Culture

കെ.ടി ജലീലിന്റെ മലപ്പുറം പ്രസംഗത്തില്‍ ഒളിഞ്ഞിരിക്കുന്ന കുടില തന്ത്രങ്ങള്‍

Published

6 years ago

November 22, 2018

ശുഐബുല്‍ ഹൈത്തമി

അടിമുടി അവധാനതയോടെ ഇടപെടുകയും ഇടപെടാതിരിക്കുകയും ചെയ്യാറുള്ള കുലീനനും സൗമ്യനുമായ പണ്ഡിതനാണ് ആയിരങ്ങളുടെ ഗുരുനാഥരായ പ്രൊഫസർ കെ ആലിക്കുട്ടി മുസ്ല്യാർ . പ്രായവും പദവിയുമേറുന്തോറും പക്വതയുടെ പൂർണ്ണതയിലേക്ക് വളരുന്ന നല്ല നേതാവുമാണ് അദ്ദേഹം. കാർക്കഷ്യങ്ങളോ പിടിവാശികളോ തലക്കനമോ ഇല്ലാത്തതിനാൽ ആശയഭിന്നതയുള്ളവർക്കു പോലും പ്രാപ്യനും പ്രിയങ്കരനുമാണ് ആൾ .കേരള മുസ്‌ലിംകളുടെ ഏറ്റവും പ്രധാനപ്പെട്ട മത പഠനാചരണ ശൃംഖലയായ സമസ്താ കുടുംബത്തെ അതിന്റെ ഗതകാലങ്ങളോട് ബന്ധിപ്പിക്കുന്ന നിലവിൽ ഏറ്റവും പഴക്കമുള്ള കണ്ണി എന്ന നിലയിലും പാണക്കാട് കുടുംബം നേതൃത്വം നൽകുന്ന കേരളത്തിലെ സമുദായ നന്മകളുടെ മുൻനിര സഹചാരി എന്നനിലയിലും കേരള ഇസ്ലാമിനെ ദേശീയ അന്തർദേശീയ തലങ്ങളിൽ പ്രതിനിധീകരിക്കുന്ന സാമ്പ്രദായിക മുസ്ല്യാർ എന്നയർത്ഥത്തിലും വർത്തമാന മുസ്ലിം നേതൃത്വത്തിന്റെ അഗ്രസരണിയിലാണ് അദ്ദേഹത്തിന്റെ ശ്രേണീപഥം .

ഇങ്ങനെയുള്ള ഒരു വ്യക്തിത്വത്തെ അസ്ഥാനത്ത് കയറി കടന്നാക്രമിക്കുക വഴി പ്രതിഛായയിൽ കരിഛായം കലർന്ന കെ ടി ജലീൽ ഉദ്ദേശിച്ച രാഷ്ട്രീയലാഭത്തെ കുറിച്ച് സമുദായ സ്നേഹികൾ ആലോചിക്കുന്നത് നന്നാവും . അതിന് മുമ്പ് പാണക്കാട് തങ്ങളുടെ മീതേക്കും പാഞ്ഞുകയറിയിരുന്നു മന്ത്രി. സത്യത്തിൽ സയ്യിദ് ഹൈദരലി ശിഹാബ് തങ്ങൾ എന്ന അനിതരനായ കപ്പിത്താന്റെ നിശബ്ദ സാന്നിധ്യത്തിന്റെ പ്രശാന്തതയിലാണ് പ്രക്ഷുബ്ദമായ പലകടലുകളും കടന്ന് സാമുദായിക ഭദ്രതയുടെ കപ്പൽ മുന്നോട്ട് പോകുന്നത്. ആ കപ്പലിൽ കയറിയാണ് ജലീൽ തിരമാലകൾ ഭേദിക്കാൻ എങ്ങനെയാണ് തോണി തുഴയേണ്ടത് എന്ന് പഠിച്ചതും പിന്നീടാർത്തി മൂത്തപ്പോൾ കടലാക്കാമെന്ന് കരുതി കൈത്തോടിനെ പുണർന്നതും .

പി കെ ഫിറോസും നജീബ് കാന്തപുരവുമടങ്ങങ്ങുന്ന യൂത്ത് ലീഗിലെ പുത്തൻപടയാണ് തന്റെ അധികാരപീഠത്തിന്റെ കാലിളക്കുന്നത് എന്ന് കണ്ട് ഹാലിളകിയ മന്ത്രി ഈ രണ്ട് പേരെ ആലിക്കുട്ടി മുസ്ല്യാരുടെ ലീഗുകാരാക്കുക വഴി സമസ്ത – ലീഗ് ഛിദ്രത തന്നെയാണ് ഉന്നം വെക്കുന്നത്. അതിന്റെ ലാഭം പലതാണ്. ഒന്നാമതായി , ആലിക്കുട്ടിയുസ്താദിനെ ചിത്രത്തിൽ നിന്നും സംരക്ഷിക്കാൻ യൂത്ത് ലീഗിന്റെ നിലപാടിനോട് അദ്ദേഹത്തിന് താദാത്മ്യമില്ല എന്ന സമസ്താ കുടുംബത്തിന്റെ വിശദീകരണം വരും. ഉസ്താദിനെ പറയിപ്പിച്ചതിന് യുവസമസ്താപ്രവർത്തകർ നജീബിനും ഫിറോസിനും പൊങ്കാല സമർപ്പിക്കും. കുറച്ചായി അങ്ങനെയൊരു പുകയുന്ന ദ്വന്ദം ഉണ്ട് എന്ന ഒരു ഭ്രമിതസങ്കൽപ്പം ഇവിടെയുണ്ട് . (അതിന്റെ വിശദാംശങ്ങളുടെ വിചാരം ഈ കുറിപ്പിന്റെ ഉദ്ദേശ്യമേയല്ല) .പുറമേ , സജീവമായ സുന്നീ ഐക്യത്തെ നിരുൽസാഹപ്പെടുത്തുന്നത് ആലിക്കുട്ടി മുസ്ലാർ നേതൃത്വം നൽകുന്ന സമസ്തയിലെ ലീഗ്ചേരിയാണെന്ന് അടക്കം പറയുന്ന മറ്റേച്ചേരി സുന്നികളുടെ പ്രീതി ബോണസായും കിട്ടും. യൂത്ത് ലീഗ് വഴി തടയുമ്പോൾ ഡിഫിയുടെ കൊടിയേന്തി അവരെത്തുമെന്നതും സാധ്യതയാണ്. ഇതൊക്കെ നന്നായറിയുന്ന ഒരു ബന്ധുവുണ്ട് മന്ത്രിക്ക് ഉപദേശിയായി.

ഇത്തരം വൃത്തികെട്ട രാഷ്ട്രീയ ലാഭത്തിന് വേണ്ടി സാത്വികനായ ഒരു പണ്ഡിതനെയും സാത്വികമായ ഒരു പണ്ഡിത പ്രസ്ഥാനത്തെയും വലിച്ചിഴച്ച മന്ത്രി മുഖത്തിന്റെ നിറമല്ല അകത്തെന്ന് ബോധ്യപ്പെടുത്തുകയാണ്. അതിന് സൗകര്യം ചെയ്തു കൊടുക്കും വിധം ലീഗ് – സമസ്ത ഭിന്നതയുണ്ടെന്ന് വരുത്തിക്കൊണ്ട് പരിണിതഫലം ചിന്തിക്കാതെ എഴുത്തും പറച്ചിലുമൊക്കെയായി വരുന്നവരും തൽക്കാലമല്ല പിൽക്കാലമാണ് പ്രധാനം എന്ന് ചിന്തിക്കുന്നത് നന്നാവും.

സമസ്ത ഒരു സംഘടന മാത്രമല്ല , സംസ്ക്കാരം കൂടിയാണ്. മുസ്ലിം ലീഗ് ഒരു നാഗരികതയും. ആ ഉലമ – ഉമറാ കൂട്ടുകെട്ടിന്റെ ലാഭങ്ങളാണ് ശ്രുതി പരന്ന കേരളയിസ്ലാം മോഡൽ. കാശ്മീരിൽ നിന്നും കേരളത്തിലേക്കുള്ള ദൂരമാണത്. അഭിപ്രായങ്ങൾ ഉള്ളേടത്ത് ഭിന്നാഭിപ്രായങ്ങളുമുണ്ടാവും. ഭിന്നാഭിപ്രായങ്ങൾ അഭിപ്രായ ഭിന്നതയിലെത്താതെ നോക്കാൻ കെൽപ്പുറ്റ നേതൃത്വം വലിയ അനുഗ്രഹമാണ്. എല്ലാ ജനറേഷനെയും സാമൂഹിക തുറകളിലുള്ളവരേയും ഒരേ ഫ്രയിമിൽ അണിനിരത്താൻ നേതൃത്വം ശിലാത്മകമാവരുത് . വ്യത്യസ്ത ശൈലികളുള്ള നേതാക്കന്മാർ ഉണ്ടാവണം , ആ നേതൃ ബഹുസ്വരതയും നമുക്കുണ്ട്. ഓരോരുത്തർ അവരവർക്കിഷ്ടപ്പെട്ട ശൈലിക്കാരെ കൂടുതൽ അംഗീകരിച്ചും വിഭിന്ന രീതികളെ ഉൾക്കൊണ്ടും കൊണ്ട് എത്രമാത്രം സഹിഷ്ണുത കാണിക്കുന്നുവോ അത്രമാത്രം ഭദ്രതയുണ്ടാവും ഈ കപ്പലിനും തറവാടിനും. ഇന്ന് ജീവിച്ചിരിക്കുന്ന ഒരാളും നിർമ്മിച്ചതല്ല ഈ അടിത്തറ . പരസ്പരം വിട്ടുവീഴ്ച്ചയും ആദരവും പ്രകടിപ്പിച്ച മുൻഗാമികൾ നെയ്തെടുത്ത സേതുബന്ധങ്ങളാണ് ഈ നാട്ടുനൂലിഴകളായ സംഘവേരുകൾ.
ഇന്നുള്ളവർ അതിന്റെ ഗുണഭോക്താക്കളും കാവൽക്കാരുമാണ്. ആ നന്ദി ബോധമാണ് വളരേണ്ടത്.
അവനവന്റെ ആവേശത്തിനും അരിശത്തിനും സമുദായ പ്രതീകങ്ങളെ ദുരുപയോഗപ്പെടുത്തുന്നത് വർദ്ധിച്ച് വരികയാണ്. താൻ ചിന്തിക്കുന്നത് പോലെയല്ലാതെ ചിന്തിക്കുന്നവരും കൂടി ചേർന്ന് നിൽക്കുന്നത് കൊണ്ടാണ് തനിക്കിങ്ങനെ ചിന്തിക്കാനുള്ള സ്പേസ് കിട്ടുന്നത് എന്ന് വിനയാന്വിതനായി ചിന്തിക്കാനായാൽ സ്വയം ചെറുതാവാൻ പറ്റും ,അപ്പോഴാണ് നാം വലുതാവുക .ഇതൊക്കെ എല്ലാവരുടേതുമാണ്. ആരെങ്കിലും കരുതിയത് കൊണ്ട് ഉള്ളത് തകർക്കാനോ ഇല്ലാത്തത് ഉണ്ടാക്കാനോ പറ്റില്ല.
അറബിയിൽ ഒരു ആപ്തവാക്യമുണ്ട്.,
قل نعمة زالت عن قوم فعادت
ഒരു ജനതയുടെ അനുഗ്രഹം നീങ്ങിപ്പോയാൽ പിന്നെ തിരിച്ച് വരൽ തുലോം തുഛമാണ് എന്നാണാ പറഞ്ഞത്. ഇന്നനുഭവിക്കുന്ന ഒരനുഗ്രഹവും ഏതെങ്കിലും അവിവേകം കാരണം നമുക്ക് നഷ്ടപ്പെടാതിരിക്കട്ടെ.

Film

‘1650 ദിവസമാണ് ഷൂട്ടിംഗ് ഉണ്ടായിരുന്നത്, ബറോസിലൂടെ എനിക്കാണ് മോക്ഷം കിട്ടിയിരിക്കുന്നത്’: മോഹന്‍ലാല്‍

Published

38 mins ago

December 25, 2024

webdesk14

സംവിധായകനായി താന്‍ അരങ്ങേറ്റം കുറിച്ച ചിത്രം ബറോസ് തിയറ്ററുകളിലെത്തിയതിന്‍റെ സന്തോഷം പങ്കുവച്ച് മോഹന്‍ലാല്‍. “തികച്ചും വേറിട്ടൊരു സിനിമയാണ് ബറോസ്. ഒരു ചില്‍ഡ്രന്‍ ഫ്രണ്ട്‍ലി സിനിമയാണ്. കുട്ടികള്‍ക്കും കുടുംബങ്ങള്‍ക്കും കാണാവുന്ന സിനിമ. എന്നെ സംബന്ധിച്ച് ഒരു നിയോഗമാണ് ഇത്, ഒപ്പം ഭാഗ്യവും. ഒരുപാട് നാള്‍ മുന്‍പ് തുടങ്ങിയതാണ്. റിലീസ് ആയതോടെ എനിക്കാണ് മോക്ഷം കിട്ടിയിരിക്കുന്നത്”, മോഹന്‍ലാല്‍ മാധ്യമങ്ങളോട് പറഞ്ഞു.

മോഹന്‍ലാലിന്‍റെ സംവിധാന അരങ്ങേറ്റ ചിത്രം എന്ന നിലയില്‍ ഏതാനും വര്‍ഷങ്ങളായി പ്രേക്ഷകരുടെ സജീവ ശ്രദ്ധയിലുള്ള ചിത്രമാണ് ബറോസ്. ഒറിജിനല്‍ 3 ഡിയില്‍ ഒരുക്കപ്പെട്ടിരിക്കുന്ന ചിത്രത്തില്‍ സംവിധാനത്തിനൊപ്പം ടൈറ്റില്‍ കഥാപാത്രത്തെ അവതരിപ്പിച്ചിരിക്കുന്നതും മോഹന്‍ലാല്‍ ആണ്. 2019 ഏപ്രിലില്‍ പ്രഖ്യാപിക്കപ്പെട്ട ചിത്രമാണിത്. ഒഫിഷ്യല്‍ ലോഞ്ച് 2021 മാര്‍ച്ച് 24 ന് ആയിരുന്നു. 170 ദിവസത്തോളം ചിത്രീകരണം നടന്നു. ഈ വര്‍ഷം മാര്‍ച്ച് 28 ആയിരുന്നു ആദ്യം പ്രഖ്യാപിക്കപ്പെട്ടിരുന്ന റിലീസ് തീയതിയെങ്കിലും ചിത്രം ഇപ്പോഴാണ് എത്തുന്നത്.

ആശിർവാദ് സിനിമാസിന്‍റെ ബാനറില്‍ ആന്‍റണി പെരുമ്പാവൂര്‍ ആണ് ‘ബറോസ്’ നിർമ്മിക്കുന്നത്. ഇന്ത്യയിലെ ആദ്യ ത്രീഡി ചിത്രമായിരുന്ന ‘മൈ ഡിയര്‍ കുട്ടിച്ചാത്തന്‍’ സംവിധാനം ചെയ്‍ത ജിജോയുടെ കഥയെ ആസ്‍പദമാക്കിയാണ് മോഹന്‍ലാല്‍ സിനിമയൊരുക്കുന്നത്. കൗമാരക്കാരനായ സംഗീത വിസ്മയം ലിഡിയന്‍ നാദസ്വരമാണ് ചിത്രത്തിന്‍റെ സംഗീത സംവിധായകന്‍. അമേരിക്കന്‍ ടെലിവിഷന്‍ ചാനലായ സിബിഎസിന്‍റെ വേള്‍ഡ്സ് ബെസ്റ്റ് പെര്‍ഫോമര്‍ അവാര്‍ഡ് നേടിയ ലിഡിയന്‍റെ ആദ്യ സിനിമയാണ് ബറോസ്.

അതേസമയം റിലീസിന് മുന്നോടിയായി ദുബൈയില്‍ ഒരു സ്പെഷല്‍ ഷോ ചിത്രത്തിന്റെ പ്രവര്‍ത്തകര്‍ക്കായും വിതരണക്കാര്‍ക്കായും മോഹന്‍ലാല്‍ സംഘടിപ്പിച്ചിരുന്നു. സംവിധാനത്തിനൊപ്പം ബറോസ് എന്ന ടൈറ്റില്‍ കഥാപാത്രത്തെ അവതരിപ്പിച്ചിരിക്കുന്നതും മോഹന്‍ലാല്‍ ആണ്. സന്തോഷ് ശിവന്‍ ആണ് ഛായാഗ്രഹണം. ബറോസ് റിലീസില്‍ മോഹന്‍ലാലിന് ആശംസയുമായി നിരവധി ചലച്ചിത്ര പ്രവര്‍ത്തകരും പ്രേക്ഷകരും എത്തിയിരുന്നു.

Film

ബോളിവുഡില്‍ അരങ്ങേറ്റത്തിനൊരുങ്ങി ഫഹദ് ഫാസില്‍; നായകനാകുന്ന കാര്യം സ്ഥിരീകരിച്ച് സംവിധായകന്‍ ഇംതിയാസ് അലി

തൃപ്തി ദിമ്രിയായിരിക്കും സിനിമയിൽ ഫഹദിന്റെ നായിക എന്ന് റിപ്പോർട്ടുകൾ പുറത്തുവരുന്നുണ്ട്

Published

3 hours ago

December 25, 2024

webdesk14

ഏറെ നാളത്തെ കാത്തിരിപ്പിനൊടുവിൽ ഫഹദ് ഫാസിലിനൊപ്പമുള്ള സിനിമയെക്കുറിച്ചുള്ള വാർത്ത സ്ഥിരീകരിച്ച് വിഖ്യാത ബോളിവുഡ് സംവിധായകൻ ഇംതിയാസ് അലി. ‘ദ ഇഡിയറ്റ് ഓഫ് ഇസ്താംബുൾ’ എന്ന് പേരിട്ട സിനിമ ബോളിവുഡിലേക്കുള്ള ഫഹദ് ഫാസിലിന്റെ നായക അരങ്ങേറ്റമായിരിക്കും. ഈയടുത്ത് ഹോളിവുഡ് റിപ്പോർട്ടറിന് നൽകിയ അഭിമുഖത്തിലാണ് ഇംതിയാസ് അലി തന്റെ പുതിയ സിനിമയെക്കുറിച്ചുള്ള വിവരങ്ങൾ പങ്കുവെച്ചത്.

‘സിനിമയെക്കുറിച്ച് പ്രഖ്യാപിച്ച് കഴിഞ്ഞു, എന്നാൽ പ്രഖ്യാപനം ഏറെ നേരത്തെയാണ്. ഒരു സിനിമ താൻ നിർമിക്കാൻ ശ്രമിക്കുന്നുണ്ട്, അടുത്ത സിനിമയാകുമോ അതിനടുത്ത സിനിമയാണോ എന്നറിയില്ല, എന്നാൽ ഇഡിയറ്റ് ഓഫ് ഇസ്താംബുൾ എന്ന പേരിലാണ് സിനിമ നിർമിക്കുന്നത്’ എന്നായിരുന്നു ഇംതിയാസ് അലി പറഞ്ഞത്. 2025ലാണ് സിനിമയുടെ ഷൂട്ടിങ് ആരംഭിക്കുന്നത്.

അനിമൽ, ഭൂൽ ഭുലയ്യ ത്രീ, ബുൾബുൾ തുടങ്ങിയ സിനിമകളിൽ അഭിനയിച്ച തൃപ്തി ദിമ്രിയായിരിക്കും സിനിമയിൽ ഫഹദിന്റെ നായിക എന്ന് റിപ്പോർട്ടുകൾ പുറത്തുവരുന്നുണ്ട്. ഫഹദിന്റെ ബോളിവുഡ് അരങ്ങേറ്റത്തെ ഏറെ പ്രതീക്ഷയോടെയാണ് ആരാധകർ കാത്തിരിക്കുന്നത്. ജബ് വി മെറ്റ്, തമാഷ, ഹൈവേ തുടങ്ങിയ ഹിറ്റ് ചിത്രങ്ങൾക്ക് ശേഷം ഇംതിയാസ് അലി സംവിധാനം ചെയ്യുന്ന സിനിമയെക്കുറിച്ച് ഇതിനോടകം തന്നെ സിനിമാപ്രേമികൾക്കിടയിൽ വാർത്തകൾ പ്രചരിച്ചിരുന്നു. ദിൽജിത്ത് ദോസഞ്ചും പരിണീതി ചൊപ്രയും അഭിനയിച്ച അമർസിങ് ചംകീല ആയിരുന്നു ഇംതിയാസ് അലിയുടെ അവസാന സിനിമ. സിനിമയിൽ ഫഹദ് ഫാസിൽ ഒരു ശ്രദ്ധേയ വേഷത്തെ അവതരിപ്പിച്ചിരുന്നു.

Film

‘മാർക്കോ’ തെലുങ്ക് റൈറ്റ്‌സിനു റെക്കോർഡ് തുക

Published

4 hours ago

December 25, 2024

webdesk14

ക്യൂബ്സ് എന്റർടെയ്ൻമെന്റ്‌സിന്റെ ബാനറിൽ ഷെരീഫ് മുഹമ്മദ് നിർമിച്ച് ഹനീഫ് അദേനി തിരക്കഥയെഴുതി സംവിധാനം ചെയ്ത ഉണ്ണി മുകുന്ദൻ ചിത്രം ‘മാർക്കോ’ ബോക്സോഫീസില്‍ തരംഗം സൃഷ്ട്ടിക്കുകയാണ്. ഉണ്ണി മുകുന്ദന്റെ കരിയറിലെ തന്നെ ഏറ്റവും വലിയ സോളോ സൂപ്പർ ഹിറ്റിലേക്കാണ് മാർക്കോ കുതിക്കുന്നത്. ചിത്രത്തിന്റെ കളക്ഷൻ ആദ്യ ആഴ്ചയിൽ തന്നെ 50 കോടി കടന്നു. മലയാള സിനിമ ഇതുവരെ കാണാത്ത ആക്ഷൻ രംഗങ്ങൾ കൊണ്ട് നിറഞ്ഞ മാർക്കോ യുവ പ്രേക്ഷകർക്കും കുടുംബ പ്രേക്ഷകരും ഒരുപോലെ സ്വീകരിച്ചിരിക്കുകയാണ്.

ഉണ്ണി മുകുന്ദൻ എന്ന താരത്തെ സൂപ്പർ സ്റ്റാർ പദവിയിലേക്ക് ഉയർത്തിയ ബെഞ്ച് മാർക്ക് ചിത്രം കൂടിയാണ് മാർക്കോ. ചിത്രത്തിന്റേതായി പുറത്തു വരുന്ന പ്രോമോകൾ എല്ലാം സോഷ്യൽ മീഡിയയിൽ ട്രെൻഡിങ്ങാണ്. സൂപ്പർ സ്റ്റാർ ഉണ്ണി മുകുന്ദൻ വിശേഷണവുമായിട്ടാണ് മാർക്കോയുടെ പുതിയ സക്സസ് ടീസർ അണിയറപ്രവത്തകർ പുറത്തു വിട്ടത്. ചിത്രത്തിന്റെ തെലുങ്ക് പതിപ്പ് ജനുവരി ഒന്നിന് പ്രദർശനത്തിനെത്തും. മൂന്ന് കോടി രൂപയ്ക്കാണ് തെലുങ്ക് റൈറ്റ്‌സ് വിറ്റ് പോയത്. മാർക്കോയുടെ ഹിന്ദി പതിപ്പിനും മികച്ച പ്രതികരണമാണ് ലഭിക്കുന്നത്.

ക്യൂബ്‌സ് എൻറർടെയ്ൻമെൻറ്‌സ്, ഉണ്ണി മുകുന്ദൻ ഫിലിംസ് എന്നീ ബാനറുകളിൽ ഷെരീഫ് മുഹമ്മദ് നിർമ്മിച്ച ചിത്രത്തിലെ ഗാനങ്ങള്‍ ഏറെ ശ്രദ്ധിക്കപ്പെട്ടിരുന്നു. മലയാളം ഇതുവരെ കാണാത്ത വിധത്തിലുള്ള മോസ്റ്റ് വയലൻറ് ഫിലിം എന്ന ലേബലിൽ എത്തുന്ന ‘മാർക്കോ’യുടെ സംഗീതമൊരുക്കുന്നത് ‘കെ.ജി.എഫ്’, ‘സലാർ’ എന്നീ ബ്രഹ്‌മാണ്ഡ ചിത്രങ്ങളുടെ സംഗീത സംവിധായകൻ രവി ബസ്രൂർ ആണ്. ചിത്രത്തിന്റെ മ്യൂസിക് റൈറ്റ്‌സ് സോണി മ്യൂസിക്ക് ആണ്.

അസാധാരണമായ വയലൻസ് രംഗങ്ങളും ഹെവി മാസ് ആക്ഷനുമായി ‘മാർക്കോ’ 5 ഭാഷകളിലാണ് റിലീസ് ചെയ്തിരിക്കുന്നത്. ആക്ഷന് വലിയ പ്രാധാന്യം ഒരുക്കിയിരിക്കുന്ന സിനിമയിലെ സംഘട്ടനങ്ങൾ ഒരുക്കിയിരിക്കുന്നത് പ്രമുഖ ആക്ഷൻ ഡയറക്ടർ കലൈ കിങ്ങ്സ്റ്റണാണ്. ചിത്രത്തിനായി ഏഴോളം ഫൈറ്റ് സീക്വൻസുകളാണ് കലൈ കിങ്ങ്സ്റ്റൺ ഒരുക്കിയിരിക്കുന്നത്. നിരവധി ചിത്രങ്ങളുടെ ആക്ഷൻ കോറിയോഗ്രാഫി നിർവഹിച്ച കലൈ കിങ്ങ്സ്റ്റൺ ഒരു കംപ്ലീറ്റ് ആക്ഷൻ ചിത്രത്തിന്റെ ഫൈറ്റ് മാസ്റ്ററായി പ്രവർത്തിക്കുന്നത് ഇതാദ്യമായാണ്.

ജഗദീഷ്, ആൻസൺ പോൾ, കബീർ ദുഹാൻസിംഗ്, സിദ്ദീഖ്, അഭിമന്യു തിലകൻ, മാത്യു വർഗീസ്, അർജുൻ നന്ദകുമാർ, ബീറ്റോ ഡേവിസ്, ദിനേശ് പ്രഭാകർ, ശ്രീജിത്ത് രവി, ലിഷോയ്, ബാഷിദ് ബഷീർ, ജിയാ ഇറാനി, സനീഷ് നമ്പ്യാർ, ഷാജി ഷാഹിദ്, ഇഷാൻ ഷൗക്കത്, അജിത് കോശി, യുക്തി തരേജ, ദുർവാ താക്കർ, സജിത ശ്രീജിത്ത്, പ്രവദ മേനോൻ, സ്വാതി ത്യാഗി, സോണിയ ഗിരി, മീര നായർ, ബിന്ദു സജീവ്, ചിത്ര പ്രസാദ് തുടങ്ങി നിരവധി താരങ്ങളും ചിത്രത്തിൽ അഭിനയിക്കുന്നു.

എക്സിക്യൂട്ടീവ് പ്രൊഡ്യൂസർ: ജുമാനാ ഷെരീഫ്. ഗാനരചന: വിനായക് ശശികുമാർ. ഛായാഗ്രഹണം: ചന്ദ്രു സെൽവരാജ്. ചിത്രസംയോജനം: ഷമീർ മുഹമ്മദ്. പ്രൊഡക്ഷൻ കൺട്രോളർ: ദീപക് പരമേശ്വരൻ. കലാസംവിധാനം: സുനിൽ ദാസ്. മേക്കപ്പ്: സുധി സുരേന്ദ്രൻ. കോസ്റ്റ്യൂം ഡിസൈൻ: ധന്യാ ബാലകൃഷ്ണൻ. ചീഫ് അസ്സോസ്സിയേറ്റ് ഡയറക്ടർ: സ്യമന്തക് പ്രദീപ്. പ്രൊഡക്ഷൻ എക്സിക്യൂട്ടീവ്: ബിനു മണമ്പൂർ. ഓഡിയോഗ്രഫി: എം.ആർ. രാജകൃഷ്ണൻ. സൗണ്ട് ഡിസൈൻ: കിഷൻ. പ്രൊമോഷൻ കൺസൽട്ടന്റ്: വിപിൻ കുമാർ ടെൻ ജി മീഡിയ. വിഎഫ്എക്സ്: 3 ഡോർസ്. സ്റ്റിൽസ്: നന്ദു ഗോപാലകൃഷ്ണൻ.