തനിക്കെതിരെ പ്ലസ് ടു കോഴക്കേസ് നടത്താന്‍ സര്‍ക്കാര്‍ ചെലവഴിച്ച കോടികള്‍ മുഖ്യമന്ത്രി തിരിച്ചടക്കണമെന്ന് മുസ്‌ലിം ലീഗ് നേതാവ് കെ.എം ഷാജി. ഹൈക്കോടതി കേസ് റദ്ദാക്കിയതിന് പിന്നാലെ മുഖ്യമന്ത്രിയുടെ അടുപ്പക്കാരന്‍ സ്വാധീനിക്കാന്‍ ശ്രമിച്ചു. എന്നാല്‍, ആ സ്വാധീനത്തിന് താന്‍ വഴങ്ങിയില്ലെന്നും കെ.എം ഷാജി പറഞ്ഞു.

അഞ്ചുതവണ ഏകദേശം ഒന്നരക്കോടി രൂപയോളം സര്‍ക്കാര്‍ സുപ്രിംകോടതിയില്‍ കേസ് നടത്താന്‍ ചെലവഴിച്ചിട്ടുണ്ട്. ഇത് ജനങ്ങളുടെ പണമാണ്. എന്നുവെച്ചാല്‍ തന്റെ കൂടി പണമാണ്. അത് തിരിച്ചടക്കാനുള്ള മര്യാദയാണ് സര്‍ക്കാര്‍ കാണിക്കേണ്ടതെന്നാണ് കെ.എം  ഷാജിയുടെ പരാമര്‍ശം.

ഇഷ്ടമില്ലാത്തവരെ എങ്ങനെ തകര്‍ക്കണമെന്ന് പിണറായി വിജയന് നന്നായി അറിയാം. ഈ കേസുകൊണ്ടെങ്കിലും കണ്ണു തുറന്നെങ്കില്‍ സന്തോഷമെന്നും കെ.എം ഷാജി പറഞ്ഞു.

ഉത്തര്‍പ്രദേശിലെ സംഘര്‍ബാധിത മേഖലയായ സംഭലിലേക്ക് പോകാന്‍ ശ്രമിച്ച മുസ്‌ലിം ലീഗ് എം.പിമാരെ തടഞ്ഞ് യോഗി ആദിത്യനാഥിന്റെ പൊലീസ്. ഗാസിയാബാദില്‍ വെച്ചാണ് എം.പിമാരെ യു.പി പൊലീസ് തടഞ്ഞത്. ഇവിടെ നിന്ന് രണ്ട് ജില്ലകള്‍ കൂടി പിന്നിട്ടു വേണം സംഭലിലെത്താന്‍.

എന്നാല്‍ സംഭലില്‍ നിന്ന് 130 കിലോമീറ്റര്‍ അകലെയുള്ള ഗാസിയാബാദ് ജില്ലയിലെ സജ്ജരാസി ടോള്‍ പ്ലാസയില്‍ വെച്ചു തന്നെ എം.പിമാരെ പൊലീസ് സന്നാഹം തടയുകയായിരുന്നു. ജനാധിപത്യപരമായിട്ട് കാര്യങ്ങള്‍ അറിയാനുള്ള പാര്‍ലമെന്റ് അംഗങ്ങളുടെ സ്വാതന്ത്രത്തെ തടഞ്ഞുകൊണ്ട് യു.പിയില്‍ യോഗി ആദിത്യനാഥിന്റെ സര്‍ക്കാരിന്റെ ഭീകരത പൊലീസിലൂടെ തെളിഞ്ഞു.

രണ്ടുവാഹനങ്ങളിലായാണ് എം.പിമാരുടെ സംഘം സംഭലിലേക്ക് പുറപ്പെട്ടത്. ഇ.ടി. മുഹമ്മദ് ബഷീര്‍, അബ്ദുസ്സമദ് സമദാനി, ഹാരിസ് ബീരാന്‍, നവാസ് ഗനി, പി.വി. അബ്ദുൽ വഹാബ് എന്നീ എം.പിമാരാണ് സംഘത്തിലുണ്ടായിരുന്നത്. സംഘര്‍ഷ മേഖലയായതിനാല്‍ പോകാന്‍ അനുവാദം തരാന്‍ സാധിക്കില്ലെന്നാണ് എം.പിമാരോട് പൊലീസ് പറഞ്ഞത്. അതേസമയം, തടഞ്ഞത് തെറ്റായ നടപടിയാണെന്നും പൊലീസുമായി സംഘര്‍ഷത്തിനില്ലെന്നും ഇ.ടി. മുഹമ്മദ് ബഷീര്‍ എം.പി വ്യക്തമാക്കി.