്കം മുതൽ രംഗത്തുള്ള എംബസി ഉദ്യോഗസ്ഥൻ യുസഫ് കാക്കഞ്ചേരി, നിയമ നടപടികൾക്കായി ദ്രുതഗതിയിൽ കാര്യങ്ങൾ നീക്കുന്ന പവർ ഓഫ് അറ്റോർണി സിദ്ദീഖ് തുവൂർ, റഹീമിന്റെ വക്കീലുമാർ, പരിഭാഷകർ, റിയാദിലെ മുഴുവൻ സംഘടനകളുടെയും നേതാക്കൾ, പ്രവർത്തകർ, നാട്ടിലെ കോടമ്പുഴ പ്രാദേശിക കമ്മിറ്റി, വിവിധ തലങ്ങളിൽ റഹീമിന്റെ ജയിൽ മോചനത്തിന് വേണ്ടി പ്രവർത്തിച്ചവർ ഉൾപ്പടെയുള്ളവർക്കെല്ലാം കമ്മിറ്റി കടപ്പാട് അറിയിച്ചു.

അബ്ദുറഹീമിന്റെ കേസ് നാളെ (ഞായറാഴ്ച) റിയാദിലെ ക്രിമിനൽ കോടതി പരിഗണിക്കാനിരിക്കെയാണ് ട്രസ്റ്റ് കമ്മിറ്റിയുടെ കണക്കുകൾ വെളിപ്പെടുത്തിയുള്ള വാർത്താസമ്മേളനം. ദിയാധനം സ്വീകരിച്ചതിന് ശേഷം സഊദി കുടുംബം മാപ്പ് നൽകാൻ തയ്യാറാണെന്ന് റിയാദ് ക്രിമിനൽ കോടതിയെ അറിയിച്ചതിന്റെ തുടർന്ന് കഴിഞ ജൂലൈ രണ്ടിന് അബ്ദു റഹീമിന്റെ വധശിക്ഷ റദ്ദാക്കിയതായി കോടതി ഉത്തരവ് പുറപ്പെടുവിച്ചിരുന്നു. മോചന ഉത്തരവ് ലഭിച്ചാൽ റിയാദ് കോടതിയുടെ സ്വാഭാവികമായ നടപടികൾ പൂർത്തിയാക്കി വൈകാതെ അബ്ദുറഹീം നാട്ടിലെത്തും . അതിനിടെ റിയാദിലെത്തിയ റഹീമിന്റെ മാതാവും സഹോദരനും അമ്മാവനും ജയിലിൽ റഹീമുമായി കൂടിക്കാഴ്ച്ച നടത്തുകയും ചെയ്തത് ഈ മഹാ ദൗത്യത്തിൽ പങ്കാളികളായിരുന്നു എല്ലാവര്ക്കും ഏറെ സന്തോഷം പകർന്നു.

സഊദി പൗരന്റെ മരണത്തെ തുടർന്ന് കഴിഞ്ഞ പതിനെട്ട് വർഷമായി റിയാദിലെ ജയിലിൽ കഴിയുന്ന അബ്ദുറഹീമിന്റെ മോചനത്തിന് സഊദി കുടുംബം 15 മില്യൺ റിയാലായിരുന്നു ആവശ്യപ്പെട്ടത്. റിയാദിലെ അബ്ദുറഹീം നിയമ സഹായ സമിതിയുടെ കഴിഞ്ഞ 17 വർഷത്തിലധികമായി നടത്തി വരുന്ന നിയമ പോരാട്ടത്തിനൊടുവിലാണ് സഊദി കുടുംബത്തിന്റെ തന്നെ വക്കീലിന്റെ പ്രത്യേക ഇടപെടൽ മൂലം പതിനഞ്ച് മില്യൺ റിയാലിന് മോചനം നൽകാൻ സമ്മതിച്ചത്. ഫണ്ട് സമാഹരണം മുന്നിൽ കണ്ട് റിയാദിലെ സർവകക്ഷി സമിതിയുടെ നിർദേശ പ്രകാരം 2021ലാണ് നാട്ടിലെ ട്രസ്റ്റ് കമ്മിറ്റി രൂപീകരിച്ചത്. കേന്ദ്ര സംസ്ഥാന മന്ത്രിമാർ, എംപിമാർ, എം എൽ എമാർ, സർവ കക്ഷി നേതാക്കൾ തുടങ്ങിയവരുൾപ്പെട്ടതായിരുന്നു ട്രസ്റ്റ് കമ്മിറ്റി.

അബ്ദുറഹീമിന് വധശിക്ഷ നൽകുക എന്ന തീരുമാനത്തിൽ ഉറച്ചു നിന്നിരുന്ന സഊദി കുടുംബവുമായി അവരുടെ തന്നെ വക്കീലുമാർ നടത്തിയ മധ്യസ്ഥ ശ്രമത്തിനൊടുവിലാണ് കഴിഞ്ഞ ഒക്ടോബറിൽ ദിയ ധനം സ്വീകരിച്ച് അബ്ദുറഹീമിന് മാപ്പ് നൽകാൻ സഊദി കുടുംബം തയ്യാറായത്. വക്കീലുമാർ മുഖേന ഇന്ത്യൻ എംബസിയും റിയാദിലെ നിയമ സഹായ സമിതിയും തുടർച്ചയായി നടത്തിയ കഠിന പ്രയത്നമാണ് ഇത്തരമൊരു തീരുമാനത്തിലെത്താൻ വഴിയൊരുക്കിയത് .

ദിയ നൽകി മാപ്പ് നൽകാനുള്ള സഊദി കുടുംബത്തിന്റെ തീരുമാനം ഡിസംബറിൽ ഇന്ത്യൻ എംബസി നാട്ടിൽ അബ്ദുറഹീമിന്റെ കുടുംബത്തെ അറിയിക്കുകയും അതുപ്രകാരം ട്രസ്റ്റ് കമ്മിറ്റി വഴി ഫണ്ട് സമാഹരണത്തിനുള്ള ശ്രമങ്ങൾ ആരംഭിക്കുകയും ചെയ്തിരുന്നു . മലപ്പുറത്തെ സ്പെയിൻ കോഡ് എന്ന ഐ ടി കമ്പനിയുടെ പ്രത്യേക ആപ്പ് വഴിയാണ് മാർച്ച് പത്ത് മുതൽ ഫണ്ട് സമാഹരണത്തിന് തുടക്കമിട്ടത്. ദിയധനം സമാഹരിച്ച് ഔദ്യോഗികമായി ഇന്ത്യൻ എംബസി വഴി വിവരം അറിയിക്കാൻ സഊദി കുടുംബം വക്കീലുമാർ മുഖേന നൽകിയ സമയപരിധി ഏപ്രിൽ 16 ആയിരുന്നു. ഫണ്ട് സമാഹരിച്ച വിവരം ഏപ്രിൽ 16നകം അറിയിച്ചില്ലെങ്കിൽ മാപ്പ് നൽകാമെന്ന ഉറപ്പിൽ നിന്ന് പിന്മാറുമെന്നായിരുന്നു സഊദി കുടുംബത്തിന്റെ നിലപാട്. എന്നാൽ ദൈവാനുഗ്രഹത്താൽ ഫണ്ട് സമാഹരണത്തിന് അനുയോജ്യമായ വിധം വിശുദ്ധ റമളാൻ കൂടി കടന്നു വന്നതോടെ സമയപരിധിക്ക് നാല് ദിവസം മുമ്പേ തന്നെ ഏപ്രിൽ 12 ന് ആവശ്യമായ തുക സ്വരൂപിച്ചു ക്രൗഡ് ഫണ്ടിങ് അവസാനിപ്പിച്ചു.

പിന്നീട് ഏറെ സുതാര്യമായ രീതിയിലാണ് പിന്നീട് ഫണ്ട് റിയാദിലെ ക്രിമിനൽ കോടതിയുടെ ചീഫ് മജിസ്‌ട്രേറ്റിന്റെ പേരിലെത്തിച്ചത്. ട്രസ്റ്റിന്റെ ബാങ്ക് അക്കൗണ്ടിൽ നിന്ന് ഡൽഹിയിലെ വിദേശ മന്ത്രാലയം വഴി ഇന്ത്യൻ എംബസിയിലേക്കെത്തിച്ച ഫണ്ട് എംബസി ചെക്ക് വഴി റിയാദ് ഗവർണറേറ്റിലേക്ക് കൈമാറി. ഗവര്ണറേറ്റിൽ നിന്ന് കോടതിക്ക് കൈമാറിയ ചെക്ക് പിന്നീട് മരിച്ച സഊദി പൗരന്റെ മാതാവ്, രണ്ട് സഹോദരന്മാർ , നാല് സഹോദരിമാർ എന്നിവരുടെ പേരിൽ നിയമ പ്രകാരമുള്ള വിഹിതമായി കോടതി തന്നെ നേരിട്ട് അവരുടെ അക്കൗണ്ടിലേക്ക് നൽകി. വക്കീലിനുള്ള തുകയും ഇന്ത്യൻ എംബസി വഴി തന്നെ ചെക്ക് നൽകി.

പൂർണ്ണമായും ഔദ്യോഗിക മാര്ഗങ്ങളിലൂടെ നടന്ന ദിയ ധന കൈമാറ്റം സംബന്ധിച്ചും റിയാദിലെയും നാട്ടിലെയും നിയമ സഹായ സമിതിയുടെ പ്രവർത്തനങ്ങളെ കുറിച്ചും അപവാദങ്ങൾ പ്രചരിപ്പിക്കാൻ ചിലർ രംഗത്തുള്ളതായി ശ്രദ്ധയിൽ പെട്ടിട്ടുണ്ടെന്ന് കമ്മിറ്റി ഭാരവാഹികൾ പറഞ്ഞു.ഇങ്ങിനെ സോഷ്യൽ മീഡിയ വഴി ചിലർ നടത്തുന്ന അപവാദ പ്രചാരണങ്ങൾ തീർത്തും അടിസ്ഥാന രഹിതമാണെന്നും സർവകക്ഷി സമിതിയുടെ ഇടപെടലിലോ ഇടപാടുകളിലോ അണുമണിത്തൂക്കം സംശയം ഉണ്ടാവില്ലെന്നും അവർ വ്യക്തമാക്കി. ലോകം കൈകോർത്ത നന്മ നിറഞ്ഞ മഹാ ദൗത്യത്തെ വികൃതമാക്കുന്ന നീക്കങ്ങളിൽ നിന്ന് ഇത്തരമാളുകൾ പിന്മാറണമെന്നും അവർ ആവശ്യപ്പെട്ടു.

റിയാദിലെ ജയിലിലെത്തി അബ്ദുറഹീമിനെ കാണുകയും റിയാദ് അബ്ദുറഹീം നിയമ സഹായ സമിതിയുടെ സ്വീകരണത്തിൽ പങ്കെടുക്കുകയും ചെയ്ത മാതാവിനും സഹോദരനും അമ്മാവനും യഥാർത്ഥ വസ്തുതകൾ എല്ലാം ബോധ്യപ്പെട്ടിട്ടുണ്ട്. അക്കാര്യം അവർ തന്നെ റിയാദിൽ നടത്തിയ വാർത്ത സമ്മേളനത്തിൽ പറയുകയും ചെയ്തതായും ഭാരവാഹികൾ വ്യക്തമാക്കി. നിയമ സഹായ സമിതി, ട്രസ്റ്റ് ഭാരവാഹികളായ കെ സുരേഷ് കുമാർ, കെ കെ ആലിക്കുട്ടി, ഓഡിറ്റർ കൂടിയായ പി എം എ സമീർ, ഷകീബ് കൊളക്കാടൻ, മൊയ്‌തീൻകോയ കല്ലമ്പാറ, അഷ്‌റഫ് വേങ്ങാട്ട്, നാസർ കാരന്തുർ എന്നിവർ വാർത്താ സമ്മേളനത്തിൽ പങ്കെടുത്തു.

kerala

നഗ്നത പ്രദര്‍ശനം; അറുപതുകാരന് രണ്ട് വര്‍ഷം കഠിനതടവും 10,000 രൂപ പിഴയും

കുട്ടി സ്‌കൂളില്‍ പോകുന്ന വഴി ഇയാള്‍ നഗ്നത കാണിക്കുകയായിരുന്നു.

Published

7 hours ago

November 15, 2024

webdesk17

പന്ത്രണ്ടുകാരിക്ക് മുന്നില്‍ നഗ്നത കാണിച്ച അറുപതുകാരന് രണ്ട് വര്‍ഷം കഠിനതടവും 10,000 രൂപ പിഴയും വിധിച്ചു. ശാസ്താംകോട്ട മുതുപിലാക്കാട് പടിഞ്ഞാറ് അഭിലാഷ് ഭവനത്തില്‍ രാമന്‍ ആനന്ദിനാണ് കരുനാഗപ്പള്ളി അതിവേഗ സ്‌പെഷ്യല്‍ കോടതി ജഡ്ജി എഫ്. മിനിമോള്‍ ശിക്ഷിച്ചത്.

കുട്ടി സ്‌കൂളില്‍ പോകുന്ന വഴി ഇയാള്‍ നഗ്നത കാണിക്കുകയായിരുന്നു. ഇയാള്‍ കുട്ടിയോട് ലൈംഗിക ചുവയോടെ സംസാരിക്കുകയും നഗ്നത പ്രദര്‍ശിപ്പിക്കുകയും ചെയ്തു. എന്നാല്‍ വിവരം വീട്ടില്‍ പറഞ്ഞാല്‍ കൊന്നുകളയും എന്ന് ഭീഷണിപ്പെടുത്തുകയും ചെയ്തു.

പിഴ അടക്കാത്ത പക്ഷം ഒരു മാസം കൂടി കൂടുതല്‍ തടവ് അനുഭവിക്കേണ്ടി വരുമെന്നും കോടതി വിധിച്ചു. ശാസ്താംകോട്ട പൊലീസ് ഇന്‍സ്‌പെക്ടറായിരുന്ന ജെ. രാകേഷ് രജിസ്റ്റര്‍ ചെയ്ത കേസ്സില്‍ പ്രോസിക്യൂഷന്‍ ഭാഗത്തുനിന്നും 13 സാക്ഷികളെ വിസ്തരിച്ചു. സ്‌പെഷ്യല്‍ പബ്ലിക് പ്രോസിക്യൂട്ടര്‍ എന്‍.സി. പ്രേമചന്ദ്രന്‍ ഹാജരായി.

kerala

സന്തോഷ് ട്രോഫി കേരളാ ടീമിനെ പ്രഖ്യാപിച്ചു

ക്യാപ്റ്റന്‍ ജി സഞ്ജുവും വൈസ് ക്യാപ്റ്റന്‍ ഗോള്‍കീപ്പറായ എസ് ഹജ്മലുമാണ്.

Published

7 hours ago

November 15, 2024

webdesk17

78-ാമത് സന്തോഷ് ട്രോഫി ഫുട്‌ബോള്‍ ചാംപ്യന്‍ഷിപ്പിനുള്ള കേരളാ ടീമിനെ പ്രഖ്യാപിച്ചു. 22 അംഗ ടീമിനെയാണ് പ്രഖ്യാപിച്ചത്. ക്യാപ്റ്റന്‍ ജി സഞ്ജുവും വൈസ് ക്യാപ്റ്റന്‍ ഗോള്‍കീപ്പറായ എസ് ഹജ്മലുമാണ്. 15 പുതുമുഖങ്ങളാണ് ടീമിലുള്ളത്. ടീമിന്റെ പരിശീലകന്‍ ബിബി തോമസ് മുട്ടത്താണ്.

സൂപ്പര്‍ ലീഗ് കേരളയില്‍ കളിച്ച പത്തുപേര്‍ ടീമിലുണ്ട്. ഗ്രൂപ്പ് എച്ചില്‍ റെയില്‍വേ, ലക്ഷദ്വീപ്, പോണ്ടിച്ചേരി ടീമുകള്‍ക്കൊപ്പമാണ് കേരളം.

നവംബര്‍ 20-നാണ് കേരളത്തിന്റെ ആദ്യമത്സരം നടക്കുക. 22-ന് നടക്കുന്ന രണ്ടാം മത്സരത്തില്‍ ലക്ഷദ്വീപാണ് എതിരാളികള്‍. നവംബര്‍ 24 പോണ്ടിച്ചേരിയെ നേരിടും. സഞ്ജുവിന്റെ അഞ്ചാമത്തെ സന്തോഷ് ട്രോഫി മത്സരമാണ് ഇത്.

ജി സഞ്ജു (ക്യാപ്റ്റന്‍), എസ് ഹജ്മല്‍ (വൈസ് ക്യാപ്റ്റന്‍), കെ മുഹമ്മദ് അസ്ഹര്‍. ഡിഫന്‍ഡര്‍മാര്‍: എം മനോജ്, , മുഹമ്മദ് അസ്ലം, ആദില്‍ അമല്‍, പിടി മുഹമ്മദ് റിയാസ്, ജോസഫ് ജസ്റ്റിന്‍. കെ മുഹമ്മദ് നിയാസ്, വി അര്‍ജുന്‍, ക്രിസ്റ്റി ഡേവിസ്, മുഹമ്മദ് അര്‍ഷഫ്, നസീബ് റഹ്‌മാന്‍, സല്‍മാന്‍ കള്ളിയത്ത്, നിജോ ഗില്‍ബര്‍ട്ട്, മുഹമ്മദ് റിഷാദ് ഗഫൂര്‍, പിപി മുഹമ്മദ് റൊഷാല്‍, മുഹമ്മദ് മുഷ്‌റഫ്.