ജനകീയ പ്രതിഷേധങ്ങൾക്ക് മുന്നിൽ ഇനിയും സർക്കാറിന് മുട്ട് മടക്കേണ്ടി വരുമെന്ന് മുസ്ലിംലീഗ് സംസ്ഥാന ജനറൽ സെക്രട്ടറി അഡ്വ. പി.എം.എ സലാം പറഞ്ഞു. വന നിയമ ഭേദഗതി ഉപേക്ഷിക്കാനുള്ള സർക്കാർ തീരുമാനത്തിൽ പ്രതികരിക്കുകയായിരുന്നു അദ്ദേഹം. കർഷകരുടെ ആശങ്കകൾ പരിഗണിക്കാതെ ഫോറസ്റ്റ് രാജ് നടപ്പാക്കാനുള്ള നീക്കമാണ് വന നിയമ ഭേദഗതിയിലൂടെ സർക്കാർ നടത്തിയത്. കാട്ടാന ആക്രമണത്തിൽ നിരന്തരം മനുഷ്യർ മരിക്കുകയും വന്യമൃഗങ്ങളുടെ ശല്യം കാരണം കോടിക്കണക്കിന് രൂപയുടെ കൃഷിഭൂമി നശിക്കുകയും ചെയ്യുന്ന സാഹചര്യത്തിൽ വീണ്ടും കർഷകരെയും സാധാരണക്കാരെയും ദ്രോഹിക്കുന്ന നിയമ ഭേദഗതിയിൽനിന്ന് പിന്തിരിയണമെന്ന് മുസ്ലിംലീഗും യു.ഡി.എഫും ആവശ്യപ്പെട്ടിരുന്നു. ജനകീയ പ്രതിഷേധത്തെ തുടർന്ന് നീക്കം ഉപേക്ഷിച്ചിരിക്കുകയാണ്.

ജനവിരുദ്ധ നിയമങ്ങൾ കൊണ്ടുവരികയും പ്രതിഷേധമുണ്ടാകുമ്പോൾ പിൻവലിക്കുകയും ചെയ്യുക എന്നത് സർക്കാർ പതിവാക്കിയിരിക്കുകയാണ്. വഖഫ് നിയമനങ്ങളുടെ വിഷയത്തിലും പ്ലസ് വൺ സീറ്റ്, സിൽവർ ലൈൻ തുടങ്ങിയ വിഷയങ്ങളിലും ഈ യൂ ടേൺ കണ്ടതാണ്. -പി.എം.എ സലാം പറഞ്ഞു. എല്ലാ നിയമവും മനുഷ്യരുടെ നിലനിൽപിനും പുരോഗതിക്കും വേണ്ടിയാണ് നിർമ്മിക്കേണ്ടത്. മനുഷ്യനെ ദ്രോഹിക്കാനുള്ള ഏത് നിയമത്തിനെതിരെയും പ്രതിഷേധം ഉയരുമെന്നും സർക്കാരിന് പിന്തിരിയേണ്ടി വരുമെന്നും അദ്ദേഹം കൂട്ടിച്ചേർത്തു.

ഗസ്സയില്‍ വെടിനിര്‍ത്തല്‍ കരാര്‍ ഉടന്‍ നിലവില്‍വരുമെന്ന് സൂചന. ഖത്തര്‍ വിദേശകാര്യമന്ത്രാലയ വക്താവ് മാധ്യമങ്ങളെ കാണും. ഇതില്‍ വെടിനിര്‍ത്തല്‍ സംബന്ധിച്ച പ്രഖ്യാപനങ്ങളും ഉണ്ടാകുമെന്നാണ് സൂചന. ഖത്തര്‍ നല്‍കിയ വെടിനിര്‍ത്തല്‍ സംബന്ധിച്ച കരട് രേഖ ഹമാസും ഇസ്രാഈലും അംഗീകരിച്ചതായാണ് റിപ്പോര്‍ട്ട്.

കഴിഞ്ഞ ഒരാഴ്ചയായി ദോഹയില്‍ ചര്‍ച്ചകള്‍ നടക്കുകയായിരുന്നു. അതേസമയം വെടിനിര്‍ത്തല്‍ സംബന്ധിച്ച ചര്‍ച്ചകള്‍ അന്തിമഘട്ടത്തിലേക്ക് നീങ്ങുമ്പോള്‍ ഗസ്സയില്‍ ഇസ്രായേല്‍ വലിയ ആക്രമണമാണ് നടത്തുന്നത്. ചര്‍ച്ചകള്‍ക്ക് മധ്യസ്ഥത വഹിച്ചത് ഖത്തറും, അമേരിക്കയും, ഈജിപ്തുമാണ്. സെന്‍ട്രല്‍ ഗസ്സയില്‍ നിന്ന് ഇസ്രാഈല്‍ സൈന്യം പിന്മാറിയേക്കും.

വെടിനിര്‍ത്തല്‍ കരാര്‍ പ്രഖ്യാപനം സംബന്ധിച്ച വാര്‍ത്തസമ്മേളനം ദോഹയില്‍ നടക്കാനിരിക്കെ ഖത്തര്‍ പ്രധാനമന്ത്രി ശൈഖ് മുഹമ്മദ് ബിന്‍ അബ്ദുല്‍റഹ്‌മാന്‍ ആല്‍ഥാനി ഹമാസ്, ഇസ്രാഈല്‍ നേതാക്കളുമായി കൂടിക്കാഴ്ച നടത്തി. മധ്യസ്ഥ ചര്‍ച്ചകള്‍ക്കായി ദോഹയിലെത്തിയ ഹമാസ്, ഇസ്രാഈല്‍ നേതാക്കളുമായാണ് പ്രധാനമന്ത്രി അവസാനഘട്ട കൂടിക്കാഴ്ച നടത്തിയത്.

15 മാസം നീണ്ട ഗസ്സ വംശഹത്യക്ക് ശേഷമാണ് വെടിനിര്‍ത്തല്‍. യുദ്ധം അവസാനിപ്പിക്കുന്നതിനുള്ള കരാറിന്റെ അന്തിമ കരടുരേഖ ഇരുകക്ഷികള്‍ക്കും കഴിഞ്ഞ ദിവസങ്ങളില്‍ കൈമാറിയിരുന്നു.

കായിക താരമായ ദളിത് പെണ്‍കുട്ടിയെ ലൈംഗികമായി പീഡിപ്പിച്ച കേസില്‍ ഇതുവരെ 49 പേര്‍ അറസ്റ്റിലായി. സംഭവത്തില്‍ ആകെ 60 പ്രതികള്‍ ഉള്‍പ്പെട്ടിട്ടുള്ളതായി പോലീസ് പറയുന്നു. ഇനി ഒമ്പത് പ്രതികളെ കൂടി കണ്ടെത്താനുണ്ടെന്നും രണ്ട് പേര്‍ക്കായി പോലീസ് ലുക്ക് ഔട്ട് നോട്ടീസ് പുറത്തിറക്കിയിട്ടുണ്ടെന്നും ഡി.വൈ.എസ്.പി. നന്ദകുമാര്‍ പറഞ്ഞു.

അതേസമയം അറസ്റ്റിലായവരില്‍ അഞ്ചു പ്രതികള്‍ പ്രായപൂര്‍ത്തിയാകാത്തവരാണ്. സംഭവവുമായി ബന്ധപ്പെട്ട് 31 കേസുകളാണ് ഇതുവരെ രജിസ്റ്റര്‍ ചെയ്തിട്ടുള്ളത്. ഏറ്റവും കൂടുതല്‍ കേസുകള്‍ രജിസ്റ്റര്‍ ചെയ്തിട്ടുള്ളത് നിലവില്‍ പത്തനംതിട്ട ഇലവുംതിട്ട പോലീസ് സ്റ്റേഷനിലാണ്.

ലൈംഗികാതിക്രമം നടത്തിയവരെ കുറിച്ചുള്ള വിവരങ്ങള്‍ പെണ്‍കുട്ടി ആദ്യ മൊഴിയില്‍ തന്നെ നല്‍കിയിരുന്നു. പേര്, സ്ഥലം, മൊബൈല്‍ നമ്പര്‍, സാമൂഹികമാധ്യമ അക്കൗണ്ട് എന്നിങ്ങനെ പ്രതികളെ കുറിച്ചുള്ള വിവരങ്ങള്‍ പെണ്‍കുട്ടി പോലീസിന് നല്‍കിയിരുന്നു.

ആദ്യഘട്ടത്തില്‍ ഇലവുംതിട്ട, പത്തനംതിട്ട പോലീസ് സ്റ്റേഷന്‍ പരിധികളില്‍ മാത്രമായിരുന്നു അന്വേഷണം നടന്നിരുന്നതെങ്കിലും ക്രമേണ അന്വേഷണം അഞ്ച് പോലീസ് സ്റ്റേഷനുകളിലേക്കും കൂടി വ്യാപിപ്പിച്ചു.

അതേസമയം, ബുധനാഴ്ച ഉച്ചയോടെ കേസിലെ ഒരു പ്രതി മാതാപിതാക്കളോടൊപ്പം പത്തനംതിട്ട പോലീസ് സ്റ്റേഷനിലെത്തി കീഴടങ്ങി. ഇയാളെ വിശദമായി ചോദ്യം ചെയ്തുവരികയാണ്. വൈദ്യപരിശോധനയക്ക് ശേഷം ബുധനാഴ്ച രാത്രിയോടുകൂടി ഇയാളുടെ അറസ്റ്റ് രേഖപ്പെടുത്തും.