സയ്യിദ് അഹമ്മദ് ബാഫഖി തങ്ങള്‍

കേരളത്തിലെ മത, രാഷ്ട്രീയ മേഖലകളില്‍ കരുത്തുറ്റ നേതൃത്വമായി കടന്നുപോയ സയ്യിദ് ഉമര്‍ ബാഫഖി തങ്ങള്‍ ഓര്‍മയില്‍ എന്നും നിറഞ്ഞുനില്‍ക്കുന്ന സുഗന്ധമാണ്. ആദര്‍ശത്തിന്റെ കരുത്തും നിലപാടിന്റെ ഉറപ്പും എന്തും ഏറ്റെടുക്കാനുള്ള ആര്‍ജ്ജവവുമായിരുന്നു അവരുടെ പ്രത്യേകത. നേതാക്കളും സാധാരണ പ്രവര്‍ത്തകരും അടുത്തറിഞ്ഞു സ്‌നേഹിച്ച നേതാവായിരുന്നു സെയ്തുമ്മര്‍ ബാഫഖി തങ്ങള്‍. ജനങ്ങള്‍ക്കിടയില്‍ ജീവിച്ച ആ നേതാവിന് ഇന്നും ജനഹൃദയങ്ങളില്‍ ഒരിടമുണ്ട്. സമുദായത്തിനായി സമര്‍പ്പിച്ച ആ ജീവിതത്തിന്റെ അനുഭവങ്ങളിലൂടെയാണ് ഞങ്ങളുടെ ബാല്യകൗമാരങ്ങള്‍ കടന്നുപോയത്. വീട്ടിലെത്തുന്ന നേതാക്കള്‍, ബാപ്പയുടെ യാത്രകള്‍, ചര്‍ച്ചകള്‍, തിരഞ്ഞെടുപ്പുകള്‍ തുടങ്ങിയ കര്‍മനൈരന്തര്യങ്ങളുടെ പതിറ്റാണ്ടുകളായിരുന്നു അതെല്ലാം. ഒരര്‍ത്ഥത്തില്‍ കേരള രാഷ്ട്രീയത്തിലെ മുസ്‌ലിം ലീഗ് രാഷ്ട്രീയ വളര്‍ച്ചയുടെ കാലമായിരുന്നു അത്. ബാഫഖി തങ്ങളുടെ സഹോദരി പുത്രനും ജാമാതാവും എന്ന നിലയില്‍ കുടുംബബന്ധത്തില്‍ അപ്പുറമുള്ള ആത്മബന്ധമായിരുന്നു അവര്‍ തമ്മില്‍ ഉണ്ടായിരുന്നത്. ബാഫഖി തങ്ങളുടെ രാഷ്ട്രീയ, സാമുദായിക കാര്യങ്ങളുടെ ചുക്കാന്‍ പിടിച്ചിരുന്നത് അക്കാലത്ത് സയ്യിദ് ഉമര്‍ തങ്ങളായിരുന്നു. കുടുംബകാര്യങ്ങളും തങ്ങളെ ഏല്‍പ്പിച്ചിരുന്നു.

സി.എച്ചിന്റെ പരിപാടികള്‍ക്ക് തീയതി നല്‍കിയിരുന്നത് അക്കാലത്ത് കൊയിലാണ്ടിയില്‍ സൈദുമര്‍ തങ്ങളുടെ ഓഫീസായിരുന്നു. സി.എച്ചും സൈദുമര്‍ തങ്ങളും ബാഫഖി തങ്ങളുടെ കരുത്തായി മാറിയ കാലം. കോഴിക്കോട് കേന്ദ്രമാക്കി മുസ്‌ലിം ലീഗ് സാധിച്ച വിജയങ്ങളുടെയും മുന്നേറ്റങ്ങളുടെയും ചരിത്ര ചിത്രംകൂടിയാണിത്. മക്കയിലാണ് പഠിച്ചത്. നാട്ടിലെത്തിയപ്പോള്‍ ബാഫഖി തങ്ങള്‍ക്കൊപ്പം രാഷ്ട്രീയ ഗോദയിലിറങ്ങി. പാര്‍ട്ടിയിലും ഭരണത്തിലും മതസംഘടനാ, സ്ഥാപനങ്ങളുമായി ബന്ധപ്പെട്ട പ്രവര്‍ത്തിക്കുമ്പോഴും ബാഫഖി തങ്ങളുമായി ബന്ധപ്പെട്ട ഉത്തരവാദിത്വങ്ങള്‍ അദ്ദേഹത്തിന് നിര്‍വഹിക്കാനുണ്ടായിരുന്നു. ഉത്തരവാദിത്തങ്ങള്‍ ഏറ്റെടുക്കുന്നതിലും അത് ഭംഗിയായി നിര്‍വഹിക്കുന്നതിലും വലിയ മാതൃക തന്നെയായിരുന്നു. പാര്‍ട്ടി പ്രവര്‍ത്തനത്തില്‍ ആ മാതൃകയുടെ വഴിഅടയാളപ്പെടുത്തി. ആദര്‍ശ രംഗത്തെ കണിശതയും നിലപാടുകളിലെ ദൃഢതയും അദ്ദേഹത്തെ വേറിട്ടു നിര്‍ത്തി. വിഷയങ്ങള്‍ സൈദുമര്‍ തങ്ങള്‍ എടുത്താല്‍ പിന്നെ കാര്യങ്ങള്‍ യഥാവിധി നടന്നുകൊള്ളും എന്ന് ഉറപ്പായിരുന്നു. ഇത് മുന്നില്‍കണ്ടാണ് നേതാക്കള്‍ സങ്കീര്‍ണമായ വിഷയങ്ങള്‍ പോലും അങ്ങോട്ട് വിട്ടിരുന്നത്. കൃത്യനിഷ്ഠയായിരുന്നു മറ്റൊന്ന്. ഏതു കാര്യത്തിനും സമയത്തിനെത്താനും എത്തിയാല്‍തന്നെ താന്‍ വൈകിയോ എന്നന്വേഷിക്കാനും കാണിച്ച ജാഗ്രത വിസ്മയമാണ്. തികഞ്ഞ നേതാവിന്റെ ഗുണങ്ങളെല്ലാം അദ്ദേഹത്തില്‍നിന്ന് ഏറെ കണ്ടു പഠിക്കാനുണ്ടായിരുന്നു. സാധാരണ പ്രവര്‍ത്തകരെ ശ്രദ്ധിക്കാന്‍ വലിയ താല്‍പര്യം കാട്ടിയിരുന്നു. നേതാക്കളോടൊക്കെ വലിയ ആദരവും സ്‌നേഹവുമായിരുന്നു.
തിരക്കിനിടയിലും കുടുംബത്തെയും ശ്രദ്ധിച്ചു. എന്നാല്‍ അധികാരമോ രാഷ്ട്രീയ നേതൃസ്ഥാനമോ ഒരിക്കലും സ്വന്തക്കാര്‍ക്ക് വേണ്ടി ഉപയോഗപ്പെടുത്തിയില്ല. ഒരുകാര്യത്തിലും പരിധിവിട്ട് ഇടപെടരുതെന്ന് നിഷ്‌കര്‍ഷ പുലര്‍ത്തി. ആരോടും അങ്ങനെയുള്ള ബാധ്യത ഉണ്ടാവരുതെന്ന നിര്‍ബന്ധവും അതിന് പിന്നിലുണ്ടായിരുന്നു. എന്തെങ്കിലും ഒരു കാര്യം ഒരാളെക്കൊണ്ട് ചെയ്യിച്ചാല്‍ അവരുടെ മറ്റൊരു ആവശ്യത്തിന് ഇങ്ങോട്ടും സമീപിക്കുമെന്നും വഴിവിട്ട നീക്കങ്ങള്‍ ആര്‍ക്കുവേണ്ടിയും ചെയ്യുന്നത് ഗുണകരമല്ലെന്നും ബോധ്യപ്പെടുത്തും. മക്കളോടെല്ലാം ഒരേയൊരു ഉപദേശം മാത്രമായിരുന്നു എപ്പോഴും പ്രധാനമായി നടത്തിയിരുന്നത്. അഞ്ചു നേരത്തെ നമസ്‌കാരം കൃത്യമായി നിര്‍വഹിക്കണം. അത് മാത്രമാണ് ബാപ്പാക്ക് നിങ്ങള്‍ ചെയ്യേണ്ടത് എന്ന് പറയും. മൂത്തമകള്‍ക്ക് പേരക്കുട്ടിയായ ശേഷവും കാണുമ്പോള്‍ പറയുന്ന ഉപദേശം നമസ്‌കാരം ഖളാ ആകരുതുന്നതെന്ന് തന്നെ.

സുബ്ഹിക്ക് പള്ളിയില്‍ പോകും മുമ്പ് കുട്ടികളെ ഉള്‍പ്പെടെ എല്ലാവരെയും ഉണര്‍ത്തുന്നതും സുബ്ഹി കഴിഞ്ഞ ഉടനെ ഖുര്‍ആന്‍ പാരായണം ചെയ്യുന്നതും പതിവായിരുന്നു. വുളൂ നിത്യമാക്കുന്നതിലും ശ്രദ്ധിച്ചു. യാത്രകളിലും മറ്റും ഇത് വിഷമം സൃഷ്ടിക്കുന്ന സാഹചര്യത്തില്‍ ആരോഗ്യം പരിഗണിച്ചും മറ്റും വിട്ടുവീഴ്ച ചെയ്യാന്‍ നിര്‍ദ്ദേശിക്കുന്നവരോട് ആ കാര്യത്തില്‍ നിങ്ങള്‍ വിഷമിക്കേണ്ട എന്നായിരുന്നു മറുപടി.
പല യോഗങ്ങള്‍ക്കും പരിപാടികള്‍ക്കും കൂടെ പോകാന്‍ അവസരമുണ്ടായി. യു.ഡി.എഫ് ലൈസന്‍ കമ്മിറ്റി യോഗങ്ങള്‍ക്ക് കൊരമ്പയിലുമൊത്ത് പോകുന്ന കാലത്ത് പല തവണ കൂടെ പോയിട്ടുണ്ട്. ഒരു തവണ മാണി സാര്‍ ഒരു ആഗ്രഹം അറിയിച്ചു. തങ്ങള്‍ ഇരുന്ന സ്ഥലത്ത് എനിക്കൊന്ന് ഇരിക്കണം. എല്ലാ കക്ഷിനേതാക്കളും സ്‌നേഹത്തില്‍ പൊതിഞ്ഞ ആദരമാണ് നല്‍കിയത്. അവര്‍ക്ക് ലഭിച്ചതും വലിപ്പച്ചെറുപ്പങ്ങള്‍ നോക്കാതെയുള്ള സ്‌നേഹ ബഹുമാനങ്ങള്‍ തന്നെ.
യാത്രകളോട് വലിയ താല്‍പര്യം കാണിച്ചു. ഫോട്ടോ ആല്‍ബം സൂക്ഷിക്കുന്നതും ഹോബിയായിരുന്നു. പല കാര്യങ്ങള്‍ക്കും വേണ്ട ഫോട്ടോ ശേഖരിക്കാന്‍ നേതാക്കള്‍ ബാപ്പയുടെ അടുത്ത് എത്തുമായിരുന്നു. സല്‍ക്കാരത്തിലും വലിയ താത്പര്യം കാണിച്ചു. നേതാക്കള്‍, പ്രഭാഷകര്‍ പരിപാടികള്‍ക്ക് വന്നാല്‍ ഭക്ഷണം കഴിക്കാന്‍ വീട്ടില്‍ എത്തണം എന്ന് നിര്‍ബന്ധം പിടിച്ചു. നിയമസഭാ സ്ഥാനാര്‍ത്ഥിയായി പ്രഖ്യാപിക്കുന്ന സമയത്ത് മദിരാശിയിലായിരുന്നു. അവിടെ എം.കെ ഹാജിയുടെ റസ്റ്റോറന്റിലായിരുന്നു. എം.കെ ഹാജി മുഖേന വിവരം ലഭിച്ചപ്പോള്‍ മദ്രാസ് മെയിലില്‍ പുറപ്പെട്ടു. പൂക്കോയ തങ്ങളെ ചെന്നുകണ്ടു. നിയമസഭയിലേക്ക് മത്സര രംഗത്തിറങ്ങി. നീളക്കുപ്പായമിട്ടു നിയമസഭയിലേക്ക് കടന്നുചെല്ലുന്ന ഓര്‍മയും ചരിത്രം തന്നെ.
ഫാറൂഖ് കോളജിലും നന്തി ദാറുസ്സലാമിലും കോഴിക്കോട്ടെ വിവിധ പള്ളികളിലും പട്ടിക്കാട് ജാമിഅ നൂരിയയിലും പൊന്നാനി മഊനത്തിലും തന്റെ സേവനങ്ങളുടെ കയ്യൊപ്പ് പതിപ്പിച്ചിട്ടുണ്ട്. മുസ്‌ലിംലീഗ് പാര്‍ട്ടിയോട് അകലം പാലിച്ച ഇടവേളക്കുശേഷം ഇ.എം.എസിന്റെ ശരീഅത്ത് നിലപാടിനെതുടര്‍ന്ന് പാര്‍ട്ടി ശക്തിപ്പെടുത്തുന്നതിന് രംഗത്തുവന്നതും അദ്ദേഹത്തിന്റെ ഉള്ളില്‍ ഉണ്ടായിരുന്ന സമുദായത്തോടുള്ള ആത്മാര്‍ത്ഥതയുടെ തെളിവാണ്. സീതിഹാജിയും അതില്‍ വലിയ പങ്കുവഹിച്ചു. പുറമെ കര്‍ക്കശക്കാരനെന്ന് കരുതിയവര്‍ പോലും അടുത്തറിഞ്ഞപ്പോള്‍ ആ വിനയം തിരിച്ചറിഞ്ഞത് പങ്കുവെച്ചിട്ടുണ്ട്. പാര്‍ട്ടിയിലെ സഹപ്രവര്‍ത്തകര്‍ക്ക് വാത്സല്യമൂറുന്ന അനുഭവമാകാന്‍ അദ്ദേഹത്തിന് സാധിച്ചു. ഒരു ജനതയുടെ ഉത്ഥാനത്തിനായി ജീവിതം ഉഴിഞ്ഞുവെച്ച കര്‍മയോഗിയായിരുന്നു അദ്ദേഹം.
(സയ്യിദ് ഉമര്‍ ബാഫഖി തങ്ങളുടെ മകനും മുസ്‌ലിംലീഗ് സംസ്ഥാന പ്രവര്‍ത്തകസമിതി അംഗവുമാണ് ലേഖകന്‍)